Атыраудағы бірден-бір шағын қала – Құлсары. Ол Үкіметтің шағын қалаларды дамыту бағдарламасына еніп отыр. Соған орай Құлсарыны кешенді дамыту жоспары жасақталып, іске асырыла бастады. Бұл құлсарылық тұрғындар көңіліне серпіліс туғызғаны рас. Алайда, Құлсары қаласын кешенді дамыту жоспарын жасақтау кезінде ескерілмеген бір мәселе бар.
Атыраудағы бірден-бір шағын қала – Құлсары. Ол Үкіметтің шағын қалаларды дамыту бағдарламасына еніп отыр. Соған орай Құлсарыны кешенді дамыту жоспары жасақталып, іске асырыла бастады. Бұл құлсарылық тұрғындар көңіліне серпіліс туғызғаны рас. Алайда, Құлсары қаласын кешенді дамыту жоспарын жасақтау кезінде ескерілмеген бір мәселе бар.
Ол – теміржол вокзалын және маңында орналасқан шағын аудандардағы тұрғын үйлерді заман талабына сай жаңғырту. Қазіргі таңда теміржол вокзалына таяу «Вокзал маңы» және «СМП-615» шағын аудандарында 4500 тұрғын бар. Осы маңдағы №13 орта мектепте 952 оқушы білім алуда. Шағын аудандардағы екі қабатты 19 тұрғын үйге жеке жылу қазандықтары орнатылыпты. Аталған тұрғын үйлер 1950 жылдың басында бой көтергеннен бері ешқандай күрделі жөндеу жұмыстары жүргізілмепті. Дәл қазір жарты ғасыр бұрын салынған осы үйлердің сыртқы сылақтары үгітіле түсіп, қала көркін кетіріп тұр.
Біздің бүгінгі айтпағымыз әрине, тек бұл емес. Ең негізгі мәселе Құлсары қаласындағы теміржол вокзалының ахуалы туралы сөз етпекпіз. Өйткені, қай қала болса да оның басты қақпасының бірі – теміржол вокзалы. 
Алайда, 1960 жылы пайдалануға берілген 50 орындық теміржол вокзалын Құлсары қаласының лайықты қақпасы дей алмаймыз. Мұны Құлсары қаласының әкімі Шәкір Кейкин де, Жылыой ауданының әкімі Мақсым Ізбасов та қуаттайды. Бірнеше жыл бұрын «ЯикТрейдинг» ЖШС-нің сенімгерлігіне берілген вокзалдың сыртқы келбеті ешқандай сын көтермейді. «Жыл сайынғы жүргізілуге тиісті ағымдық жөндеу жұмыстары аталған мекеме тарапынан жүргізілген емес. Мекеме басшысы қала, аудан басшыларының шақыртуларына түрліше дәлелдер айтып, келмейді. Өзінің орнына қолында ешқандай дерегі жоқ, материалдық мәселелерді шешуге құзыры жоқ менеджерін жібереді. Вокзал маңындағы жалпыға арнап пайдаланатын дәретханаға 2007 жылдан бермен қарай терең тазалау жұмыстары жүргізілмеген. Антисанитариялық жағдайда, түрлі инфекциялық ауру таралуы мүмкін. Объектіні жалға алу келісімшартында ғимаратқа күтіп-ұстау жұмыстарын жүргізуді «ЯикТрейдинг» ЖШС міндетіне алған», дейді Құлсары қаласының әкімі Шәкір Кейкин.
Вокзал перронындағы қоршаулар да жөндеуді қажет етіп отыр. Өйткені, қоршау бағандарының көріктіргіші үгітіліп, жолаушы өміріне қауіп туғызатынына ұсақ-түйек мәселе деп қарамау керек. Әсіресе, түнгі мезгілде вокзал маңы жарықпен толықтай қамтылмаған. Мұның бәрін неге жіпке тізгендей айтып отырмыз? Себебі, Құлсары қаласы арқылы Өзбекстан мен Тәжікстан елдерінің Ресейге бағыт алған жолаушы пойыздары өтеді. Алматы мен Астанадан, Ақтөбе мен Атыраудан Маңғыстауға қатынайтын жолаушылар пойыздары және бар. Өз еліміздің жолаушылары Құлсарыдағы теміржол вокзалының көңілге кірбің түсірер кейпіне, тарлығына түсіністікпен қарар, ал көршілес елдердің жолаушылары не ойлар еді?
Сөз арасында айта кетейік, Атыраудан Ақтөбеге қатынайтын теміржол бойында Қарабатан деген шағын елді мекен бар. Мұнда тұрғындар саны аз, бірақ теміржол вокзалы көздің жауын алардай жұтынып тұр. Қарабатандағы вокзалға «Аджип ҚКО» компаниясының қаржысымен күрделі жөндеу жасалып, дәл қазір мұнайлы өңірдегі ең әсем вокзалдардың біріне айналды. Әрине, Қарабатанға әдемі вокзалды қызғанбаймыз. Дегенмен, өзіміз көріп жүргендей, жолаушылар пойызымен Қарабатан елді мекеніне түсетін де, одан пойызға мінетін де жолаушы жоққа тән. Тіпті, Қарабатанға тоқтайтын жолаушы пойызы өте аз. Ал Құлсарының Қарабатаннан артықшылығы көп. Алдымен, Құлсары қазақ мұнайының алғашқы тамшысы алынған Жылыой ауданының орталығы болса, екіншіден, дәл бүгін 54 мың тұрғыны бар шағын қала деген мәртебесін иеленген үлкен шаһар.
Үшіншіден, Құлсары қаласына еліміздің төрт қаласынан майлы түбек атанған Маңғыстауға, сонымен бірге, Өзбекстан мен Тәжікстаннан Ресеймен байланыстыратын халықаралық 6 пойызды қоса есептесек, кем дегенде 10 жолаушы пойызы тоқтайды екен. Басқаша айтқанда, Құлсары арқылы өтетін жолаушылар пойызының бәрі де мұнда аялдайды. Соған орай пойызға мініп-түсіп жататын жолаушылар тасқыны әсте үзілген емес. Демек, Құлсары қаласындағы 50 орындық теміржол вокзалы жолаушылар үшін тарлық етіп тұрғанын алдымен, «Қазақстан темір жолы» АҚ басшылары ескеруі қажет-ақ.
Алайда, әзірге Құлсарыдағы теміржол вокзалының жолаушылар тасқынына лайықты емесі тек Жылыой ауданының басшылығын да алаңдатып отыр. Аудан әкімі Мақсым Ізбасов тиісті орындарға «Вокзалдың тарлығы Құлсары қаласының халқы мен келушілеріне сапалы қызмет көрсетуге мүмкіндік бермей отыр. Мәселені шешу үшін соңғы үлгідегі демалыс, сервистік қызмет көрсету бөлмелерімен толық жабдықталған 400 орындық вокзал ғимараты қажет» деп, қатынас хат жолдағанмен мәселе жуық арада оң шешімін табады деу қиын. Мұның басты себебі Құлсарыдағы теміржол вокзалының «Қазақстан темір жолы» АҚ балансында еместігіне тіреле береді. Бұл туралы газет тілшісіне Атырау тасымалдау бөлімшесінің директоры, Жылыой ауданынан облыстық мәслихаттың депутаттығына сайланған Бөріхан Беркімбаев айтып берді. Депутат демекші, Атырау облыстық мәслихатында Құлсары қаласы орталығы болып саналатын Жылыой ауданынан төрт депутат сайланған. Бәрі де осал емес, басшылық қызмет атқарып жүргендер, тіпті облыстық мәслихат хатшысы Сағындық Лұқпанов та осы аудан сайлаушыларының аманатын арқалап отыр.
Қорыта айтқанда, қазір шүкір, еліміздің экономикалық қуаты артты. Халықтың талғамы басқаша, жасампаздыққа ұмтылып, өзге елдің алдында қазақтың абыройы аспандап тұрғанын қалайды. Демек, шағын қалаларды дамыту бағдарламасы шеңберінде Құлсарыдағы теміржол вокзалын жаңғырту кезек күттірмейтін елдік мәселе екенін Үкіметтің, «Қазақстан темір жолы» акционерлік қоғамы мен облыс басшылығының назарына салуды жөн көрдік. Бұл мәселеге облыстық мәслихаттың, Парламент Сенаты мен Мәжілісінің депутаттары көңіл аударғанын қалар едік. Әсіресе, Сенат депутаты Сәрсенбай Еңсегенов пен Мәжіліс депутаты Асхат Бекенов Құлсары вокзалының бүгінгі талапқа сай еместігімен кеңірек танысса дейміз. Олай дейтініміз, осы екі азаматтың кезінде Жылыой ауданының әкімі қызметін абыройлы атқарғанын білеміз. Сондықтан Құлсары қаласына жаңа теміржол вокзалының қажеттігі қай тараптан да ескерусіз қалмайды деп сенгіміз келеді.
Жолдасбек ШӨПЕҒҰЛ,
«Егемен Қазақстан».
Атырау облысы,
Жылыой ауданы.
