Таяуда үш теннисшіге Қостанайдағы «Юбилейный» шағын ауданынан бір бөлмелі пәтердің кілттері табыс етілді. «Қоғамдық келісім» үйінде өткен салтанатты шараға денешынықтыру және спорт басқармасының басшысы Азамат Бегалин қатысып, паралимпиадашылардың аймақ спортының дамуына үлкен үлес қосқанын атап өтті.
Теннисшілердің бапкері Серік Данияров облыс әкімінің алғыс хатын алды. Бапкер 20 жылдан бері Қостанайдағы есту қабілеті нашар балаларға арналған мектеп-интернаттың өрендерін спортқа баулып келеді.
– Есту қабілеті төмен спортшыларға арналған сурдлимпиада ойындары тұңғыш рет 1924 жылы Париж қаласында өтті. Өзі 4 жылда бір рет ұйымдастырылады. Оған 100-ге жуық мемлекеттің спортшылары қатысады. Түркияда өткен дүбірлі додада шәкірттерімнің бағы жанып, қола жүлдеге табан тіреді. Енді, міне, бүгін тағы қуанышқа кенеліп жатырмыз. Үш спортшымыз да баспаналы болды. Қаланың ең жаңа шағын ауданынан пәтер беріп жатқан облыс басшыларына алғысымыз шексіз. Бұл құрметке шәкірттерім де әбден лайық деп ойлаймын. Үшеуі де қарапайым, еңбекқор жігіттер. Мысалы, Данияр Ескендіров кішкентай кезінен осы есту қабілеті нашар балаларға арналған мектеп-интернатта оқыды. Қазір осы мектепте аула сыпырушы болып жұмыс істеп жүр. Әлемдік жарыстарда ел байрағын желбіретіп жүлделі орындардан көрініп жүрсе де, қол еңбегін қораш санаған емес, – деді білікті бапкер.
Үш спортшыны облыс әкімі Архимед Мұхамбетов әлеуметтік желі арқылы құттықтады.
«Спортшыларымызды жаңа баспанамен құттықтаймын! Жаңа пәтерлерде жайлылық, жылулық және спорттық жетістіктер тілеймін!», деп жазды облыс басшысы «Инстаграм» парақшасында.
Самсун сурдлимпиадасына есту қабілеті нашар үш мыңға жуық спортшы қатысты. Ал Қазақстаннан 9 спорт түрі бойынша 50-ге жуық спортшы барған. Олар еркін және грек-рим күресі, самбо, жеңіл атлетика, жүзу, таэквондо, үстел теннисі бойынша сынға түсіп, отандық сурдспорт тарихындағы ең үздік көрсеткішке қол жеткізген.
Қостанай облысы
