![Басты құндылық – адам өмірі](/media/2020/07/03/1579268310_images-8.jpg)
Әрине, бүгінгі таңда денсаулық сақтау саласына, басқа да салалардың жұмысына қатысты айтылып жатқан сыни пікірлер аз емес. Десек те, кінәнің бәрін соларға аудару қаншалықты әділетті?!
Айталық, өзім тұратын үйдің маңында дәмханаларда бетпердесіз, сақтық шараларын сақтамай отырған жастарды жиі көремін. Көшеде дәл солай жайбарақат серуендеп жүргендер аз емес. Күн сайын жан-жақтан ауруға шалдыққан, өмірімен қоштасқан адамдар туралы жаманат хабарлар жетіп жатқанда бұлай жайбарақат жүруге болмайды.
Менің таныстарымның арасында да ауырып жатқандар, қайтыс болғандар бар. Таныс кәсіпкердің жұмысындағы 100 адамның қырықтан астамы ауру жұқтырды. Бір фермердің қол астындағы 160 жұмысшының жүзден астамы ем қабылдауда. Кей адамдар ауруды қатты қиналмай, өз күшімен жеңіп жатыр. Енді біреулер бірнеше күннің ішінде ауыр жағдайға ұшырауда. Әлеуметтік желіде қаралы хабар жеткізген, бір-біріне көңіл айтқан, денсаулығын сұрасқан жазбалардан көз сүрінеді. Мұндай жағдайда карантин шараларын күшейту туралы шешім әрине, орынды болды. Алдағы уақытта карантин мерзімін ұзарту да артық болмайды.
Мемлекет үшін ең басты құндылық – адамдардың өмірі мен денсаулығы. Экономикалық қиындықтың орнын уақыт өте келе толтырамыз, ал адамдардың өмірі мен денсаулығын ешқашан қайтара алмаймыз. Сол себепті барша жұртты мемлекет тарапынан қабылданған қатаң карантин режіміне түсіністікпен қарауға, қолдауға және тәртіп сақтауға шақырамын. Әр азамат өз денсаулығы үшін бірінші кезекте өзі жауапты. Аталарымыз «Бірінші байлық – денсаулық» деп тегін айтпаған, сол қанатты сөз қазіргі таңда өте өзекті.
Төлеутай РАХЫМБЕКОВ,
«Ұлттық аграрлық ғылыми-білім беру орталығы» КеАҚ басқарма төрағасы