Елорданың іргесіндегі Қараөткел ауылының 72 жастағы тұрғыны Амангелді Үсейінов белі қатты ауырып, аяғын баса алмай қалған еді. Жүріп-тұрмақ түгілі, жанына ауру батқанда ұйқыдан да қалады. Адам төзгісіз азапты ауру ақсақалды Ұлттық нейрохирургия орталығының мамандарына алып келді. Оны орталықтың Жұлын нейрохирургиясы және шеткі жүйке жүйесінің патологиясы бөлімшесінің дәрігерлері қарап, пациенттің МРТ суреттерінен бел омыртқасының дегенеративті-дистрофиялық өзгерістерін анықтады. Медицина тілімен айтқанда төртінші және бесінші бел омыртқалары арасындағы дискінің сол жақ фораминальды жарығы бар болып шықты.
Қарияның ауруын және жасының ұлғайғанын есепке алған бөлімше дәрігерлері омыртқалардың L4-L5 дискісінің жарығын эндоскопиялық-трансфораминалдық жолмен алып тастауды ұйғарады.
Жұлын нейрохирургиясы бөлімшесінің меңгерушісі, профессор Талғат Керімбаевтың айтуынша, бұл пацинетке жарықты алып тастау операциясын жүргізудің өзіндік қиындығы болған. Жарық қол жетуі қиын жерде орналасқан екен. Бұл жағдайда дәрігерлер өте жылдам және жарақатсыз, ең бастысы тиімді емдеу әдісін таңдайды. Әдетте мұндай оқшауланған жарықтар кезінде сегментті имплантты бекіту жолымен омыртқа құрылымының бөлігін алып тастайтын жарақаттаушы әдісті қолданатын. Ал бұл жолы басқаша жол таңдалып, операция уақыты бар болғаны жеті минуттан астам уақытты алды.
«Біз, нейрохирургтер омыртқа және жұлын ауруларын емдеудің осындай заманауи, жоғары технологиялық, кіші инвазиялы әдістерін қолдану арқылы операция уақытын қысқартумен қатар емдеу нәтижелерін жақсартуға, сондай-ақ пациенттерді операциядан кейін ертерек аяққа тұруына және оларды күнделікті өмірге қайта оралуына мүмкіндік беретінін есепке аламыз. Сондықтан операция жергілікті анестезиямен, науқастың есін толық сақтай отырып жасалды. Бұл операция аяқтала сала пациенттің өз аяғына тұрып жүріп кетуіне мүмкіндік берді. Айта кетерлік жайт, науқасты алаңдататын барлық белгі толығымен жойылды», дейді орталық мамандары.
Ал ауруынан 7 минут ішінде айыққан 72 жастағы Амангелді Үсейінов «Жұлын нейрохирургиясы бөлімшесінің дәрігерлеріне, мейіргерлеріне жүрекжарды алғыстан басқа айтарым жоқ, сауығып келе жатқаныма қуанышым шексіз! Осы орталыққа келгенде өз аяғыммен жүре алмадым, балаларым мені мүгедектер арбасымен алып келді. Жиырма күннен астам уақыт жүре алмау былай тұрсын, тіпті ешқандай қозғала алмай қалдым. Қазір ақырындап жүре бастадым, жақында үйдегі шаруаларыммен де айналыса бастаймын деп ойлаймын. Барлығына шын көңілден үлкен рахмет!» дейді ағынан жарылып.
