Нұр-Сұлтан қаласы Қоғамдық денсаулық сақтау басқармасының хабарлауынша, қалада эпидемиялық жағдай тұрақты. Басқарма әкімдікпен бірлесіп күзгі-қысқы кезеңдегі COVID-19-дың алдын алу және емдеу іс-шараларының жоспарын жасады. Атап айтқанда, алғашқы медициналық-санитарлық көмек ұйымдарының деңгейінде COVID-19 симптомсыз және жеңіл түрде ауырған науқастарға, індет жұқтырғандармен байланыста болғандарға қашықтан басқару бойынша жұмыс ұйымдастырылады. КВИ және пневмониямен ауыратын науқастарға үй жағдайындағы ауруханалар ұйымдастыру, оларға ақысыз дәрі-дәрмектер беру қарастырылған.
«Қаланың барлық емханаларында мобильді топтардың жұмысы пациенттерге үйге бару арқылы қызмет көрсету жұмысы ұйымдастырылды. Індетке күдікті науқастардан коронавирустық инфекцияға үйден ПТР тест алу қарастырылған. Олардың саны 207-ні құрайды», дейді басқарма басшысының орынбасары Әлия Рүстемова.
Сондай-ақ 50-ден астам өкпені жасанды тыныстандыру аппараты, 2 компьютерлік томограф, өкпенің зақымдану пайызын көруге мүмкіндік беретін 7 сандық рентген жүйесі, 3 оттегі резервуары қосымша сатып алынған. Қаланың емдеу мекемелеріне 500-ден астам оттегі концентраторы, 250-ге жуық өкпені жасанды тыныстандыру аппараты, 300-ге жуық флоуметр, 500 көпфункционалды арнайы кереует жеткізілді. 1600-ге жуық оттегі нүктесі бар.
Жалпы, COVID-19 коронавирустық инфекциямен күресудің 3 кезеңіне жоспар құрылған. Атап айтқанда, 1-кезеңде 5 медициналық ұйымның базасында 1645 төсектік орын орналастыру жоспарлануда. Сонымен қатар көпсалалы медициналық ұйымдар жедел қабылдау және науқастарды жоспарлы түрде қабылдауды жалғастырады. 2-кезеңде бірқатар республикалық клиникаларда қосымша 1500 төсек орналастыру қарастырылған. Ал 3-кезең төсектерді тек қалалық ауруханалар мен емханаларда ғана емес, сонымен қатар қонақүй кешендері мен жатақханалардың бейімделген бөлмелерінде орналастыру көзделуде. Санитарлық дәрігерлердің тексеруінен кейін бірқатар медициналық ұйым «ковидтік ауруханаларға» резервте тұр.
Әлия Рүстемованың айтуынша, мұның барлығы 5600-дей орын, оның 465-і – реанимациялық орын.
Жақын арада медициналық жабдықтардан басқа жылжымалы флюорографиялық кешендер, цифрлы рентген жүйелері және жоғары дәлдіктегі желдеткіштер де келеді. Бүгінде стационарлардың шамамен 94%-ы өкпені жасанды тыныстандыру аппаратымен қамтамасыз етілген.