Ұлттық банктің хабарлауынша, төтенше жағдайға байланысты сәуір айында бірқатар бизнес субъекті жұмыстарын уақытша тоқтатқандықтан, қолма-қол ақшасыз операциялар біршама азайды. Бірақ мамыр айынан бастап операциялардың көлемі орташа есеппен ай сайын 12 пайызға өсіп отырды.
Қолма-қол ақша алу операциялары керісінше үнемі азайып отырды. Ұлттық банктің баспасөз қызметі хабарлағандай, қолма-қол есеп айырысу көлемі карточкалармен жүргізілген операциялардың үштен бір бөлігінен аспайды.
Қазірдің өзінде интернет-банкинг пен банктердің мобильді қосымшаларында жүргізілген операциялардың, яғни онлайн операциялардың үлесі үздіксіз ұлғайып келеді. Егер 2019 жылдың 9 айында онлайн-операциялар үлесі 67 пайыз болса, биыл 81-дан асты.
– Орташа есеппен алғанда 9 айда онлайн түрде төлем карточкаларымен 68 млрд теңгеден аса қаржыға 4 млн транзакция өткізілген. Жыл басынан-ақ мобильді банкинг аудиториясы тым белсенді болды. Қаңтар айында интернет-банкингті белсенді қолданатындардың саны 8 млн болса, қыркүйек айында ол 12 млн-ға жетті, – дейді Ұлттық банктің баспасөз қызметі.
Жиі қолданылатын төлем карточкаларының саны 25 млн. Бұл карточканың барлығының иелері қыркүйек айында онлайн-төлем жүргізіп қана қоймай, қолма-қол ақшаны шешу үшін де қолданды. Жалпы, жыл басынан бері 9 айда қазақстандық банктер 12 млн төлем карточкасын шығарды. Қолма-қол есеп айырысудың азайғанына банктердің карточка шығару, оны иелеріне жеткізіп беру сынды сервистерінің жақсарғаны, сонымен қатар мобильді қосымшаларындағы көрсетілетін қызметтің кеңейгені сынды факторлар ықпал етті.