Спорт • 07 Шілде, 2020

Италияда өнер көрсетеді

25 рет көрсетілді

Қазақстандық волейбол спортының шебері Сәбина Алтынбекова Италияның А1 лигасында бақ сынайтын «Волалто Казерта» клубымен 2 жылдық келісім­шарт жасасты.

23 жастағы отандасымыз осыдан алты жыл бұрын жоғары ойын мәнерімен және өз сұлулығымен Азия құрлығын тамсандырған болатын. 2014 жылы Тай­пейде өткен жасөспірімдер арасындағы волейболдан 17-ші Азия чемпионатында қандасымызды жергілікті БАҚ турнирдің ең сұлу спортшысы деп таныды. Сол-ақ екен Тайвань, Жапония және тағы басқа Азия елдерінің телеарналары Сәбина Алтынбекова туралы арнайы репортаж жасап, әп-сәтте бүкіл әлемге танымал болды. Сол жылы Қазақстан жасөспірімдер құрамасы Азия біріншілігінде 6-орын алды.

Осы чемпионаттан бастап Алтын­бекованың жұлдызы жанды десек, артық айтқандық емес шығар. 2015 жылы ол Жапонияның «GSS Sunbeams» командасында бір жыл өнер көрсетіп, кейіннен елге оралды. 2016-2019 жылдар аралығында Алтынбекова «Алматы» клубында ойнаса, былтыр БАӘ-нің

«Al wasl» командасының намысын қорғады. Енді міне, күні кеше кәріқұрлықты бағындырды. Алдағы екі жылда отандасымыз Италия чемпионатында бақ сынайды.

Соңғы жаңалықтар

Ұқсас жаңалықтар