Ресми деректер пандемияның күздегі соққысының таралу масштабы көктемдегіден салмақтырақ, ауырлау болуы мүмкін екенін айтады.
* * *
Үндістанда 24 сағаттың ішінде 55 мың адамның вирус жұқтырғаны анықталған. Бұл туралы елдің денсаулық сақтау министрлігі хабардар етті.
Егер нақтылай түсетін болсақ, бір тәулікте 55 342 үндістандық ауру жұқтырып, барлығы 7 175 880 азамат COVID-19 вирусының зардабын тартушылардың қатарында тұр.
Елде кеше 706 пациенттің тыныс-тіршілігі тоқтап, пандемиядан көз жұмғандардың саны 109 856 адамға жетіпті. Ал алдыңғы күні КВИ жұқтырғандардың 66 732 адам болғанын есепке алғанда, кешегі 55 мыңға шүкір айтуға да келетіндей.
* * *
Иран денсаулық сақтау министрлігінің баспасөз хатшысы Сима Садат Лари 12 қазанда бір күнде 272 азаматтың COVID-19-дан қайтыс болғанын жазды.
Баспасөз хатшысы індет кесірінен 28 816 адамның көз жұмғанын айта келе, тәулік ішінде вирус жұқтыру көрсеткішінің азаймай тұрғанына қынжылған. «504 281 ирандыққа жұққан вирустан 409 121 пациент жазылып шықса, 4 533 жанның жағдайы күрделі күйде, қарқынды ем алу бөлімдерінде жатыр», деді Сима Садат Лари.
* * *
Індеттен жазылған АҚШ азаматы бір жарым айдан соң COVID-19-ға қайта шалдықты.
«Небары бір жарым айдан соң вирусты қайта жұқтыру инфекциядан адамды сақтап қала алмайтынын көрсетеді. COVID-19 вирусының біз білмейтін жықпылдары көп және ағза мен оның қорғаныш жүйесінің қалай жауап беретінінің де құпиясы мол», дейді профессор Марк Пандори. Ғалым инфекциядан жазылып шыққан жандардың бір ауырдым, енді маған соқпайды деп бейғам жүре бермеуіне мән беріп, оның сақтануды, қашықтық ұстауды талап ететін ауру екенін айтқан.
BNO News келтірген ақпаратқа сенсек, бұл – әлем бойынша COVID-19-дың 2-ші рет қайта жұғуы.
20 пациент одан жазылып шығып, біреуі көз жұмып, енді екеуі емделіп жатыр.
* * *
Словенияда эпидемия дес берер емес. Словения Үкіметінің баспасөз хатшысы Елко Кацин елдегі эпидемиялық жағдайдың нашарлап бара жатқанына алаңдаушылық білдірген.
Елко Кацин әлеуметтік желілерде шынайы хабар таратып, COVID-19 жайлы халыққа дұрыс ақпарат беріп жүрген БАҚ пен журналистерге алғысын жеткізді.
Бүгінде Словения ауруханаларында 172 пациент жатыр, ал олардың 26-сы қарқынды емдейтін арнайы бөлімдерде өмір үшін күресіп бағуда. Індеттен 169 словениялықтың дәм-тұзы таусылыпты. Ал оның бар-жоғы 2 млн халқы бар мемлекет үшін қаншалықты ауыр екені айтпаса да түсінікті.
* * *
Чехияда денсаулық сақтау министрі Роман Прымула 6 адамнан артық жиналуға болмайтыны жайлы мәлімдеді.
«Бұл тек жабық ғимарат ішінде ғана емес, далада да жиналуға шектеу қойылды деген сөз», деген Роман Прымула елдегі барлық мектеп жабылып, сабақтардың онлайн жүретінін, ал балабақша жұмыстарының тоқтамайтынын жеткізді.
Сонымен қатар министр елде барлық қоғамдық көлік тоқтайтын аялдамаларда, перрондар мен күту залдарында маска тағуды қатаң сақтау қажеттігін ескерткен. Бұл шаралар 14 қазаннан бастап күшіне еніп, қарашаның 1-не дейін сақталады.
