Ермұрат Зекен Қарағанды мемлекеттік медицина университетін тәмамдай сала, маусым айында облыс орталығындағы провизорлық орталықта ерікті ретінде жұмыс істеген. Жас маман басын қауіп-қатерге тіге жүріп, небір жауапты істерді атқарды. Сөйтіп жүріп өзінің туған ауылын да бір сәт естен шығармаған. Ал бұл кезде Ермұраттың кіндік қаны тамған Ақтүбек ауылында жасанды оттегі аппараттарының жетіспеушілігі қатты сезіліп тұрған болатын.
Мәселенің мән-жайына қаныққаннан кейін Ермұрат жерлесі Азамат Смағұлов екеуі бірігіп, жалпы құны 219 мың теңге болатын бес оттегі баллонын арнайы тапсырыспен алдыртып, Ақтүбек ауылының тұрғындарын айтып жеткізгісіз қуанышқа бөледі. Жас маман ауылға арнайы келіп, әлгі оттегі баллондарын ауылдағы амбулаторияға орнатып, іске қосқан.
«Шын мәнісінде Ермұраттай асыл азамат ауылдың бірталай адамының өмірін сақтап қалды десем, артық айтпаған болар едім. Ол тұрғындарымызға сенім сыйлады, ертеңгі күнге деген үмітін жақты», дейді Ақтүбек ауылдық округінің әкімі Ерлан Орманов.
Ермұраттың өзі үйдегі төрт баланың үлкені екен. Жап-жас жігіт бауырларының ғана емес, бүкіл ауылдың қамқоры болып, осылайша азаматтық танытты. Ақтүбек ауылы тұрғындарының Ермұраттай ер ұлды тәрбиелеп өсірген ата-анасына деген ризашылығы тіпті ересен!
Қарағанды облысы,
Жаңаарқа ауданы
