Оқиғаның ізінше Вена полициясының Twitter-аккаунтында арнайы операцияның жүргізіліп жатқаны туралы хабарланды. Қала билігінің хабарлауынша, қанқұйлы шабуылды бірнеше қаскөй ұйымдастырған.
Полицияның мәліметіне сай, шабуыл алты жерде, соның ішінде қала орталығындағы синагогада, еврей орталығы мен мейрамхана жанында болған. Құқық қорғау органдары бір адамның қайтыс болғанын, бірнеше адамның ауыр жарақат алғанын, оның ішінде полиция қызметкері бар екенін растады. Бұдан бөлек, 15 адам жарақат алған.
Зардап шеккендердің жағдайы ауыр болғандықтан, қаза тапқандар туралы мәлімет әзірге нақты емес. Кей бұқаралық ақпарат құралдары 7 адам көз жұмды десе, полиция қазірге 4 адамның бақиға аттанғанын растады.
Билік қала тұрғындарынан үйден шықпауды, терезеге жақындамауды сұрайды және куәгерлерге оқиға орнынан видео мен суретті әлеуметтік желіге таратпауға шақырды. Қалада қоғамдық көлік тоқтатылды.
Рейтер агенттігінің хабарлауынша, Аустрия Ішкі істер министрі Карл Нехаммер оқиғаны террористік шабуыл деп атаған. Министр тағы да шабуылдың болуы мүмкін екенін ескертті. Өйткені содырлардың кейбірі әлі қолға түспеген.
Аустрия канцлері Себастьян Курц полиция шабуыл жасаушыларға қарсы батыл әрекет ететінін айтты. «Біз терроризм арқылы қорқытып-үркітуге жол бермейміз және мұндай шабуылдарға қарсы бар күш-жігерімізбен күресеміз», делінген канцлердің мәлімдемесінде.
Әлеуметтік желілерде Венадағы шабуылдың сәті деген видео тарады. Онда ер адам көшедегі тұрғындарға мылтықтан оқ жаудырады. Әйтсе де, елдегі құқық қорғау қызметі видео деректерді тексеріп жатқандықтан, оның анық-қанығы туралы мәлімет берген жоқ.
Оқиғаға байланысты Қазақстан Сыртқы істер министрлігі ақпарат беріп, жараланғандар мен қаза тапқандар ішінде Қазақстан азаматы жоқ екенін мәлімдеді.
«Аустриялық полиция терроризмге қарсы ауқымды операция жүргізіп жатыр. Қазақстанның Аустриядағы елшілігінің алдын ала ақпаратына сәйкес, қаза тапқандар мен жараланғандар арасында Қазақстан азаматтары жоқ», делінген хабарламада.
