ҚАЗАҚСТАН ТАРАБЫНЫҢ ҮЛКЕН ҮЛЕСІ АТАЛДЫ

ЕҚЫҰ-ның Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаев сәрсенбіде елімізге ресми сапармен келген БҰҰ Бас хатшысы Пан Ги Мунмен кездесті. Бұл кездесу  Астанада ауа райының күрт бұзылуынан Бас хатшының ұшағы Қарағанды қаласына қонуына байланысты бір күнге кешіктірілгенін айта кетейік. Қанат Саудабаев 1991 жылдың 29 тамызында Президент Н.Назар­баев­тың Жарлығымен Семей по­ли­гонының жабылуы ядролық қару­сыз әлем ұстанымына жол салған­ды­ғын атап көрсетті. Осы ретте Қ.Сау­дабаев БҰҰ Бас хатшысының әлем халқын бейбітші­лік­ке шақырған үндеуі, “ядросыз  бей­біт өмірге балама жоқ” деген пайы­мы оның Бас хатшы ретіндегі ядро­лық қаруды таратпау және оның қаупін сейілту жөніндегі нық ұста­нымын көрсететінін ерекше атады. “Сіздің барлық қадамдары­ңыз Пре­зидент Н.Назарбаевтың іс-әрекет­терімен және ұстанымымен астасып жатқаны біздер, қазақстан­дықтар үшін өте жағымды”, деді Қанат Бекмырзаұлы. Және де бүгінгі таңда БҰҰ Қазақстанның көптеген баста­ма­ларына қолдау білдіріп келе жат­қанын айтты. Семей поли­гонының жабылған 1991 жылғы 29 тамызы ядро­лық сынаққа қарсы күрес күні бо­лып қабылдануы да Пан Ги Мун есімімен тікелей байланысты екені аталды. Өз кезегінде мәртебелі мейман дәстүрі мен тарихы тереңде жатқан Қазақстанға, әсіресе, Семей өңіріне жасаған сапарынан алған мол әсеріне ризашылығын білдірді. Бұл сапар Ресей мен АҚШ арасын­да­ғы стратегиялық  шабуылдау қарулар­ын (СШҚ) жою туралы бұрын қол қойылған келісімнің заңды жалғасы болып табылатын жаңа келісімге қол қою рәсімінің алдында өтуде. Оның үстіне, келесі аптада Нью-Йорк қаласында Президент Н.Назарбаев қатысады деп күтілген ядролық қарусыздануға байланысты жоғары деңгейдегі үлкен саммит өтпекші. БҰҰ Бас хатшысы Қазақстан мен оның басшысының әлемді ядролық қауіптен ада ету  бастамаларына қос­қан сүбелі үлестеріне ерекше тоқтал­ды. Бұдан кейінгі әңгіме БҰҰ мен Қазақстан арасындағы ынтымақтас­тық­ты арттыру жайында жалғасын тапты. Асқар ТҰРАПБАЙҰЛЫ.