Мемлекеттік басқарудың тиімсіздігі мен мемлекеттік қызметтің тартымды болмауы тежеуіш факторлар.
Жолдауда үлкен өзгерістер жөнінде айтылды. Бірден 4 құрылымның жасақталатыны мәлім болды. Ең алдымен шешімдері талқыға салынбайтын Реформалар жөніндегі президенттік кеңес құрылатыны хабарланды. Аталған құрылым қазір жұмысы біраз баяулаған Үкіметке қарасты Экономикалық саяси кеңестің орнын басады деп күтілуде. Зейнетақы жүйесі, әлеуметтік саясатқа қатысты реформалар Мемлекет басшысының деңгейінде талқыланып, шешілуі тиіс. Бүгінде осындай нақты шешім қабылдайтын құрылым жетіспей жатыр еді.
Одан кейін Стратегиялық жоспарлау және реформалар, Бәсекелестікті қорғау және дамыту агенттіктерінің жасақталатыны жөнінде айтылды. Ұлттық экономика министрлігінің міндетінде болған бұл функциялар Президент Әкімшілігіне тапсырылды. Ендігі кезекте Президент Әкімшілігі тапсырма беріп, оны бақылауына алады, Үкімет орындаған жұмыстың тиімділігін саралайды. Бұған дейін мемлекеттік қызметкерлер өздері тапсырма орындап, өздері бақылайтын. Шындап келгенде сол себепке байланысты қанағаттандырарлық нәтижеге қол жетпейтін.
Тағы бір қуантарлық жайт, Төтенше жағдайлар министрлігінің құрылуы. Жуырда өзім де өртпен бетпе-бет келдім. Төтенше жағдай қызметі қаржыландыруды қажет етеді. Өйткені табиғи апаттың саны кеми қоймайды.
Рахым ОШАҚБАЕВ,
Ұлттық қоғамдық сенім кеңесінің мүшесі, «Талап» қолданбалы зерттеулер орталығының директоры
