Аймақтар • 17 Шілде, 2020

Оралдық кәсіпкерлер медициналық жабдық алуға көмектесті

193 рет
көрсетілді
2 мин
оқу үшін

Оралдық кәсіпкерлер медициналық жабдық алуға көмектесті, деп хабарлайды Egemen.kz

Оралдық кәсіпкерлер медициналық жабдық алуға көмектесті

Суретті түсірген Оқас АМАНҒАЛИ

Батыс Қазақстан облысының бір топ кәсіпкері бүгін облыстық көпбейінді ауруханаға 2 оттегі концентраторы мен 400 пульсоксиметр аппаратын сыйға тартты.

"Бұл жабдықтар covid-19 індетімен күресте дәрігерлерге өте қажет көмекші құрал", дейді аурухана директоры Арман Байдеуов.

Дүниені дүрліктірген пандемияға қарсы күрес елімізде жалпыхалықтық майданға айналды. Жұрт болып жұмылып, дәрігерлерге дем беруші, ауруханаларға көмектесіп жатқан ағайын көп.

"Коронавирус пандемиясына қарсы күреске біздің кәсіпкерлеріміз тағы да жұмылды. Бүгін бізге әкеліп отырған 10 литрлік оттегі концентраторлары – ауруханаға ауыр жағдайда түскен науқастар үшін өте қажетті қондырғылар. Пульсоксиметр құралы болса науқастың қаны құрамындағы оттегі мөлшерін анықтап, дәл диагностика қоюға таптырмас көмекші. Дәл қазір біздің облыстық ауруханадағы провизорлық стационарда 148 науқас жатыр. Олардың 80 пайызы оттегі концентраторына қосылған. Ал 10-15 пайызы өкпені жасанды желдететін аппараттың көмегіне мұқтаж. Айта кететін жәйт, науқастардың көбі үйде емделіп, 10-12 күн уақыт өткізіп, ауруды асқындырып бәрібір бізге келеді. Осы жерде ғана нақты диагнозы анықталып, кәсіби медициналық жәрдем алады", дейді облыстық көпбейінді аурухана директоры.

Медициналық жабдықтар Ресей Федерациясынан әкелінген. Көрші мемлекетпен арадағы келісімдерге сәйкес, қажетті құралдар жеңілдікпен, жедел жеткізілуде.

– Елде осындай қиын жағдай болып жатқанда біз, кәсіпкерлер, қарап қара алмадық. Біз елмен біргеміз. "Бар болсаң, елге пайдаң тисін" деген аталы сөзді ескеріп, өз әлімізше азды-көпті қаражат бөліп, індетке қарсы күресте керекті құрал-жабдықтарды жеткізіп жатырмыз. Осы бастама өзге әріптестерімізге де үлгі болса дейміз. Індетті бірге еңсерейік! – дейді кәсіпкерлер атынан сөз алған Дидар Әсетов.

Батыс Қазақстан облыстық ішкі саясат басқармасы басшысының орынбасары Дархан Қаныбекұлының айтуынша, Батыс Қазақстан облысы бойынша "Ақжайық" қорына осы кезге дейін облыс кәсіпкерлерінен 100 млн теңгенің үстінде қаражат аударылған. Мұның бәрі орталықтандырылған сатып алу жүйесі бойынша коронавирус індетімен күреске қажетті дәрі-дәрмек пен жабдықтар алуға жұмсалуда. Жақында ғана 160 оттегі концентраторы Мәскеу қаласынан Оралға жеткізіліп, тиісті емдеу мекемелеріне таратылды.

 

Батыс Қазақстан облысы