Елбасы • 06 Шілде, 2020

Егемен елдің ордасы

83 рет көрсетілді

Төрткүл дүниеге жаңа тұрпатты мегополис ретінде танылған Елорданың мерекесіне Қарағанды облысы ерекше дайындықпен келді. Әуелі кеншілер астанасында «Теміртау – алтын бесігім» деген тақырыпта халықаралық онлайн-дөңгелек үстел өтіп, оның жұмысына Zoom платформасы арқылы Елбасының серіктестері, Украинадағы Каменск жоғары кәсіби училищесінің директоры Вадим Неклесе, Алматы облысының Шамалған ауылындағы «Атамекен» тарихи-мәдени орталығының ғылыми қызметкері Қыдыр Нұрбергенұлы, Қарағанды металлургия комбинатының бұрынғы бас директоры Олег Сосковец және басқалар қатысты.

Теміртау қаласының 75 жыл­­дығы мен Қазақстан Маг­нит­касының 60 жылдық мерейтойы­на арналған іс-шараны жүргізіп отырған Қарағанды облысының әкімі Жеңіс Қасымбек Тұңғыш Президент – Елбасы Нұрсұлтан Назарбаев есімінің еліміздің астанасы Нұр-Сұлтан мен Теміртау қалаларын және Қазақстан Магниткасын өзара бай­ланыстырып тұратынын ерекше мақтанышпен атап өтті.

– Қарағанды облысының Ел­басымыздың еңбек және саяси Отаны екенін мақтан тұтамыз. Дәл осы жерден Нұрсұлтан Әбішұлы өзінің кәсіби жолын бастады. Өзі айтқандай, Теміртау оның басты университеті болды. Сонау 60-шы жылдары тақыр далада комбинат цехтарын салған, елдің экономикалық және стратегиялық қауіпсіздігін қамтамасыз ете оты­рып, металдың рекордтық тон­наларын берген адамдарға шын ниетпен тәнті боламын. Ал Ел­басы негізін қалаған, 20 жыл­дың ішінде әлемдегі ең әде­мі ас­таналардың біріне ай­нал­ған елор­даның құрылысына қара­ғандылықтардың да қосқан үлесі қо­мақ­ты болды, – деді өңір басшысы.

Алғашқылардың бірі болып сөз ал­ған Украинадағы Каменск жоғары кәсі­би училищесінің директоры Вадим Нек­лесе аталған оқу орнында Қазақстан Респуб­ликасының Тұңғыш Президентіне арналған мұражай бар екенін,  жалпы білім ұясында қайраткер тұлға есімінің зор құрметке ие екенін атап өтті.

Еске салар болсақ, Камен­скідегі бұл білім мекемесі бұрын Днепродзержинск қала­сының № 8 техникалық училищесі болған еді. Мұнда 1958 жылдан 1960 жылға дейін болашақ Тұңғыш Президент Нұрсұлтан Назарбаев білім алған болатын.

Бұдан кейін Елбасының сенімді серік­тестері әңгімені әрі қарай өрбітіп, тарихи мәні зор құнды естеліктерімен бөлісті. Мы­салы, Тұңғыш Президентпен Қарағанды политехникалық институтында бір топта оқыған досы, Қазақстан Республикасының тұңғыш Сыртқы істер министрі Төлеутай Сүлейменов Елбасының еңбек жолы туралы тұшымды әңгіме айтты.

Сондай-ақ онлайн-дөң­гелек үстел отырысында Елба­сының серіктесі, Қазақстан Маг­ниткасында бірге еңбек еткен Қабидолла Сарекенов, бұрынғы цех бастығы Эдуард Миникес, алып комбинаттың басшысы болған Олег Сосковец, «АрселорМиттал Теміртау» АҚ атқарушы директоры Ва­дим Басин, ҚарМТУ-дың рек­торы Марат Ибатов және бас­қалар Тұңғыш Прези­денттің қайраткерлік тұлғасын аша түскен естеліктерімен бөлісті, қайраткер тұлғаның елорданың ғана емес, Тәуелсіз Қазақстан мемлекеттігінің мызғымас ірге­тасын қала­ған ерен еңбегі турасында па­йымды пікір­лерін айтты.

Халықаралық онлайн-дөң­гелек үстел отырысының соңында облыс әкімі Елбасы­ның ғибратты ғұмыры мен еңбек жолы жайлы тың деректер және қызғылықты мәліметтер ұсынған құрметті қатысушыларға  алғыс айтып, ризашылығын білдірді.

 

* * *

Елорда күні мерекесінің қар­саңында Елбасының ең­бек Отаны Теміртауда Тұң­ғыш Президент Нұрсұлтан Назар­баевтың тікелей тапсырмасымен бой көтерген жаңа емхана ашылды. «АрселорМиттал Темір­тау» компаниясының қаты­суымен салынған екі қабатты емхананың бір ауысымда 50 адамды қабылдауға мүмкіндігі жетеді.

Бұл күні дәл осындай тағы екі емхана облыс орталығында да айқара есік ашты. Мемлекет-жекеменшік әріптестігі негізінде салынған бұл медициналық нысандардың бірі қаладағы №11А ықшам ауданда, ал екіншісі Оңтүстік-Шығыс аумағында бой көтерді. Алғашқысы бір ауысымда 50 адамға дейін қабылдай алса, екінші емхананың қуаты бір ауысымда 150 келушіге қызмет көрсетуге жетеді. Мұнда қабылдауды 11 жалпы тәжірибе дәрігері, екі педиатр, екі акушер-гинеколог, терапевтік бейіндегі 11 салалы маман және терапевтік емес бағыттағы екі маман жүргі­зетін болады.

Айта кету керек, жаңа емха­налардың барлығы заманауи медициналық құрал-жаб­дықтармен қамтамасыз етілген. Дәрігерлер мен пациенттерге ыңғайлы болу үшін нысандарда электронды кезек жүйесі жұмыс істейтін болады.

2 қайрат

Сондай-ақ бұл күні Қара­ғандыда «Бизнес­тің жол картасы» және «Қарапайым заттар экономикасы» мемлекет­тік бағдар­ламалары аясында елі­міздегі ең ірі Global City кө­терме-тарату логистикалық орталығы бой көтерді. Бұл жерде азық-түлік өнімдері сақталады, сұрыпталады және сатылатын болады. Ең бастысы, орталықта көкөніс пен жеміс делдалдарсыз босатылады, ал мұның өзі Қара­ғанды нарығында ғана емес, еліміздің басқа өңірлерінде де баға­ны төмендетуге мол мүмкін­дік береді.

Аталған нысанда бөлшек сауда үшін ауданы 42 мың шаршы метр сауда-ойын сауық орталығы, 149 жеке тұрған сауда павильоны және аумағы 2 мың шаршы метр мамандандырылған ет павильоны салынды.

333

Мұнда ірі көтерме сауда орын­дары үшін әртүрлі темпе­ратуралық режімдегі климаттық қойма, құрғақ қойма, уақытша сақтау қоймасы (УСҚ), темір жол тұйығы, көтерме краны бар контейнерлік алаң, кедендік ресім­деу аймағы, тиеу-түсіру техникасы қарастырылған. Аумақта кросс-ДОК орналасқан, олар бір мезгілде 164 жүк көлі­гін қабылдай алады. Тағы бір ар­тықшылық – көліктер үшін логис­тикалық орталықтан Қара­ғанды қаласын Нұр-Сұлтан, Павлодар және Алматы бағыт­тарымен жалғап жатқан жол ай­ры­ғына тікелей шығу мүмкіндігі қарас­тырылған.

Сондай-ақ Global City кө­тер­ме-тарату логистикалық орта­лығында «Цифрлы Қазақ­стан» бағдарламасы бойынша фермерлер мен сатып алушылар үшін электронды сауда алаңы құрылады және бизнес-үдерістерді басқару  жүйесі то­лық­тай автоматтандырылады.

сонгы

Елорда күні мерекесінің қар­саңында бой көтерген ны­сандардың   ашылуында болған облыс әкімі Жеңіс Қасымбек Тұңғыш Президентіміздің  тіке­лей тапсырмасымен іске ас­қан әлеу­меттік маңызы зор бұл жоба­лардың ең бірінші кезекте халықтың әл-ауқатын жақсартуға бағытталған игі шаруалар екенін ерекше атап өтті.

 

Қарағанды облысы

Соңғы жаңалықтар

Адасқан балалар аман-есен табылды

Аймақтар • 07 Тамыз, 2020

Ұқсас жаңалықтар