Оқиға • 07 Шілде, 2020

Қалғымайтын қала

61 рет көрсетілді

Бастауында Елбасы, Қазақстанның Тұңғыш Президенті Нұрсұлтан Әбішұлы Назарбаев тұрған елордамыз жастардың сүйікті қаласына айналғалы қашан. Жыл сайын жалын атқан жастардың дені бас қалаға қарай ағылып, болашақ өмірлерін осы бір әсем шаһармен байланыстырады. Нұр-Сұлтан қаласын асықпай аралап шыққан адам, шаһардың шынымен де жастар қаласына айналғанын бірден байқайды. Соңғы кезде елордамен бірге қалғымайтын қала деген сөздің қосақтала айтылып жүргені осыдан болса керек.

Статистика комитетінің 2020 жылғы 1 мамырдағы дерегіне сүйенсек, Нұр-Сұлтан қаласында 1 млн 150 мың адам тұрады екен. 1-2 пайыздық айырмашылықты есепке алмасақ, ерлер мен әйел­дер­дің үлесін тең деп айтуға болады. Ал 35 жасқа дейінгі жас­тар­дың үлесі 60 пайыздан асады.

Жалпы, дамудың даңғыл жолына түскен кез келген мемлекет жастарға ерекше басымдық береді. Қазақстан да осы бағытты ұстанатыны белгілі. 2019 жыл – Жастар жылы болды. Биылғы 2020 жыл – Волонтер жылы деп жарияланды. Осының бар­лы­ғы мемлекет тарапынан ел­дің ертеңін қолдау үшін жасалып отырғаны айтпаса да түсінікті.

Елбасы Нұрсұлтан Назар­бае­втың ел астанасын Ар­қа төсіне көшіру туралы идеясы­мен Ұлы дала төсінде әлем мойын­даған шаһар құрылды. Есіл­дің жағасында бой көтерген қала өркениет көшіне ілесті. Оған ЮНЕСКО-ның шешімімен «Бейбітшілік қаласы» деген атақ берілді. Ал Президент Қасым-Жомарт Тоқаев бас шаһардың авторы әрі бас сәулетшісінің ерен еңбегін ерекше бағалап, қалаға Нұр-Сұлтан атауын беру туралы шешім қабылдады.

Бұл шешім Елбасы мен елорда егіз ұғым екенін көрсетті.

Елордада не жасалса да, жастар үшін және жастардың болашағы үшін жасалады. Себебі жастар – еліміздің қазіргі әлемдегі бәсекеге қабілеттілігінің негізгі факторы. Қазақстанның болашағы жастардың біліміне, күш-қуаты мен патриотизміне байланысты.

Елбасы айтқандай: «Тәуел­сіз­дік рухымен өсіп келе жатқан бүгінгі жас буын – біз­дің ертеңгі үмітіміз, сенімді тірегіміз».

Бас шаһарда 2010 жылы ЕҚЫҰ саммиті, 2011 жылы Астана, Алматы қалаларында Қысқы Азия ойындары, 2017 жылы елордада ЭКСПО ха-лықаралық көрмесі зор табыс­пен өтті. Атап көрсетерлігі, ба­йырқалы бас­қо­сулардың бар­лы­ғына жастар жұ­мыл­ды­рыл­ды.

Жалпы, Қазақстан тәуелсіздік алғаннан бері жастарға барынша қолдау көрсетіп келеді. Волонтер жылы аясында жастар ерекше қырынан танылды. Тұтас әлемді шарпыған пандемия жағдайында ел жастары елгезектік танытып, қиын кезеңде қайырлы бастамалардың басынан табылды. Мәселен, жастар карантинге жабылған үйлердің тұрғындарына азық-түлік таратып, қайырымдылық шараларына қатысты. Мұндай игі істен Қазақстан Коммунистік Халық партиясының Жастар қанаты да қалыс қалған жоқ.

Болашағын елордамен бай­ланыстырған жастарға екі бірдей есік ашық. Бірі – ғылым-білімге деген құштарлық, екіншісі – жаңа орта, жаңа мүмкіндіктер мен жаңа идеяларға толы жарқын болашаққа деген бастау. Қалада үнемі қайнаған тіршілік, айналада жанталасып, жағаласып жүрген адамдар, яғни бәсекелестік өте жоғары, ал бәсекелестік бар жерде алға жылжу, даму бар.

Жастар үшін махаббаттың, жасампаздықтың, достықтың, сұлулықтың символы іспетті астанада сәулет өнерінің теңдессіз үлгілері саналатын кешендер бой көтеруде. Бүгінгі таңда елордамыздың әлем алдындағы беделі күн санап артып келеді. Қазақ ұлтының ұлы тұғыры – ару астана жиырма жылда дамушы елдердің елулігіне енді, келесі меже дамыған отыздықтың қатарына қосылу. Ең бастысы, өркениет көшіндегі озық технологиялармен тыныстап, болашақтың қаласын бірге жасай білсек болғаны. Сонда ғана Елбасы іргесін қалаған «Мәңгілік елге» айналатынымыз хақ. Бір сөзбен айтқанда, астана – ызғары мен жылылығы, суығы мен сұлу­лы­ғы қатар жүретін жұмбақ қала­ бол­ғанмен, шешуін таба білген жан­ның басына қонған бақ.

Нұр-Сұлтан қаласының бү­гін­гі ажарын жастардың кес­кін-келбет, бет-бейнесі, өмір сал­ты, армандарымен салыс­ты­ру ләзім. Екеуіне де жастық жігер, албырттық, талпыныс, жа­ңаша ойлау еркіндігі, сұлулық пен сымбат тән. Бейбітшілік қа­ла­сы­ның келешегі бүтіндей XXI ға­сырдың еншісінде жатыр. Ал оның еңсесін көтеретін бүгінгі жас­тар. Оларға ерінбей еңбек етіп, ел мүддесіне қалтқысыз қыз­­мет ету қажет.

Мемлекет басшысы Қасым-Жомарт Тоқаев бір сөзінде: «Болашағы зор азаматтар ел игілігі үшін экономикамызды дамыту жолында қызмет етуі қажет. Әрине, ең алдымен біз оларға қажетті жағдай жасауға тиіспіз. Дарынды жастарға жеткілікті деңгейде қолдау көрсетпей, ал­дыңғы қатарлы зияткер мемлекет қатарына қосылу қиын еке­нін мо­йындауымыз керек», деген болатын. Жастарға жасалып жатқан қазіргі жағдайдың астарында осындай ой жатыр. Демек жастарға салынған инвестицияның қызығын көрер күн алда.

Бұл – қала қалғымауы, жастар қалғытпауы тиіс деген сөз.

 

Айқын ҚОҢЫРОВ,

Парламент Мәжілісінің депутаты, «Халық коммунистері» парламенттік фракциясының жетекшісі

Соңғы жаңалықтар

Жаңа аурухана салынып жатыр

Аймақтар • Бүгін, 08:16

869 құқық бұзушылық анықталды

Саясат • Бүгін, 08:00

Жерлесіміз жеңіске жетті

Кәсіпқой бокс • Бүгін, 07:50

Үздік бапкер анықталды

Футбол • Бүгін, 07:47

Олимпиадаға іріктеу турнирі басталады

Жеңіл атлетика • Бүгін, 07:46

Шаңғы королі 75 жаста

Спорт • Бүгін, 07:44

Мұнайшы сыйлаған жәдігер

Аймақтар • Бүгін, 07:35

COVID-19: тоқшылық пен жоқшылық

Экономика • Бүгін, 07:21

Әзіл әдебі

Руханият • Бүгін, 07:07

«Жаз әуендері» – жаңа жоба

Қоғам • Бүгін, 07:05

Абай күні

Абай • Бүгін, 06:57

Ұқсас жаңалықтар