Спорт • 03 Шілде, 2020

Рекордты жаңартты

29 рет көрсетілді

Футболдан Ресей Премьер-лигасында өнер көрсететін отандасымыз Бақ­тияр Зайнутдинов «Ростов» және «Красно­дар» арасындағы тарихи матчқа қатысты.

Ресей чемпионатының 25-тур ойынын­дағы «Ростов» – «Краснодар» арасындағы кездесу 1:1 есебімен аяқталып, РПЛ-дің рекорд­тар кітабындағы нәтижені жаңартты. Яғни аталған екі команда арасындағы матч әдет­тегідей 90 минут емес, 111 минут, 15 се­кунд­қа жалғасты. Рекордтың жаңаруына екін­ші таймда белгіленген пенальти себеп болды.

Ойынның бірінші таймында «Краснодар» клубы 1:0 есебімен алда болған. Ал екінші таймның соңында матч төрешісі Виталий Мешков қосымша алты минут қосқан еді. Қосымша уақыт аяқталар тұста қонақ­тар өз айып алаңында ойын ережесін бұз­ғаны үшін бас төреші бірінші VАR-ға жүгініп, «Краснодар» қақпасына он бір метрлік айып добын тағайындады. Кейіннен тағы да бейне қайталауды қарап, алғашқы шешімі дұрыс екеніне көз жеткізді. Нәтижесінде, кездесудің 110-минутында Ивелин Попов 11 метрлік айып добын сәтті орындап, командасын жеңілістен құтқарып қалды.

Айта кетейік, «Ростов» клубында доп тебетін жерлесіміз Бақтияр Зайнутдинов бұл матчта негізгі құрамда шығып, алаңда 87 минут өнер көрсетті.

Соңғы жаңалықтар

Ұқсас жаңалықтар