Аймақтар • 16 Шілде, 2020

Қайын сіңлісі жеңгесінің атынан онлайн несие алғаны анықталды

331 рет көрсетілді

Түркістан облысының полицейлері туысының атынан онлайн несие алған қызды ұстады. Бұл туралы Polisia.kz-ке сілтеме жасай отырып Egemen.kz хабарлайды.

Қазығұрт аудандық полиция бөлімшесіне жергілікті тұрғын арызданады. Жәбірленуші әйелдің айтуынша, бейтаныс адам оның атынан 60 мың теңге онлайн-несие алған. Екі жылда қарызы 300 мың теңгеден асып кеткен. Аталған жайт СДТТБТ-не енгізіліп, ҚР ҚК-нің 190-бабы "Алаяқтық" бойынша тіркелді. Арызданушының шағымына сәйкес, алаяқтың қылмысын ашып, күдіктіні анықтау мақсатында Қазығұрт ауданы полицейлері қажетті іс-шараларды жүргізді.

Тексеру жұмыстарының нәтижесінде полицейлер осы қылмысқа қатысты күдіктіні ұстады. Ол жәбірленушінің туыс қайын сіңлісі болып шықты. Тергеу барысында анықталғандай, жәбірленуші 2018 жылдың шілде айында қайын сіңлісінен онлайн-несие алуға өтініш тастап беруін сұраған.

Сонан соң күдікті бойжеткенде жымысқы ой пайда болып, ол жәбірленушінің атына онлайн несие ресімдеп, мақұлдауды алғаннан кейін, ақшаның бір бөлігін иемденгені белгілі болды. Күдіктінің бас шарасы міндеттемемен босатылды. Қазіргі таңда сотқа дейінгі тергеу амалдары жүргізіліп жатыр.

Түркістан облысының полицейлері тұрғындарға: өзіңізге қатысты жеке, құпия сандарды ешкімге бермеңіздер деп ескертеді. Банктік карточкаларыңыз мен жеке куәлігіңізге, жалпы құжаттарыңызға ұқыпты болыңыздар. Егер, осындай интернет-алаяқтығының куәсі немесе құрбаны болсаңыз, тез арада полицияның "102" телефонына хабарласыңыздар.


Соңғы жаңалықтар

Ұқсас жаңалықтар