Келіссөздер нәтижесінде 2005 жылы Президенттік мәдени орталық (Астана қаласы) қорынан ғылыми зерттеулер жүргізу үшін АҚШ-қа жіберілген Ботай мәдениетінінің остеологиялық коллекциялары елге қайтарылды. Зерттеу жұмыстарын Жаратылыс тарихы музейінің профессоры, Канзас Университеті Биоалуантүрлілік институтының археология бөлімінің аға кураторы, доктор Сандра Олсен жүргізген.
Коллекция 2000-2004 жылдар аралығында Ақмола облысының аумағындағы Васильковка және Красный Яр қорымдарында жүргізілген археологиялық зерттеулер нәтижесінде табылған. Бұл мәдени жәдігерлер Ботай мәдениетіне жататын 528 археологиялық заттан тұрады.
Ботай мәдениеті – ж.с.д. 3700-3100 жылдары Қазақстанның солтүстігінде (Ақмола облысы) энеолит дәуірінің археологиялық жауһары іспеттес.
