Қазақстан • 09 Тамыз, 2020

Алтын астық қамбаға құйыла бастады

41 рет көрсетілді

Бұдан бұрын хабарлағанымыздай Солтүстіктің кейбір шаруашылықтары ерте піскен астыққа орақ түсіріп үлгерген. Қазір кең даланың төсінде астық кемелері күндіз-түні жүйткіп жүр, деп жазады Egemen.kz

Жақсыбай САМРАТ

Алайда кейбір аудандардың шаруашылықтары алтын астыққа орақ түсіруге асықпай, технологиялық мерзімді қатаң сақтап, оруға тек жақын күндерде кіріспекші. Соның ішінде Айыртау ауданының дихандары да бар. Аудан әкімі Дархан Әмриннің айтуына қарағанда: "Биыл аудан 370 мың гектар жерге астық еккен. Барлық технологиялық талаптарды дихандар орындауға тырысты. Соның ішінде 10 мың тонна минералдық тыңайтқыштар себілді. Арамшөпті құртуда химиялық құралдар уақтылы қолданылды. Соның арқасында астық та бітік шықты. Астық оруға жаппай кірісуді 10-15 тамыз аралығында жоспарлаған едік, алайда бүгінгі күннің өзінде астықтары пісіп үлгерген 5-6 шаруашылық үлкен ораққа кірісіп кетті. Біз биыл техникалық паркты жаңартуға да үлкен назар аудардық. Шаруалар биыл 2,4 млрд теңгеге 170 бірлік түрлі техникалар сатып алды", дейді ол.

Сонымен бірге биыл айыртаулық дихандар өз жұмыскерлерінің еңбекақысын 30 пайызға дейін арттыруды көздеп отырған көрінеді. Биылғы астықтың шығымдылығы жоғары. Мәселен, ораққа кірісіп кеткен "Саумалкөл АГРО" ЖШС дихандары бүгінгі күннің өзінде арпаның гектарынан 22 центнерден алып жатқан көрінеді. Былтырғы шығымдылық бұдан екі есе төмен болған.

Еліміздің ең басты байлығы – алтын астық қырманға аман түсіп, қоймадағы қорларымызды толтырса ешкімнің мұртын балта шаппайды. Қазір жалғыз Қызылжар өңірі ғана емес, барша қазақстандықтар осы тілекте екені анық.

Күннің маңызды және өзекті жаңалықтарын «Егемен Қазақстан» телеграм каналынан оқыңыз