Коронавирус • 02 Қараша, 2020

Жұмыр жер жұқпалы дертпен жұмыла күресіп жатыр

6 рет көрсетілді

Шартарапты шырмаған COVID-19 індетінің таралу көр­сеткіші бойынша ең алдың­ғы қатарда АҚШ, Үндістан, Бразилия, Ресей болса, олардан кейінгі орынға Франция мен Испания шықты.

Әлемдік сарапшылар бүгінде вирус жұқтыру мен оның құр­бандарының саны жарияланып отырған мәліметтерге сәй­кес келмеуі мүмкін екенін айтады. Себебі тест тапсыру дең­гейі барлық елде бірдей емес, бұ­ған қоса ауру санын жасырып, кемітіп көрсетуді де жоққа шы­ғаруға болмайды.

 * * *

Scientific American басылы­мында 26 қазанда жарық көр­ген ғылыми мақалада COVID-19 вирусына толерант­ты­ адамдар бар екені айтылады.

Қытай мен Америка ғалым­дары мұндай адамдардың бо­йында COVID-19 дамымайтынын, вирус бар екені белгісіз күйде өтетінін атап өтті. Алайда ондай адамдар ағзасында COVID-19 ұзақ уақыт сақталып, ауру тасымалдаушы болады. Мы­салы, вирус анықталған 3 па­циентте бұрыннан созылмалы сусамыр, гипертония тәрізді аурулар болғанымен, оларда COVID-19 белгілері ағзаның то­лерант­тылығы арқасында еш білінбеген.

«Бұл адамдарда ауру белгілері айқын көрінбегенімен, вирустың ағзада 50 күндей ұзақ сақталуы олардың вирусқа қарсы тұрудағы жоғары иммунитетінен емес, жоғары толеранттылығына байланысты», дейді ғалымдар.

 * * *

Ресейлік Абдулло Ходжаев атты дәрігер-отоларинголог COVID-19 індетінен соң иіс сезу қабілетін қайтару әдістерімен бөлісті.

Маманның айтуынша, иіс сезу қабілеті қайта оралу үшін ауа ағыны жүйке талшықтарына тікелей келіп тұратындай жағ­дай қажет. Сол үшін тамырларды тарылтатын препараттар қабыл­дап, мұрынды теңіз тұзының ері­тіндісімен жиі шайып тұру ке­рек. Ал тұзды үйде де ерітіп пай­­даланса болады. Сондай-ақ В тобындағы дәрумендер мен по­ливитаминдер ішу керек. Па­циент­тер ішімдік пен нико­тиннен мүлде алыстап, осы тәсіл­дерді қолданса, иіс сезу тезі­рек қалпына келеді.

 * * *

ДДҰ басшысы Тедрос Аданан Гебрейсус күз бен қыс айларында солтүстік жартышар тұрғындарына COVID-19 қауіп-қатері қатты төніп тұр деген болжам жасады.

«Кей мемлекеттер үшін алдағы айлар қиынға түседі, олар вирус таралуы қауіпті аймақ саналады», дейді ол.

Расында, бүгінде солтүстік жартышардағы мемлекеттерде вирустың өршуі адамзат баласын алаңдатады. Еуропаның теңіз жағасындағы жылы да қолайлы түбектерін жайлаған мемлекеттер ауру зардабын тартуда. Испания, Италия тұрғындары арасындағы ауру таралу көктемдегі вирус тасқынын жолда қалдырды. Сол себепті Апеннин түбегін жайлаған жұрт үшін барлық кинотеатр мен спорт залы, бассейн мен театр атаулының есігі тарс жабылды. Мейрамханалар мен барлар белгілі бір уақытқа ғана ашылады және көпшілігінде тапсырыс бойынша үйлерге жеткізіп беру қажеттілігі ескертілген.

* * *

Германиядағы Солтүстік Рейн-Вестфалия премьер-министрі Армин Лашет федералды аймақтың денсаулық сақтау саласын күшейту қажет деп санайды.

Сол үшін бундесвердің және аймақ билігінің мыңдаған қызметкері аймаққа барып, COVID-19 таралуын ауыздықтау бойынша мақсатты түрде жұмыс істейтін болады. Бұған қоса Германия халқын маусымдық тұмаудан сақтау үшін де іс-шаралар қабылданған. Осы мақсатта мемлекет 27 млн вакцина сатып алған көрінеді.

 

 

Соңғы жаңалықтар

Қаламгерге құрмет

Руханият • Кеше

Ұқсас жаңалықтар