Қоғам • 06 Тамыз, 2020

Мақтааралда 115 үйдің құрылысы аяқталды

2103 рет көрсетілді

Биыл мамыр айының басында Өзбекстандағы Сардоба су қоймасында бөгет жарылып Мақтаарал ауданының бірқатар елді мекендерін су басқан болатын. Айдың күннің аманында тілсіз жаудан зардап шеккен ағайынды жергілікті билік былтырғы Арыс оқиғасындағы тәжірибеге сай қауіпсіз орындарға орналас­тырды.

Осылайша, мемлекет үшін ең басты капитал – ел тұрғындарының өміріне қатер төнген жоқ. Ендігісі қираған материалдық байлық-тұғын. Мұны да береке-бірлігі бекем, бойына қайырымдылық ұялаған ел-жұрт көтеріп алып кетті. Мақтааралға ағылған гума­нитарлық көмектің есебінде шек жоқ десек қателеспеспіз. Әліге дейін су тасқынынан зардап шеккен мекенге жәрдем бір сәтке де толастаған емес. Нәтижесінде шекарадағы шалғай ауданға мемлекеттік деңгейде көмек көр­сетіліп, ағайынның басындағы ауырт­палық жеңілдей түсті. 

Қиын-қыстау кезеңде ел Пре­зи­денті Қасым-Жомарт Тоқаев шұғыл шешім қабылдады, облыс әкімі Өмір­зақ Шөкеевке арнайы тапсырма берді. Екі айдың ішінде су шайған ауыл­дар қалпына кел­тірілді. Күні кеше бас­панасыз қал­ған тұрғындар үшін жа­ңадан салынып жатқан шағынауданда 115 үйдің құрылысы толық аяқталды.

Жалпы, аудан көлемінде 386 үй­дің іргетасы қаланып, қабыр­ғасы өрілген. Басым бөлігі­­нің шатыры жабылып, ішкі әр­леу жұмыстары жүргізілуде. Де­мек тұрғындардың қуанышқа кене­летін күні де жақын. Апта басында өңір басшысы Өмірзақ Шөкеевтің төрағалығымен өткен әкімдік лездеменің күн тәр­тібінде де Мақтааралдағы құ­рылыс жұмыстары талқыланды. Түркістан қаласы мен Мақтаарал ауданындағы қызу еңбек туралы облыстық құрылыс басқар­ма­сы­н­ың басшысы Тоқтар Үсіп­әлиев баяндама жасады.

«Түркістан облысы бойынша құрылыс жұмыстарына 9 мыңнан астам, ал Түркістан қала­сындағы құ­ры­лыс нау­қанына 4 мыңнан астам адам жұмылдырылған. Бар­лық құрылыс нысанында елдегі ка­рантин талаптары қатаң сақ­талуда. Жұмысшылар тиісті сақтық шараларын қатаң ұс­танып, жұмыс істеуде. Түркістан қаласында құрылысы тоқ­таған нысандар жоқ», деді ол.

Басқарма басшысы сондай-ақ Мақ­таарал ауданындағы құрылыс алаң­ында 29 мердігер мекеме мен 1400 жұмысшы, 87 арнайы техника құ­рылыс-монтаж жұмыстарына тар­тылғанын айтып өтті.

Аудандағы су шайған Жеңіс, Достық, Жаңатұрмыс елді ме­кендері үшін 70 гектар жер­де жаңадан бой көтер­ген Мыр­закенттегі жаңа шағын аудан­да 1200 орындық мектеп пен 280 орындық бала­бақша және дәрігерлік амбулатория мен полиция учас­кесінің құрылысы жүргі­зіліп жатқанын тілге тиек етті. Мұнымен қатар, Фирдоуси ауылы­­нан дәрі­герлік амбулато­рия мен полиция бекеті, Өргебас ауы­лынан фельдшерлік-акушер­лік пункт пен полиция бекеті салынып жатқанына тоқталды.

Апат салдарынан қолын­дағы төрт түлігінен айырыл­ған ағайынға да тиісті көмек көрсетілмек. Орын алған төтен­ше жағдай кезінде үй жануарларынан айрылған азаматтар­ға мал шығыны толығымен төлене­ді. Топан су басқанда жалпы аудандағы 22 отбасы 144 бас малынан ажырап, шығындан­ған болатын. Бүгінде «Түркі­стан» корпоративтік әлеуметтік қоры арқылы түйеге 300 мың теңгеден 1,5 млн теңгеге дейін, жылқыға 160 мыңнан 380 мың теңгеге, сиырға 110 мыңнан 220 мың теңгеге, ұсақ малға 25 мыңнан 45 мың теңгеге, үй құсына 2 мың теңгеге дейін өтемақы берілген.

Жалпы, тасқын судан зардап шеккен ауылдарды қоқыстан тазарту кезінде 930-дан астам мал өлексесі шығарылды. Оның ішінде 40 ірі қара, 876 ұсақ мал, 9 жылқы, 6 түйе өлексесі бар. Анықтау жұмыстары барысында төрт түліктің басым бөлігі Өзбекстан Республикасынан топан сумен ағып келгені белгілі болған. Облыстық ауыл шаруашы­лы­ғы басқармасы, Мақтаарал аудандық аумақтық инспекциясы және аудандық «Ветеринарлық қызметі» КММ-нің өкілдерінен арнайы комиссия құрылып, жоғалған үй жануарларын түгендеу және мал өлекселерін жою жұмыстары жүргізілді. Төтенше жағдай­дан зардап шеккен елді мекендер толы­ғымен дезинфекцияланды.

Қазіргі таңда Мақтаарал ауданын­дағы жаңа шағын аудан­да 386 үй мен бірқатар әлеу­мет­тік нысан бой көтерген. Со­лар­дың ішінде тұрғындардың демалуына, серуендеуіне арнал­ған желілік саябақ пен гүл­зар­лар салынуда. Демалыс аймақ­тарында қазіргі сәтте абаттандыру жұмыс­тарымен қатар вело­жол төселініп, суағарлар орна­тылған. Айналасы жасыл желекпен көмкеріліп, тұрғындар үшін барлық жағдай жасалуда.

Өткен аптада Жаңажол ауыл­дық округіне қарасты Өргебас және Фирдоуси ауыл­дарын қалпына келтіру жұмыстарын тексерген Өмірзақ Естайұлы жауапты басқарма басшылары мен құрылыс компаниясы өкілдеріне бірқатар тапсырма жүктеді. Әрі тасқын судан зардап шеккен Мақтаарал ауданындағы елді мекендерді қалпына келтіру жұмыстары жіті бақылауда екенін жеткізді.

«Әр нысан сапалы тұрғы­зылып, аудан тұрғын­дарына уақтылы тапсырылуы қажет», деді облыс әкімі.

Естеріңізге салар болсақ, жалпы, Өргебас ауылындағы барлық 194 үй бұзылып, жаңадан салынып жатыр. Бүгінде 116 үйдің қабырғасы қаланған. 49 үйдің шатыры жабылуда. Ал Фирдоуси елді мекенінде жалпы 303 үйдің басым бөлігінің қабырғасы қаланған. 38 үйдің шатыры жабылған.

 

Түркістан облысы,

Мақтаарал ауданы

Соңғы жаңалықтар

Ұқсас жаңалықтар