Әлі де табылмай жатқан адамдар көп. Министрдің айтуынша, төтенше жағдайлар департаментіне жақындарын іздеген адамдар әлі де хабарласып жатқан көрінеді. Түнде жарықтың жоқтығы іздестіру жұмысына кедергі болғаны айтылды. Жойқын екі жарылыс Бейрут теңіз портында болған. Премьер-министр Хасан Диаб апатқа себеп қоймалардың бірінде сақталған 2700 тонна аммиак селитрасы болғанын хабарлады. Бұл химиялық зат тыңайтқыштардың және тау-кен өндірісінде қолданылатын жарылғыш заттардың құрамына қосылады. Бұл затты сақтауға болмайтындығы туралы ескерту қойма басшылығына сонау 2014 жылы жасалған екен. Қазір жағдайдың мән-жайы тексеріліп жатыр. Ел билігі жақын күндері кінәлілер анықталып, жазаға тартылатынын жеткізді. Жарылыс қаланың астан-кестеңін шығарған. Зақымданған ғимараттар арасында Президент резиденциясы мен Премьер-министрдің штаб пәтері де бар. Жалпы 10 шақырым қашықтыққа дейін орналасқан үйлерге әсер еткен. Куәгерлер айналадағы ғимараттардың, үйлердің, көшедегі көліктердің әйнегі шағылғанын айтқан.
Апат орнында өрт сөндірушілер мен құтқарушылар жұмыс істеп жатыр. Сондай-ақ ел билігі 5 тамызды ұлттық аза тұту күні деп жариялады. Ливандағы Қызыл крест ұйымы оқиғадан кейін бірнеше сағат ішінде жарақаттанғандарға шұғыл қан керек екенін айтып, тұрғындарды көмекке шақырды.
Ливанның жоғары қорғаныс кеңесі Бейрутты апатты аймақ деп жариялап, астанада екі аптаға төтенше жағдай енгізуді және қауіпсіздікті қамтамасыз ету үшін жауапкершілікті әскери органдарға беруді ұсынды. Кеңестің теледидардан тікелей эфирде оқыған мәлімдемесінде президент Мишель Аунның төтенше жағдаймен күреске бюджеттен 100 миллиард Ливан фунтын бөлгені белгілі болды. АҚШ геологиялық қызметі жинаған мәліметтерге сенсек, Бейруттағы жарылыстың күшті болғаны соншалықты, ол жер бетінде 3,3 баллдық жер сілкінісіне тең сейсмикалық толқын тудырған.
Қазақстанның Сыртқы істер министрлігі Ливандағы дипломатиялық миссиясының ғимаратына зиян келгенін мәлімдеді. Дипмиссия қызметкерлері жапа шекпеген, консул аздаған жарақат алған. «Қазіргі уақытта Қазақстанның 113 азаматы Ливанда консулдық есепте тұр. Біздің дипломаттар олармен байланыста, қазақстандықтардың арасында зардап шеккендер жоқ. Өздеріңіз білетіндей, дипломатиялық миссия кеңсесіне де зиян тиген болатын, ол алдағы уақытта қалпына келтіріледі. Біздің қызметкерлер мен олардың отбасы мүшелері зардап шеккен жоқ. Өздеріңіз білетіндей, Ливанда БҰҰ бітімгершілік контингенті бар, оның құрамына 120 қазақстандық жауынгер кіреді. Қазір олардың ротация процесі жүріп жатыр және алдыңғы күні біздің қазақстандық бітімгерлер қызмет ететін орындарына аман-есен жетті», деді Мұхтар Тілеуберді.
Бұл жойқын апатқа халықаралық қоғамдастық та бірден назар аударды. Ұлыбритания, Германия, Франция, АҚШ және көршілес басқа елдер басшылары көмек қолын созуға дайын екендерін жеткізді. Елдегі ауруханалар лық толы. Коронавируспен күресіп жатқан дәрігерлер қазір жарылыстан зардап шеккендерге көмек көрсетуге жұмылған. Зардап шеккендер саны артып келеді, қайтыс болғандардың да саны өсуі мүмкін. Әлеуметтік желі қаланың қираған суреттері мен бейнежазбаларына толы. Ел тұрғындары түрлі БАҚ-қа берген сұхбаттарында қаланың қирап қалғанын айтып жатыр. Бұл апат елдегі онсыз да қиын экономикалық жағдайды күрделендіре түскен. Елдегі кедейлік көрсеткіші 50 пайызға өскен, ал бірер ай бұрын ғана жастар саяси билікті жемқорлық жайлағанын айтып қарсылық білдірген еді. Одан бөлек шаһардың ауа сапасына қатысты алаңдаушылықтар да болды. Тұрғындарға үйден шықпай, сыртта маска тағып жүру туралы кеңес берілді. Алайда ауада ешқандай зиянды заттың жоқтығы белгілі болды. Қала губернаторы Марван Аббуд кем дегенде 10 өрт сөндірушінің із-түзсіз жоғалып кеткенін мәлімдеген. Ол бұл көріністің «Хиросима мен Нагасакиді» еске түсіргенін айтып, «бұл – ұлттық апат» деп мәлімдеді. Елдегі жағдайға бүкіл әлем қайғырып, Ливан халқына жылы лебіздерін білдіріп жатыр. Жарты ғасыр бойы дипломатиялық қарым-қатынасы үзілген Израиль де гуманитарлық және медициналық көмек көрсетуге дайын екенін жеткізді.
