«Интер» мен «Байер» арасындағы матчта 3 гол соғылды. Ойынның 15-минутында Николо Барилла («Интер») қақпаның төменгі бұрышына соққы жасап есеп ашса, арағы 6 минут салып Ромелу Лукаку жақын қашықтан қақпаға допты дәл бағыттап, есепті 2:0-ге жеткізді. Осыдан кейін ғана естерін жинаған леверкузендіктер араға 3 минут салып есепті қысқартты. Кевин Фолландтың алыстан берген пасын кәдеге жаратқан Кай Хаверц Ханданович қорғаған қақпаның кілтін тапты. Есеп – 2:1. Екінші таймда қос ұжым гол соғуға қанша тырысқанымен ойын соңына дейін есеп өзгерген жоқ. «Интер» – жартылай финалда!
Естеріңізге сала кетейік, Еуропа лигасының 1/8 финалында «Интер» ойыншылары «Хетафе» командасын 2:0 есебімен жеңсе, «Байер» екі ойын нәтижесінде – «Рейнджерстен» (3:1, 1:0) басым түсті. Жартылай финалға жолдама алған «Интер» енді «Шахтер» мен «Базель» арасындағы жеңімпаз командамен кездеседі.Пандемияға байланысты барлық ойын Германия қалаларында жанкүйерлерсіз өтуде. Жеңімпаз тек бір ғана кездесуден анықталады.
Негізгі құрам:
«Интер»: Ханданович, Годин, де Врей, Бастони (Шкриниар), Д’Амброзио (Мозес), Барелла, Брозович, Гальярдини (Эриксон), Янг, Лукаку, Мартинес (Санчес).
«Байер»: Градецки, Свен Бендер (Бельараби), Синкгравен (Венделл), Тапсоба, Ларс Бендер, Демирбай, Баумгартлингер (Амири), Паласиос (Бэйли), Хаверц, Диаби, Фолланд.
Бас төреші: Карлос Дель Серро (Испания)
Стадион: «Меркур Шпиль-Арена» Дюссельдорф (Германия)
