Мәдениет және ақпарат министрлігі жыл сайын түрлі фестивальдер мен байқаулар ұйымдастырады. Сахналарда салтанат құрып жататын сан алуан өнер жанрларын қамтитын осындай байқаулардың бірегейі – Бақытжан Байқадамов атындағы республикалық конкурсы мәреге жетті.
Мәдениет және ақпарат министрлігі жыл сайын түрлі фестивальдер мен байқаулар ұйымдастырады. Сахналарда салтанат құрып жататын сан алуан өнер жанрларын қамтитын осындай байқаулардың бірегейі – Бақытжан Байқадамов атындағы республикалық конкурсы мәреге жетті.
Алматы қаласында Жамбыл атындағы Қазақ мемлекеттік филармониясында өткен екі күндік байқауда республикамыздың әр шалғайынан іріктелген кәсіби хор ұжымдары мен оқу орындарының хор ұжымдары шеберліктерін сарапқа салды.
Бір жағы елдегі хор өнерінің орындаушылық деңгейін шыңдай отырып, көрнекті қазақ композиторы, Қазақстандағы кәсіби музыка өнерінің негізін қалаушылардың бірі, ҚазКСР еңбек сіңірген өнер қайраткері Б.Байқадамовтың шығармашылығын кеңінен насихаттайтын байқаудың биылғы басты жүлдесіне Оңтүстік Қазақстан облыстық опера және балет театры лайық деп табылды. Бірінші орын үшін сегіз кәсіби ұжым бәсекеге түсті. Қатысушылар хорға өңделген қазақтың халық әндерін, шетел композиторларының хорға арналған шығармалары мен Б.Байқадамовтың хорға арналған шығармаларын «а капелло» түрінде орындады.
Сол сияқты, екінші орыннан табылған Иса Байзақов атындағы Павлодар облыстық филармониясының камералық хоры да тыңдармандардың ықыласына бөленді. «Оқу орындарының хор ұжымдары» категориясы бойынша бірінші орын Құрманғазы атындағы Қазақ ұлттық консерваториясының аралас хоры және П.Чайковский атындағы Алматы музыкалық колледжінің «Алатау» жастар хорына берілді. Орта білім беретін оқу орындарының ішінен Н.Тілендиев атындағы Кіші өнер академиясының «Еркем-ай» хор ұжымы топ жарды.
Базарғали Жаманбаев төрағалық еткен қазылар алқасының құрамында Б.Байқадамовтың қызы Балдырған Байқадамова да болды.
Салтанатты марапаттау сәті кезінде өнер саңлағының үш бірдей қызы – Алуа, Айгүл және Балдырған Байқадамовалар сахнаға шығып, байқауды ұйымдастырушылар мен қатысушыларға шынайы алғыстарын білдірді.
– Хор ұжымдарының байқауын өткізу оңай емес. Мұндай өнер ұжымдарында 20-дан бастап 80 әншіге дейін болады. Ал соңғы жылдары Мәдениет және ақпарат министрлігі кәсіби деңгейі жоғары, ұйымдастырылуы күрделі шараларға мұрындық болып, ұрпағымызды эстетикалық және патриоттық рухта тәрбиелеуге өлшеусіз үлес қосып келеді. Қазақ өнерінің өрлеуіне өлшеусіз еңбек сіңірген әкеміздің атын өшірмеген Байқадамов байқауы өз үздіктерін әрі қарай да анықтап, хор жанрының даңқын асыра берсін, – деді композитордың ұрпақтары.
Айнаш ЕСАЛИ,
«Егемен Қазақстан».
АЛМАТЫ.
––––––––––––
Суретте: Балдырған, Айгүл, Алуа Байқадамовалар.
