Болашақтың баянды бағдарламасы

Стратегия – біздің өмірімізде

Өткен жылғы желтоқсанда жария етілген «Қазақстан-2050» Стратегиясы – қалып­тас­қан мемлекеттің жаңа сая­си ба­ғыты» Жолдауындағы қағи­дат­тық идеялар, пікірлер және ұсы­ныстар бүгінде бүкіл респуб­лика халқының қолдауына ие болды. Сөйтіп, жаңа бағдарлама елдің жалпыұлттық идеясына айналды. Себебі, бұл құжатта халқымыздың өткен жетістіктері, бүгінгі міндеттері және алдағы жоспарлары синтезделген болатын.

Елбасы Қазақстанның болашағын «Қазақстан-2050» Стратегиясының орын­далуымен байланыстырады. Рес­пуб­ликамызда осындай тарихи міндеттерді шешу үшін табиғат, шикізат, ғылым, техника және адам ресурстары жеткілікті.

Өткен жылғы желтоқсанда жария етілген «Қазақстан-2050» Стратегиясы – қалып­тас­қан мемлекеттің жаңа сая­си ба­ғыты» Жолдауындағы қағи­дат­тық идеялар, пікірлер және ұсы­ныстар бүгінде бүкіл респуб­лика халқының қолдауына ие болды. Сөйтіп, жаңа бағдарлама елдің жалпыұлттық идеясына айналды. Себебі, бұл құжатта халқымыздың өткен жетістіктері, бүгінгі міндеттері және алдағы жоспарлары синтезделген болатын.

Елбасы Қазақстанның болашағын «Қазақстан-2050» Стратегиясының орын­далуымен байланыстырады. Рес­пуб­ликамызда осындай тарихи міндеттерді шешу үшін табиғат, шикізат, ғылым, техника және адам ресурстары жеткілікті. Мәселе ел халқының «Қазақстан-2050» Стратегиясында топтасуында, тарихи бағдарламаны орындау ісіне бір кісідей болып жұмылуында.

Ұлттық идеялар: ел халқының этнос­аралық татулығы, саяси тұрақтылық, қо­ғамдық-әлеуметтік келісім, қазақ тілінің дамуы болса, осы құндылықтардың барлығын өзіне жинақтаған бағдарлама іс-қимыл қайнаркөзіне айналуда. Оны қолдау, іске асыру үшін жан аямай еңбек ету – әрбір қазақстандықтың борышы және міндеті. Мұндағы негізгі басты қозғаушы күш тетіктерінің бірі әлемдік озық білімнің иесі «Болашақ» бағдарламасының мүмкіндіктері болуға тиісті. Президент Нұрсұлтан Назарбаев «Болашақ» халықаралық стипендиясының 20 жылдық мерейтойына байланысты кешегі Астанада өткен форумда «Болашақ» негізінде «Қазақстан-2050» жалпыұлттық қозғалысын құруды ұсынды.

Осындай жасампаздық міндеттерді халқымыз «Қазақстан-2050» қозғалысына қатысу арқылы шешеді деген сенім күшті. Елбасы отандастарын жаңа жалпыұлттық қозғалысқа қатысуға шақырды. Мұның мемлекет алдындағы өзекжарды, тағ­дыр­лық міндеттерді шешуге кірісуі елдегі зор әлеуметтік жаңарудың бас­талуы деп сенеміз. Елбасының идеясымен «Қазақстан-2050» қозғалысы барлық еңбек ұйымдарында зор өрлеу тудыратындығы даусыз.

Біздің Қазақ ұлттық аграрлық уни­верситетінің ұжымы Мемлекет басшы­сының ел агрокешенінің алдына қойған міндеттерін өте жақсы түсініп отыр. Ғалымдар ауыл шаруашылығын жаңарту ісіне белсене атсалысуда. Қазір әлем халықтарын алаңдатып отырған өткір мәселенің бірі – мемлекеттің азық-түлік қауіпсіздігі. Сондықтан, Елбасы «Қазақстан-2050» Стратегиясында табиғат ресурстарының азаюы жағдайында Қазақстан мемлекетінің шешетін мін­дет­терін жеке басымдық ретінде атап көр­сетті. Бұл орайда Қазақстан өзінің қолда бар табиғат ресурстарын пайдалана отырып, тұрақты экономикалық даму мәселелерін шешу үстінде. Осы бағыттағы ғылымға негізделген инновациялық іс-шаралар білімді жас мамандарға жүктеліп отыр.

Қазақ ұлттық аграрлық университетінің ұжымы «Қазақстан-2050» қозғалысын қолдайды, оның идеяларын қуаттап, ел халқын биік тарихи белестерді бағын­дыруға шақырады.

Тілектес ЕСПОЛОВ,

Қазақ ұлттық аграрлық университетінің ректоры,

ҚР ҰҒА академигі.

АЛМАТЫ.

Жаңалық жақсылығын қоса әкелді

Елбасы «Қазақстан-2050» Стратегиясы – қалыптасқан мем­­лекеттің жаңа саяси ба­­ғыты» атты Қазақстан хал­қына Жолдауында: «Ауыл шаруа­шылығы өніміне бүгінгідей өсіп отырған жаһандық сұраныс жағдайында ол ауқымды жаң­ғыр­туды қажет етеді», деді. Бұл үшін ел агроөнеркәсіп қыз­меткерлеріне азық-түлік нарығының көшбасшысы болуды және ауыл шаруашылығы өндірісін арттыру үшін ең алдымен егістік алаңын ұлғай­туға баса назар аударуды тапсырды. Жаңа технологиялар енгі­зу есебінен сол алаңы ұлғай­тыл­ған егістіктің түсімін молайту міндетін де қойды.

Жуалылық диқандар сияқ­ты біз де тірлігімізді ақ егіс­тен бас­тағанбыз. Ал 2000 жыл­дан бас­тап картоп өсірумен шұғылдана бастадық. Алғашында 2 гектар жерге картоп ектік. Бүгінде оның көлемі 150 гектарға ұл­ғайды. Қожалығымызда бар­лығы 385 гектар жер болса, со­ның 185 гектары суармалы ал­қап. Қалғанына күздік бидай мен арпа егеміз.

Інім Нұржігіт Қарағанды облысындағы «Астра-Агро» ауыл шаруашылығы кәсіп­ор­ны­нан картоп өсірудің инно­вациялық жобасын алып келді. Қазір оны Германияның жаңа технологиясымен егіп, жинап, сорттаймыз. Бұрын әр гектардан 120-170 центнерден картоп жинасақ, жаңа технология бо­йынша оның көлемін 250-350 центнерге жеткіздік. Ал бұр­нағы жылы Нидерландыдағы кар­топ тұқымын дайындайтын фирмамен келісімшартқа оты­рып, 50 тонна элиталық кар­топ сатып алдық. Өнімді сақ­тайтын қоймамыз да бар. Ол да инновациялық тәсілмен жасал­ған­дықтан желдеткіші, жылыт­қышы бар, Борандының ақ қар, көк мұзында картопқа қажетті тем­ператураны жақсы ұстап тұра­ды.

Біз қазір өнімдерімізді тіке­лей өткеруден бөлек, мемле­кеттік сатып алу арқылы кей­бір мекемелерді азық-түлік­пен қамтамасыз ете баста­дық. Елбасы Нұрсұлтан Назар­баев «Қазақстан-2050» Страте­гия­сын­да инновация туралы өте дұрыс айтты деп білемін. Өйткені, міне, инновациялық жаңалық біздің өмірімізге жақсылығын қоса әкеліп отыр.  

Керімқұл БЕГАЛИЕВ,

«Зылиха» шаруа қожалығының төрағасы.

Жамбыл облысы,

Жуалы ауданы,

Түктібай ауылы.

Келешек келбеті

Мен Қазақстанда жас ке­­зім­­нен тұрамын. Оқы­­дым, қызмет істе­дім, өстім, өркен жайдым. Қазақстанмен бірге қиын­дықты да, қызық өмірімді де бірге көріп келемін. Менің журналистік қызметіме қырық жылдан асып кетті. Облыстық орыс тілді «Костанайские новости» газетін басқарғаныма 27 жыл болыпты. Мен Елбасымыз Нұрсұлтан Назарбаевтың «Қазақстан-2050» Стратегиясы – қалыптасқан мемлекеттің жаңа сая­си бағыты» Жолдауында қаралған мәселелерді тек өз басыма ғана қатысты алсам дұрыс пікір болмас еді. Өйткені, мен пенде ретінде жасарымды жасаған адаммын. Бірақ бұлай айтқым келмейді. Қазақстанды дамытуды жаһандық деңгейде қараған осы стратегиялық құжатта алдағы уақытта атқаратын істерді біз бастап бердік. Ең бастысы, ұрпақтарымыз оны жалғастырады.

Мен украин халқының өкілімін. Облыста, республикада біраз украин тұрамыз. Соның барлығы да Қазақ­станның болашағына сенімді. Қазақстан халқы Ассамблеясы тек Қазақстанда ғана емес, өзге елдерде де бар. Алайда, көптеген мемлекеттерде ол қоғамдық ұйым ғана болып саналады. Ал Қазақстан халқы Ассамблеясының қоғамдық ұйымнан мәні тереңде жатыр, ол ресми институт болып есептеледі. Мұның өзі Қазақстанды өзінің кіші отанына балайтын өзге ұлт өкілдері үшін арқа сүйейтін тау секілді. Республикамызды жайлаған ұлттардың бірлігі болғанда ғана еліміз нығая түсетінін Нұрсұлтан Әбішұлы әрдайым айтып жүр. Қазақстан бізге барлығын да жасады, енді біз елге не береміз? Менің де, менің қандастарымның да алдағы ұстар бағыты осы болуы керек.

Өз басым «Қазақстан-2050» Стра­тегиясы туралы ойлағанда, жас әріп­тестеріме қызыға қараймын. Солар Елбасымыздың осы Жолдауында айтылған бағыттарды алдағы өміріне темірқазық етіп ұстанатын болады, оны жүзеге асырады. Олар сол үшін де бақытты. Жолдауда кадр мәселесі туралы айтылған болатын. Ал ол жастарға сапалы білім бергенде шешімін табады. Бұл орайда Елбасы Нұрсұлтан Назарбаев жастарға барлық жағдайды жасап отыр. Алдағы уақытта инновациялық технологияларды меңгеру, шетелдік мамандар тәжірибелерінен тәлім алу да жастардың, оның ішінде жас журналистердің де еншісі болып табылады. Жастардың болашағы оларға күлімдеп қарағандай болады. Стратегияда айтылған бағыттарды әр қазақстандық қастерлеп ұстаса, мемлекетіміз дами бермек.

Сергей ХАРЧЕНКО,

әлеуметтану ғы­лым­дарының док­торы, Қазақстан халқы Ассам­блея­сының мүшесі.

ҚОСТАНАЙ.

Бәрі өзімізге байланысты

«Қазақстан-2050» Стратегиясын іске асырудың басты кілті еселі еңбек деп білемін. Елбасымыз қазақстандықтарға арнаған өзінің сөзінің бірінде жақсы жұмыс істеген адам жақсы тұрады деген болатын. Нұрсұлтан Әбішұлының нақылға бергісіз осы сөзі мен стратегия жолдары арасында тығыз байланыс бар. Егер біз бәріміз бір жағадан бас, бір жеңнен қол шығарып жұмыла еңбек етпесек, стратегия өзінен өзі іске аса салмайды ғой. Бағдарламалық басты құжат осылайша тек еңбек арқылы өмірімізге дендеп ене алады. Төрімізге емін-еркін қадам баса алады.

Ерінбеген адам өзінің еңбегінің нәтижесін көріп қана қоймай, отбасы бюджетін толтырады, әрі Елбасы белгілеп берген жаңа саяси бағыттың іргетасы нық болуына өзіндік үлесін қосады. Мысалы, мен үй құстарын өсіру арқылы өзіме де, тұтастай қазақстандық қоғамға да пайдалы іспен айналысып жүрмін деп санаймын. Нәп-нәзік балапаннан қауырсын қанат құс өсіріп шығарған кезге дейін біраз тер төгуге тура келеді. Шынына келсек, балапанның күтімі баланың күтімінен бір де кем емес.

Сарыауыздар жетіліп кетуі үшін жем-суына дәрумендер қосып ауыздандырамыз. Мұның бәрі оларды ширату үшін қажет. Балаларым үйрек пен қаз, тауық секілді үй құстарының соңында жүрген маған: «Апа, осыны қайтесіз, азаптанып», – деп қояды. Сірә, олар осы сауалдары арқылы еңбектің рахаты мен ләззатын әлі терең сезінбейтін сияқты көрінеді. Жылда жасап жүрген кәсібім ғой. Балапанды күзде санайды дегендей осы мезгілде құстар ет алып, еңбектің зейнетін көргендей боламын.

Елбасы белгілеп берген стратегиямен танысқан әр адам өзіне тиесілі кәсіппен айналысу қажеттігін терең түйсіне алады. Иә, бірқатар жағдайларда айтылып қалып жататын жұмыс жоқ деген сөз тек сылтау ғана. Мұндай кері тартатын сөзді отандастарымыздың әрқайсысы әрі ысырып қойып, қоғамға масыл болмау жолдарын ойластырса «Қазақстан-2050» Стратегиясында қойылған мақсаттар мен міндеттерге соғұрлым тезірек жетеріміз анық.

Қазір елімізде әркімнің қолынан келетін жұмыспен айналысуына толық мүмкіндіктер бар. Біз бәріміз оны тиімді түрде пайдалана білуіміз керек дегім келеді жеке кәсіппен айналысуды мақсат еткен барша қарапайым жандарға.

Бағила КҮЗБАЕВА,

құс өсіруші.

Батыс Қазақстан облысы,

Шыңғырлау ауданы.