Оқырмандар онлайн олимпиадаға ой қосты

Қоғам • 04 Тамыз, 2020

Оқырмандар онлайн олимпиадаға ой қосты

21 рет көрсетілді

Жуырда бас басылымда «Онлайн олимпиадалар ойды жетілдіреді» («EQ», 21 шілде, 2020 жыл, №138) атты мақала жарық көрген еді. Мектеп қабырғасында қатысуға міндеттелетін пәндік олимпиадалар көбінесе қатысушылардың пікірін ескере бермейді. Бұл бүгінге дейін күрмеуі шешілмей келе жатқан түйін. Осы мәселеге бейжай қарамаған оқырмандардың пікірі сан алуан.

Мұхтар КҮМІСБЕК

Мәселен, аталған олимпиадаларға қатысушылардың да ойларын ортаға салғанда, ұйымдастырушылар тұтынушылардың тілегін қаншалықты ескеретінін, қатысушылардың талабын қаншалықты орындайтынын жеткізді. Осы ретте, ақтөбелік Балдырған Табылдина есімді жас маман қатысушы ретінде онлайн олимпиадалардың мұғалімнің теориялық білімін шыңдап, кәсіби шеберлігі дамытатына сенім білдірді. Ал талдықорғандық №14 орта мектеп-гимназиясының қазақ тілі мен әдебиеті пәні мұғалімі Гүлжан Тұрарбекқызы олимпиада оқушылардың, әсіресе грамматиканы тыңғылықты үйренуіне септігін тигізетінін жеткізді.

– Жаңа бағдарлама бойынша грамматика тереңдетіліп оқытылмайды. Алайда осы олқылықтың орнын олимпиада кезінде толтырып отырады. Сондықтан бұл олимпиаданың пайдасы мол деп ойлаймын. Мысалы жергілікті байқаулардағыдай таныс-тамырлыққа жол берілмейді. Қоғамдағы «жемқорлық» дертіне тосқауыл болатын тәсіл деп ойлаймын. Оқушы, не мұғалім болсын өзінің жарнасын төлеп, тапсырма мен шарттарын орындайды. Одан кейін оның білімі шынайы түрде шығады. Сол себепті, бұл онлайн олимпиадалар қоғамдағы шынайылықты орнатуға көп пайда береді, – дейді тәжірибелі ұстаз.

Бұл орайда сарапшылардың да пікірі бар. Пандемия жағдайында қашықтан білім алуды заңдастыру күн тәртібіндегі өзекті мәселелердің біріне айналды. Елді жылдам интернетпен қамтумен қатар, сапалы білім қызметін ұсынатын виртуалды нарық қалыптасты. Мұны саяси ғылымдар докторы, профессор Гүлмира Сұлтанбаева да қоштап отыр.

– Онлайн олимпиадалардың ерекшелігі – орта мектептердің оқушыларына, ұстаздарына арналған тестілер жүйесінің қолжетімді болуы. Мектеп жасына дейінгі білім, тәрбие орындарының тәрбиешісі, әдіскерлері де осы алаңда өз білімдерін жетілдіру, біліктіліктерін арттыруға мүмкіндік алып отыр. Мұндай алаңдарды мемлекет тарапына қолдау цифрлы Қазақстанның орнығуына және адам капиталы дамуына да үлкен серпін болмақ, – дейді сарапшы.

Заман ағымына сай қашықтан оқытудан қашып құтыла алмайтынымыз анық. Білім жүйесі бірізділікке түсу үшін өзге елдің тәжірибесіне иек артудың еш әбестігі жоқ. Қазір қоғам ғаламтордың құрсауында, бәрі онлайнға көшті. Оқушының үйде отырып-ақ қабілетін арттыруға орасан мүмкіндік бар. Бүгінде ғаламторға ойын іздеп емес, ой көздеп кіруге болады. Сондықтан отандық онлайн олимпиадаларды жетілдіруге тиіспіз. Сонда ғана баршамыз бәйек болған білім саласының жұмысы жеңілдейді. Бұл қажеттілік карантин кезіңде көрініс берді. Тек атүсті қарамай, мәселеге дендеп ене білуіміз шарт.