Қазіргі қазақ руханиятының қабырғалы өкілі, есімі елге әйгілі кино және театр режиссері, Қалибек Қуанышбаев атындағы академиялық драмтеатрдың көркемдік жетекшісі Талғат Теменов Мемлекетаралық «Достастық жұлдыздары» сыйлығының лауреаты атаныпты.
ТМД елдерінің Гуманитарлық ынтымақтастық кеңесі тарапынан тағайындалған бұл мәртебелі марапат ғылым және білім, мәдениет пен өнер саласында өнімді еңбек етіп, толайым табыстарға қол жеткізген айтулы тұлғаларға беріледі.
«Мосфильм», «Қазақфильм» киностудияларында көпшілік көзайымына айналған көркем фильмдер түсіріп, республика театрларының сахнасында сүбелі спектакльдер қойған саңлақ режиссеріміздің кезекті қуанышқа кенелуі шынымен сүйсінерлік жағдай. Сондықтан осынау оқиғаға орай көрнекті өнер қайраткеріне құтты болсын айта отырып, көрермендерін алдағы уақыттарда да көңіл көншітер көркемдік әлеміне жетелей беруіне тілектестік білдіреміз.
