Түркістан облысы Төтенше жағдайлар департаменті мәлімдегендей,
12-13 шілде күндері бірнеше жазатайым оқиға орын алған. Атап айтқанда, Отырар ауданы, Ақкөл ауылында Сырдария өзенінде 1997 жылы туған азамат суға кеткен. Сондай-ақ осы күні аталған ауданның Шәмші ауылында Арыс өзенінде 1967 жылы туған азаматтың мәйіті туыстарымен шығарылған. Куәгерлердің айтуынша, марқұм мас күйінде суға түскен. Ал 13 шілде күні Арыс қаласында Арыс өзенінде 1991 жылы туылған азамат суға батқан. Бұдан өзге, Сайрам ауданы, Ақсукент-2 ауылы тұрғынының үй жанында сығымдалған шөбі бар "Газель" автокөлігі толығымен жанып кеткен. Өрт салдарынан жүргізушінің 2011 жылы туған інісі сол мезетте ұйқыда болып, көлік ішінен шыға алмай оқиға орнында қайтыс болды. Мамандардың мәлімдеуінше, өрт көлік бортындағы жиналған шөп электр сымдарына тиіп, қысқа тұйықталу салдарынан шыққан.
Азаматтардың қауіпсіздігін қамтамасыз ету мақсатында департаменттің құрылымдық және аумақтық бөлімшелері үгіт - насихат жұмыстарын кең көлемде жүргізуде. Жергілікті полиция қызметімен бірлесе жүргізілген 181 рейдтік жұмыснәтижесінде 22 азаматқа 236 мың 130 теңге әкімшілік айыппұл салынған.
