Елбасы • 10 Қыркүйек, 2020

Елбасы резиденциясының есігі ашық

37 рет көрсетілді

Қазақстан Республикасының Тұңғыш Президенті – Елбасы Н. Назарбаевтың бірінші резиденциясы ғимаратында орналасқан Елбасы кітапханасы 3 қыр­күйектен бастап келушілерге есі­гін ашты. Мұнда тақырыптық экс­курсиялар 10 адамнан аспайтын топ­тарға алдын ала жазылу арқылы тегін көрсетіледі. Яғни кітапхана карантин кезінде қалыптасқан талаптарды сақтай отырып, көпшілікпен байланыстың жаңа форматына көшті.

«Төтенше жағдай кезінде де Елбасы кітапханасы өз жұмысын тоқтатқан жоқ. Барлық іс-шаралар виртуалды түрде атқа­рылды. Атап айтқанда, Қазақстан Респуб­ликасының Мемлекеттік рәміздер және Халықаралық мұражайлар күнін, сон­дай-ақ Халықаралық ядролық сынақтарға қар­сылық шарасы, Қазақстандағы Прези­денттік институттың 30 жылдығы, т.б. қатарлы айтулы оқиғаларды атап өттік. Бұның бар­лы­ғы кітапхананың ресми сайтындағы «Бейне галерея» арқылы көпшілікке таныстырылды. Бейнекөрмелер әртүрлі форматта өткізіледі: тақырыптық экспозициялардың бейнетурлар; бейнероликтер; презентация түрінде дәстүрлі электронды формат және алғаш рет «бір жәдігер» идеясы іске асты», дейді Елбасы кітапханасының директоры, саяси ғылымдарының докторы, профессор Әмірхан Рахымжанов мырза.

Сонымен қатар Қазақстан халқы Ассамб­­леясының 25 жылдығына арналған «Ұлт­тар мәдениетін ұлықтаған мекен», Ұлы Жеңістің 75 жылдығына арналған «Қазақ­стан жауынгерлері Сталинград түбіндегі шай­қаста» атты көрмелер көпшілік­ке ұсынылып, күміс бұйымдар топтастырыл­ған «Күмістің мәңгілік сәулесі» және «Пішін мен суреттің үн­дес­тігі» атты табақтар топ­та­ма­­сының көр­месі де сәтті көрсетіліп, «Болашақ санасы», «Қазақ­стандағы олимпиа­да қозғалысы» т.б. бей­не­көрмелер де көптің көңілінен шығыпты.

Бұлардан басқа Елбасы Н.Назарбаевтың идеялары мен бастамаларына негізделген «Н.Назарбаев – Еуразиялық интеграцияның сәулетшіcі», «Елбасының асқақ арманы», сондай-ақ Тұңғыш Президенттің қоғам­­дық наградалар жинағының көрмесі, кітап­­ханасының көшпелі кешен көрме жобасы­ның материалдары бойынша «Н.Назарбаев: дәуір, тұлға, қоғам» атты көрме ұйым­дас­тырылыпты.

Биыл ел көлемінде атап өткен Абай Құнанбайұлының 175 жылдығына орай кітапханада «Абай мұрасы – тәрбиенің қайнар көзі» бейнекөрмесі дайындалып, Ядролық сынақтарға қарсы күрестің халық­аралық күніне орай «Н.Назарбаев – жаһан­дық антиядролық қозғалыстың көшбас­шысы» экспозициясы атты бейнетур ұйым­дастырылған екен.

Заман талабына сай Елбасы кітапханасы­ның ғылыми және білім беру қызметі де виртуалды кеңістікке көшіп, вебинарлар, марафон сабақтары, бейнедәрістер, дөңге­лек үстелдер, онлайн-конференциялар өткізу­мен қатар, «Абай оқулары» эстафетасы, «Елін сүйген Елбасы» мұражай сабағы, мұға­лімдердің республикалық шығармашылық байқауы, балабақша тәрбиеленушілері суреттерінің «Атамекен» онлайн байқауы, сонымен қатар әл-Фарабидің 1150 жылдығына арналған елорда мектептері арасында «Ұлы даланың ұлы тұлғасы» онлайн байқауы жоғары деңгейде атқарылған екен.

Сонымен бірге Елбасы кітапханасы өзінің сайты арқылы оқырмандарға онлайн-кітапхана қызметін тегін пайдалануға мүмкін­дік беріп отырғаны қуантарлық. Бұн­дағы кітап қорында электронды форматта үш мыңнан астам басылым бар екен. Бұның сыртында, кітапхана сайтында қазақ халқының көрнекті тарихи тұлғаларына, сондай-ақ мемлекеттің дамуына үлес қосып жүрген қайраткерлерге арналған «Мәңгілік ел алыптары», «Ұлы дала тарландары», «Ұлттық код» т.б. рубрикалар ашылыпты. Жалпы алғанда, Елбасы кітапханасына онлайн-қатынасушылар саны 10 мыңның үстіне шығыпты.

 

Соңғы жаңалықтар

Ұқсас жаңалықтар