Ауа қымбат, алатұғын дем қымбат...

Акция аясындағы қор

Осы тарапта ҚМДБ «Зекет қоры» елімізде тынысы тарылып, дем жетпей жатқан науқастарды қолдау мақсатымен «Өмірге үміт сыйла!» акциясы аясында қор жинады. Елдің түкпір-түкпіріндегі жамағаттың ауыз­біршілігі арқасында 450 оттегі кон­центраторы және 3 ӨЖТ аппараты межелі орындарға жеткізілді. Жиналған қаражатқа оттегі кон­центр­а­­торларынан бөлек, емдеуге қажетті медициналық құрал-жаб­дық­тар, бір реттік бетперделер, анти­септиктер, қолғап және тағы басқа заттар алынған. Соның ішінде аталған аппараттар Атырау облысына берілсе, ал оттегі концен­тра­торлары басқа өңірлерге табыс­тал­ды. Межелеген аймақтар тізімінде: Түркістан облысына – 78, Шығыс Қазақстанға – 62, Солтүстік Қазақ­стан­ға – 61, Семей өңіріне – 57, Жамбыл облысына – 51, Ақмола облысына – 43, Павлодар облысына – 30, Қостанай облысына – 34, Сыр өңіріне – 7, Маңғыстауға – 3, Тал­дықор­ған өңіріне – 22 және Алматы қаласына 2 концентратор жет­кізілді. Осындай игі істер нау­қас­тардың денсаулығына оң әсерін бе­ріп отыр.

Елордада оттегі концентраторлары жеткілікті

Ке­зекті карантин режімі енгі­зіл­геннен бері елордада коронавирустық инфекцияны жұқтырғандар саны күн санап азаюда. Нұр-Сұлтан қаласының №3 көпсалалы ауруханасына елорда әкімдігінен 59 оттегі концентраторы алынды. Қуантарлығы, елорда тұрғындарының басым көпшілігі осы оттегі концентраторлары арқы­лы тәуір бола бастады. Сондай-ақ гуманитарлық көмек аясында қаладағы ауруханаларға коронавирус және пневмонияны емдеу үшін қосымша медициналық жабдықтар апта сайын келіп жатыр.

Бұдан бөлек, қайырымдылық жасаудың басы-қасында жүрген «Қазақстан студенттер альянсы» ұйымын айтпай кетуге болмайды. Бүгінгі таңда ұйым – ізгіліктің жаршысы ретінде бірталай іске жәрдемін тигізген.

«Осы істің бастамасын наурыз айын­да карантин режімі енгізіл­ген­нен кейін, волонтерлер көмегімен ұйымдастырған едік. Олардың ішін­де аз қамтылған және көп балалы отбасыларға, тыл еңбеккерлері мен Ұлы Отан соғысы ардагерлеріне еріктілер тобы қолұшын беріп келеді. Бұдан бөлек Қазақстан студенттер альянсының 15 жылдығына орай сәуір айында әр облысқа 1 500 медициналық бетперде, қолғап және азық-түлік себеттерін таратқан болатынбыз», дейді ұйым жетекшісі Ілияс Түстікбаев.

Сонымен қатар студенттік ұйым елорда әкімдігінің, Nur Otan партиясына қарасты Jas Otan Жастар қанатының белсенді өкілдерімен бірлесе отырып, волонтерлік қыз­мет­терді құлшына атқарып, ел игі­лі­гіне жұмыс істеп келеді.

«Осы бағытта Instagram әлеу­мет­тік желісінде жастары­мыз­дың көмегімен көлемді қаражат жиналды. Жуырда 3 оттегі концентраторы жеткізіледі және тағы 3-еуіне тапсырыс беріп қойдық. Бұған қоса 10 мың медициналық бетперде мен қажетті дәрі-дәрмек қорын тегін тарататын боламыз», дейді ұйым басшысы.

Өңірлердегі мазасыздық басылды

Қазіргідей санитарлық-эпи­де­миялық ахуалдың алмағайып кезеңінде ауруханаларда емделіп жатқан әр науқастың денсаулығы маңызды. Сондықтан да елімізде төтенше жағдай жарияланғаннан бастап, елді мекендерде аурудың алдын алу және жұқпалы індеттің таралмауы үшін көптеген жұмыс қолға алынды.

Бүгінде қала жұртшылығынан бөлек, ауыл халқы да өз жұртына септесіп жүр. Бірнеше ауданда бірыңғай қор жиналып, тиісті медициналық жабдықтар мен оттегі концентраторлары алынуда. Осыған байланысты Алматы облысы, Nur Otan партиясына қарасты Ұйғыр аудандық филиалының консультанты Ақжол Нұрдәулетұлымен аз-кем тілдесудің сәті түсті.

– Адуынды дерт талай адамды аурухана төсегіне таңып, ажал құштырып жатқаны жасырын емес. Қолұшын созып, өкпені жасанды тыныстандыратын құрылғылардың тапшылығын ескере отырып, тым болмаса соның біреуін сатып алу үшін қолымыздан келгенше қаражат жинауды бастадық. Ауданның белсенді жастары бір кісідей аз уақыттың ішінде тиісті қаражатты жинады. Аудандық орталық ауру­хананың басшылығымен ақыл­даса отырып, ең қажет деген құ­рыл­ғыларды сұрастырып, оттегі концентраторы аппаратын, сонымен қоса кварцлампа, электроотсос, рецирикулятор және науқастарға арналған ыдыс-аяқ сынды қажет­ті­лік­терді табыстадық, – дейді Ақжол Нұрдәулетұлы.

Сонымен қатар ауданның ел аға­ла­ры мен кәсіпкер азаматтары, жүк көлігін жүргізетін ерлер қауымы, әскери қызметкерлер және «Ұрпақ парызы» қоғамдық бірлестігі аудан­дық орталық ауруханаға көмек қо­рын жеткізіп тұруды бақылауға ал­ған.

Ақжол Нұрдәулетұлы қазір ауданда карантин режімі қатаң сақталғанын, сондай-ақ естияр баладан еңкейген қартқа дейін бетпердесіз аттап баспау керектігін көкейге мықтап түйгенін атап өтті.