Солтүстік Қазақстанда үш мектеп карантинге жабылды

Білім • 24 Қараша, 2020

Солтүстік Қазақстанда үш мектеп карантинге жабылды

14 рет көрсетілді

Солтүстік Қазақстан облысы Уәлиханов ауданының 14 оқушысында коронавирус белгілері анықталып, үш мектептегі оқу барысы онлайн форматқа көшірілді, деп хабарлайды Egemen.kz

Айым ДӘУІТ

Бүгін СҚО Білім басқармасының басшысы Гүлмира Кәрімова Өңірлік коммуникациялар қызметіндегі брифингіде пандемия жағдайындағы білім беру ұйымдарының жұмысы жайында мәлім етті. Гүлмира Кәрімованың айтуынша, қыркүйек айынан бастап СҚО-да 108 бала қауіпті инфекцияны жұқтырған. Олардың 61-і штаттық режімде, 47-сі қашықтан білім алған. Ал қарашада COVID-19 жұқтырған оқушылардың саны күрт артқан.

"Қараша айында 68 оқушыда коронавирус анықталды. Қазіргі уақытта 19 бала ем алып жатыр. Оның 14-і – Уәлиханов ауданының оқушылары. Мұнда тек Чехов орта мектебінде ғана бір тәулікте 7 баладан КВИ анықталды. Олардың барлығы инфекцияны күзгі каникул уақытында, үйлерінде жұқтырған. Басқа балалармен байланыста болмаса да біз 90 оқушысы бар бұл мектепті онлайн форматқа ауыстырдық", дейді Гүлмира Кәрімова.

Уәлиханов ауданының орталығы Кішкенекөл ауылындағы №1, №2 орта мектептер де қашықтан оқуға көшірілді.

Бұл екі мектепте де 7 баладан КВИ анықталған. Олар бір сыныптың оқушылары емес және бұл балалар да инфекцияны каникул уақытында отбасында жұқтырған.

"Қазіргі уақытта Аққайың ауданында бір оқушы, Петропавл қаласында екі оқушы ауырып жатыр. Олардың барлығы карантинде отыр. Ал мектептер карантинге жабылмайды, тек қана бұл мектептерде оқу форматы өзгереді, яғни штаттық режимнен қашықтан оқуға көшіріледі", дейді СҚО Білім басқармасының басшысы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз