Қоғам • 16 Қыркүйек, 2020

Екінші толқынға даярланып жатыр

49 рет көрсетілді

Күз бен қыс мезгілдерінде коронавирус инфекциясының қозуы байқалған жағдайда қиындықтардың алдын алу үшін елордадағы емдеу мекемелерін жабдықтау мен өзге де қажетті әзірлік жұмыстары жүргізіліп жатыр.

Қаладағы медициналық ұйымдар коронавирус пен пневмонияны емдеуге қажет қосымша жабдықтармен қамтамасыз етілді. Бүгінде ел астана­сындағы эпидемиялық жағдай тұрақ­ты. Нұр-Сұлтан қаласы әкімі баспасөз қызметінің хабарлауынша, қоғамдық ден­саулық сақтау басқармасы күз бен қысқы кезеңде COVID-19-дың алдын алу және емдеу бойынша іс-шаралар жоспарын дайындап бекітті.

Өткен жаз айларында вирус жұқ­тыр­ған адамдар нөпірі көбейгенде медицина ұйымдары алдынан шыққан проб­лемаларды шешу үшін бұл күнде 50-ден астам жасанды тыныс алу аппараты, 2 компьютерлік томограф, өкпенің зақымдану пайызын көруге мүмкіндік беретін 7 сандық рентген жүйесі, 3 оттегі резервуары қосым­ша сатып алынды. Сонымен қатар қа­ла­ның емдеу мекемелеріне 500-ден ас­там оттегі концентраторы, 250-ге жуық жасанды желдету тыныс алу ап­параты, 300-ге жуық флоуметр, 500 көп­функционалды арнайы кереует жеткізіл­ген.

Қала әкімінің орынбасары Бақ­тияр Мәкен бірқатар медициналық ұйымдарды аралап, күз және қыс айларында маусымдық аурулар – ЖРВИ мен тұмаудың көбеюін естен шығармауы қажеттігін айтып, меке­мелердің COVID-19 індетіне дайындығын тексерді.

«Демалыс күндері карантин шараларын енгізу арқылы қалада COVID-19-ға қатысты ахуал тұрақ­талды. Медицина мекемелері мен қызмет­керлерге ауыртпалық түспеуі үшін қатаң санитарлық нормаларды сақтауды жалғастыру қажет. Коронавируспен күреске дайындық тоқтамайды. 110 тон­надан астам дәрі-дәрмек сатып алынып, мекемелер медициналық жабдықтармен қамтамасыз етілуде. Күзде өршитін ЖРВИ індетімен бірге коро­навирусқа қатысты ахуал да күрделенуі мүмкін. Оған біздің барлық медицина ұйымдары дайын. Жақында медициналық жабдықтардан басқа жылжымалы флюорографиялық кешендер, сандық рентген жүйелері және жоғары дәлдіктегі желдеткіштер де келеді. Мысалы, бүгінде стационарларды өкпені жасанды желдету аппаратымен қамтамасыз ету шамамен 94 пайызды құрайды», деді Б.Мәкен.

Сондай-ақ ол қала әкімдігінің жеке және республикалық клиникалардың компьютерлік томография аппараттарын елорда емханалары мен стационарларына бекіту туралы келісімге қол қойғанын атап өтті. Қазір компьютерлік томографтардың жалпы саны – 19. Қажет болса, қаланың барлық 17 стационары қайта ашылып, инфекциямен күреске жұмылдырылмақ.

Қалада 5 медициналық мекеменің аясында 1645 кереует жасақталып, оған қоса елордадағы көпбейінді клиникалар жедел және жоспарлы түрде пациенттерге көмегін жал­­ғас­тыра бермек. Бұл алғашқы ке­зеңде атқарылатын жұмыс болса, екін­ші кезеңде қосымша 1500 кереует республикалық дәрежедегі ауру­хана­лардың қатысуымен жүр­гізіл­еді. Ал үшінші кезеңде, тек қаладағы емдеу орын­дарында ғана емес, қонақүйлер кешендері, жатақханалар да вируспен күресетін стационарларға айналады.

Қалалық қоғамдық денсаулық сақтау басқармасы басшысының орынбасары Әлия Рүстемова: «Мұн­дай шаралар қосымша 5600 инфекциялық кереуеттер жасақтауға, оның ішінде 465 (реанимация) жан сақтау орнын ашуға мүмкіндік жасайды», дей келе, қала тұрғындары үшін ең бастысы, санитарлық нормаларды қатаң ұстану өзіңді де, жақындарыңды да аурудан сақтаудың жолы екенін қадап айтты.

Сонымен елордадағы емдеу орын­дары дайындықсыз емес. Алғаш­қы медициналық-санитарлық кө­мек ұйымдарының деңгейінде COVID-19 симптомсыз және ауруы­ жеңіл болып келетін, сондай-ақ індет жұқтырғандармен байланысқа түскен науқас­тарды қашықтықтан басқару бойынша жұмыс ұйымдастыру көзделіп, оған қосымша КВИ және пневмонияға шалдыққан науқастарға үй жағдайында ауруханалар әзірлеу, сондай-ақ оларға ақысыз дәрі-дәрмек­тер беру де қарастырылған екен.

«Қаланың барлық емханасында мобильді топтар пациенттерге үйге бару арқылы қызмет көрсетеді. Індетке күдікті науқастардан коронавирустық инфекцияға үйден ПТР тест алу да қарастырылған. Олардың саны 207-ні құрайды», дейді Ә.Рүстемова.

Сондай-ақ қалалық емханаларда әлеу­меттік арақашықтықты ескере отырып пациенттер үшін күту бөл­мелері, респираторлы аурулары бар науқастарды қабылдау үшін фильтр кабинеттерінің жұмыс істеуі де қарастырылып отыр. Ал ауруға шал­дығу ықтималдығы жоғары, қауіпті топ­тағы пациенттерді (гипертония, қант диабеті, коронарлық артерия ауруы, демікпе және басқалары) тұрақты түрде бақылау мобильді топтарды тарту арқылы жалғасады. Науқастарды жос­парлы түрде қабылдау міндетті түрде алдын ала жазылу арқылы жүргізіледі.

 

Соңғы жаңалықтар

Тағы бір әкім қызметінен кетті

Аймақтар • Бүгін, 18:06

Мэннидің тағы бір мәрттігі

Кәсіпқой бокс • Бүгін, 16:32

33 млн теңге айыппұл салынды

Қоғам • Бүгін, 08:39

Балаларға базарлық көбейді

Аймақтар • Бүгін, 08:38

Ұқсас жаңалықтар