"Nur Otan" праймеризін өткізу кезінде санитарлық-эпидемиологиялық талаптар сақталады

Қоғам • 25 Тамыз, 2020

"Nur Otan" праймеризін өткізу кезінде санитарлық-эпидемиялық талаптар сақталады

27 рет көрсетілді

"Nur Otan" праймеризін өткізу кезіндегі арнайы санитарлық-эпидемиялық талаптар Бас мемлекеттік санитарлық дәрігер А.Есмағамбетовамен бірге бекітілді. Бұл туралы Nur Otan партиясы Төрағасының бірінші орынбасары Бауыржан Байбек өзінің Facebook парақшасында жазды, деп хабарлайды Egemen.kz.

Marzhan Tileubekova

"Партия Лидері Нұрсұлтан Назарбаевтың тапсырмасы бойынша республикалық партияішілік іріктеу – праймериз өткізіп жатқанымызды жақсы білесіздер. Бүгінгі күні оған қатысуға 7670 азамат өтініш берді. Олардың 34% - әйелдер, 24,1% - 35 жасқа дейінгі жастар. Бастауыш партия ұйымдары 2631 адамды ұсынса, ал 5039 кандидат – өзін-өзі ұсынғандар. Тіркеу осы аптаның соңына дейін жалғасады. 7 қыркүйектен бастап үміткерлердің үгіт жұмысы басталады, оның ішінде жария пікірсайыстар – 14-30 қыркүйек аралығында болады", - деп жазды Бауыржан Байбек.

Бұдан соң, ол праймериз кезінде санитарлық-эпидемиологиялық талаптардың қалай сақталатындығы жайында сөз етті.

"Қазіргі эпидемиологиялық ахуал белгілі бір шектеулер тудырып, праймериз өткізу үшін тиісті жағдай жасауды талап етуде. Бәріміз үшін ең алдымен азаматтарымыздың денсаулығы мен амандығы маңызды. Осыған байланысты бас мемлекеттік санитарлық дәрігер Айжан Есмағамбетовамен бірлесіп Праймериз өткізу кезінде арнайы санитарлық-эпидемиялық талаптар енгізу туралы қаулы қабылдадық. Оны барлық ұйымдастыру комитеттері, кандидаттар және дауыс берушілер басшылыққа алуы тиіс. Сонымен, партияішілік іріктеуге қатысушылар маскаларды, қолғаптарды, зарарсыздандыру құралдарын пайдалануға, кемінде 2 метр әлеуметтік аралықты сақтауға, қол алысып амандаспауға және басқа да сақтық шараларын ұстануға міндетті. Барлық іске қосылған үй-жайларда санитайзерлердің, байланыссыз термометрлердің қажетті мөлшері қамтамасыз етіледі, зарарсыздандырғыш құралдар пайдаланыла отырып, тұрақты түрде ылғалды тазалау жүргізіледі және кемінде тәулігіне 2 рет желдетіледі", - деп жазды ол.

Сондай-ақ жазбада үгіт барысында флаерлар мен буклеттерді тек маска тағып, қолғап киіп қана тарату қажет екені айтылған.

"Кандидаттардың партия мүшелерімен кездесулері әлеуметтік желілерде бейнеконференция арқылы, ашық алаңдарда немесе желдетілетін үй-жайларда қатысушылар арасындағы қашықтықты сақтап, маска таға отырып, өтуі мүмкін. Кандидаттардың жария дебаттары 1224 объектіде онлайн-форматта және әлеуметтік аралықты сақтай отырып өткізілуі тиіс. 2545 дауыс беру учаскесінде кабиналар мен урналар, сондай-ақ бюллетеньдерді беру орындары бір бірінен кемінде екі метр арақашықтықта болуы тиіс. Жалпы, біз енгізген "Праймериз" ақпараттық жүйесі партияішілік іріктеудің барлық кезеңін өткізуге мүмкіндік береді, оның ішінде тіркеуді, үгітті және дауыс беруді онлайн режимді өткізуге болады. Жүйе қолдануға жеңіл, сайлаушының "таңдау құпиясын", сондай-ақ сырттан араласудан қорғауды қамтамасыз етеді. Сондықтан іс-шаралардың басым бөлігін біз осы мүмкіндіктерді пайдалана отырып өткізуге тырысамыз", делінген жазбада.

Қазақстандағы және әлемдегі соңғы жаңалықтарды бірінші болып оқу үшін Telegram желісінде бізге жазылыңыз.

Күннің маңызды және өзекті жаңалықтарын «Егемен Қазақстан» телеграм каналынан оқыңыз