Маңғыстауда соңғы аптада суыт хабардан құлақ құрғамай қойды. Қарашаның 13-інде Жетібай кен орнында «Маңғыстаумұнайгаз» АҚ-тың 3-ші блоктық кусталық сорғылық стансасына қарасты 5 мың текше метрлік жаңа су резервуарының төбесін монтаждау жұмыстарын жүргізіп жатқан екі жұмысшы құлап, қаза тапқан еді. Қаптама қаңылтырдың құлауы салдарынан 15 метр биіктіктен ұшқан «Ойл корперейшн компани» ЖШС жұмысшысының бірі оқиға орнында көз жұмса, екіншісі ауруханаға барар жолда үзілген.
Маңғыстауда соңғы аптада суыт хабардан құлақ құрғамай қойды. Қарашаның 13-інде Жетібай кен орнында «Маңғыстаумұнайгаз» АҚ-тың 3-ші блоктық кусталық сорғылық стансасына қарасты 5 мың текше метрлік жаңа су резервуарының төбесін монтаждау жұмыстарын жүргізіп жатқан екі жұмысшы құлап, қаза тапқан еді. Қаптама қаңылтырдың құлауы салдарынан 15 метр биіктіктен ұшқан «Ойл корперейшн компани» ЖШС жұмысшысының бірі оқиға орнында көз жұмса, екіншісі ауруханаға барар жолда үзілген.
Араға үш күн салып тағы бір қайғылы оқиға теміржол бойында орын алды. Маңғыстау жол бөлімшесінің Тамақ – Маңғышлақ жолының 399 шақырымында жүк пойызы мен мұнай тасымалдайтын MAN автокөлігі соқтығысып қалды. Жол өткеліндегі жұмыс істеп тұрған құрылғының белгісіне көлігін тоқтатқан жүргізуші, жақындай берген пойызды байқамады ма, белгісіз себептермен жүрісін жалғастырған. Ол басты күдікті ретінде танылып отыр.
Соққыдан жолдан шығып кеткен тепловоз және оның жетегіндегі мұнай тиелген 18 цистернаның 10-ы өртке оранды. Машинистің 24 жасар көмекшісі қаза тауып, 33 жастағы машинист аурухана түсті. Апат болған жерге жеткен Маңғыстау облыстық төтенше жағдайлар департаментінің мамандары, теміржол бөлімшесі мен құқық қорғау орындарының қызметкерлері өртті ауыздықтауға, оқиға себебін анықтауға және қарым-қатынасты қалпына келтіруге жұмылды. Болған оқиғаның мән-жайын анықтау үшін «Қазақстан темір жолы»» ҰК» АҚ тарапынан арнайы комиссия құрылды. Дерек көздері теміржол өткелінің техникалық жағдайында мін болмағандығын, оны 17 қазанда Маңғыстау облыстық жол полициясы басқармасы тексергендігін айтады.
Пойыздардың кестесінде кешігу орын алғанмен, бас-аяғы 3 сағаттан астам уақытта өрт сөндіріліп, қарым-қатынас қалпына келтірілді.
«Жазмыштан озмыш жоқ» деген осы, бірақ «Сақтансаң, сақтармын» деген де бар екенін естен шығармаған жөн-ау...
Гүлайым ШЫНТЕМІРҚЫЗЫ,
«Егемен Қазақстан».
Маңғыстау облысы.
