Қоғам • 20 Тамыз, 2020

Ерлан Саиров: Жақтастар лигасы праймериздің ашық және әділ өтуіне қоғамдық бақылау жасайды

"Nur Otan" партиясы Жақтастарының лигасы партия Төрағасының бірінші орынбасары Бауыржан Байбекпен болған кездесуде праймериз мүмкіндіктерін талқылады. Кездесу барысында тәуелсіз бірлестіктердің, оның ішінде өңірлерден келген 50-ден астам өкіл сұрақтарын қойып, "Nur Otan" партиясының праймеризін ұйымдастыру бойынша ұсыныстарын да ортаға салды, - деп хабарлайды Egemen.kz.

Marzhan Tileubekova

Еуразиялық интеграция институтының басшысы Ерлан Саировтың айтуынша, бүгінде бүкіл әлемде адамдардың түрлі саяси институттарға деген сенімі төмендеп кеткен. "Nur Otan" жаңа және белсенді адамдарға арналған партиялық "әлеуметтік лифттің" нақты тетігін іске қосу арқылы өзінің халықтық партия екенін көрсетіп отыр.

"Қазір – өзгерістер заманы. Дүниежүзіндегі, оның ішінде Америка құрама штаттарындағы, Еуропадағы, өзімізбен көршілес Белоруссиядағы жағдайды барлығымыз көріп отырмыз. Ол бізге де әсер етеді. Бұл бізге де өзгерістерді тезірек жасау керектігін сездіреді. Сондықтан менің ойымша, қазіргі кезде патриот азаматтар мен ең басты саяси күштердің барлығы еліміздегі процестердің эволюциялық тұрғыда дамуына өз үлестерін қосқысы келеді. Қазақтың өте жақсы бір мақалы бар, "Сел өтеді, тас қалады" дейді. Саяси процестер өтеді бірақ біздің мемлекетіміз қалуы керек. Қазақтың бір-ақ құндылығы бар, ол – қазақтың мемлекеті. Менің ойымша, саясатқа келген азаматтардың барлығы ең бірінші осыны есте ұстауы керек. "Nur Otan" праймеризі – бұл жалпы елдің саяси жүйесін өзгертудегі маңызды қадам екеніне сенімді болғандықтан да, біз бірігуді жөн көрдік. Партияның Жақтастар лигасы праймериздің ашық және әділ өтуіне қоғамдық бақылау жасайды. Бүкіл ел оң өзгерістерге мүдделі", – дейді ол.

Іс-шараға барлық өңірлерден 50-ден астам тәуелсіз бірлестіктердің өкілдері қатысты, олардың арасында Ерлан Саиров, Бағдат Қожахметов, Әлия Садырбаева, Марат Шибутов, Марал Ерғазина, Ильмар Хусаинов бар.

Естеріңізге сала кетейік, кандидаттарды ұсыну және тіркеу 17 тамызда басталды және ол 28 тамызға дейін жалғасады. Үгіт-насихатқа дайындалу үшін кандидаттарға 31 тамыздан 6 қыркүйекке дейін 7 күн бөлінеді. 7 қыркүйек пен 3 қазан аралығында кандидаттардың үгіт-насихат жұмыстары, соның ішінде 14-30 қыркүйек аралығында көпшілікке жария дебаттар өтеді. Дебаттар "Праймериз" арнайы ақпараттық жүйесі арқылы партияның ресми аккаунттарында көрсетіледі.

Толық ақпаратты https://primaries.kz/ сайтынан білуге болады.

Қазақстандағы және әлемдегі соңғы жаңалықтарды бірінші болып оқу үшін Telegram желісінде бізге жазылыңыз.