55 кило салмақтың жартылай финалында алматылық Қорлан Жақанша талдықорғандық Марлан Мұқашевты ұтса, жамбылдық Жансерік Сәрсембиев қызылжарлық Аманғали Бекболатовтан басым түсті. Қос мықты ақтық сында жолықты. Көпшілік бұл жекпе-жекте Жақаншаның ұтатынына сенімді болды. Осыған дейін Азия біріншілігінде үш рет жүлдегерлер қатарынан көрінген ол былтыр Нұр-Сұлтанда өткен әлем чемпионатында күміс медальді иеленді. Сәрсембиев те ондай атақтың бірі де жоқ. Бірақ ол мінезді жігіт екен. Әйгілі қарсыласымен қаймықпай айқасқан Жансерік бас жүлдені жеңіп алды. Қорлан күмісті қанағат тұтты. Жартылай финалда оларға жол берген қос балуан қола медальді иеленді.
60 кило салмақ дәрежесінің фавориттері Мейрамбек Айнағұлов пен Айдос Сұлтанғали екені сөзсіз. Екеуі де дүниежүзілік додаларда дараланған дүлдүлдер. 26 жастағы Мейрамбек 2017 және 2019 жылдары жүлдегерлер қатарына қосылды. Парижде ол күміс алса, Нұр-Сұлтанда қолаға қол созды. Одан бөлек, Ақтөбе облысының өкілі Азия ойындарында үшінші сатыға табан тіресе, Азия біріншілігінде бір күміс пен екі қоланы қоржынға салды. 24 жастағы Айдос 2018 жылы Будапеште ұйымдастырылған әлем чемпионатында қола медальді мойнына ілді. Қызылордалық спортшының басқа да атақтары аз емес. Осы жайттың барлығын ой елегінен өткізген мамандар басты тартыс айтулы қос саңлақ арасында өрбиді деп топшалады. Бірақ бұл жорамал жоққа шықты. Айнағұлов ширек финалда өскемендік Ернар Фидахметовке жол берді.
Финалда Айдос Сұлтанғали Ернар Фидахметовтен басым түссе, Мейрамбек Айнағұлов пен ақмолалық Дастан Зарлыханов қола медальді еншіледі.
63 кило салмақта Қорланның туған ағасы Бағлан Жақанша да ақтық сынға дейін алқынбай жетті. Бірақ ол да шешуші тұста сүрінді. Алматылық өреннің жамбылдық Сұлтан Әсетұлына әлі жетпеді. Нұр-Сұлтандық Асаухат Мұхамадиев пен талдықорғандық Ғалым Қабдунасаров қола медальді еншіледі.
67 кило салмақтағы Алмат Кебісбаевтің жанкештілігіне сүйсінбеу мүмкін емес. Жасы 33-ке таяп қалған Алматттың халықаралық аренада Қазақ елі намысын қорғап жүргеніне 12 жылдан аса уақыт болды. Сол аралықта Семей өңірінің өрені әлем чемпионатында төрт рет және Азия ойындарында екі рет жүлде алды. Арасында күмісі мен қоласы да бар. Кебісбаев екі мәрте Азия чемпионы атанып, тағы екі рет күміспен күптелді. Лондон мен Рио Олимпиадаларында бақ сынады. Соңғы жарысында ол бесінші орынға табан тіреді. Биылғы ел біріншілігінде Кебісбаевқа Мейіржан Шермаханбет лайықты қарсылық көрсетеді деп ойладық. Бірақ жас дарын бастапқы бәсекелердің бірінде Солтүстік Қазақстан облысының балуаны Данияр Қаленовке 3:5 есебімен ұтылды.
Нәтижесінде Алмат барлық қарсыласын қапы қалдырып, бас жүлдені қанжығасына байлады. Ақтық айқаста ол Алматы облысының өкілі Нұрбек Қызыровты 7:5 есебімен ұтты. Ақтөбелік Тәңірберген Наурызбаев пен шымкенттік Әділхан Сәтаев жүлдегерлер қатарына қосылды.
72 кило салмақ дәрежесінің финалында атыраулық Каһарман Қисметов пен алматылық Азат Садықов күш сынасты. Бұл бәсеке алғашқысының пайдасына шешілді. Темірлан Өмірбай (Алматы қаласы) мен Олжас Сүлеймен (Қызылорда) үшінші сатыға табан тіреді.
77 кило салмақта бас жүлде үшін тартыс Алматы облысының қос саңлағы – Асхат Ділмұхамедов пен Демеу Жадыраевтың арасында өтті. Бұл бәсекені барша мамандар тапжылмай тамашалады. Біраз жылдан бері осы салмақтың тізгіні Асхаттың қолында. Оның Азия чемпионы және сол жарыстың үш дүркін жүлдегері деген атақтары бар. Әлемдік додаларда Ділмұхамедов жеңіс тұғырына сынық сүйем қалғанда сүрініп жүр. Демеу 2017 жылы Парижде өткен әлем чемпионатының күміс жүлдегері. Құрлықтың басты додасында екі рет жеңіс тұғырына көтерілді. Бірақ бұл атақтарға ол сәл жеңіл салмақтарда қол жеткізді. Соған қарамастан Жадыраев Алматыдағы жарыста өзін жақсы қырынан көрсетті. Финалда Демеу Асхаттан 7:3 есебімен айласын асырып, ел чемпионы атанды. Азия чемпиондары Максат Ережепов пен Темірлан Шадукаев қола медальді қоржынға салды.
82 кило салмақта Мирас Баршылықовтың бағы жанды. Қостанайлық спортшы финалда шымкенттік Шәміл Батыровқа шаң қаптырып кетті. Темірлан Байғанин (Қостанай) мен Қуанышбек Досжанов (Ақтөбе) үшінші орынды иеленді.
87 кило салмақ дәрежесінде Азия чемпионы Нұрсұлтан Тұрсыновтың тұғыры биік болды. Бірнеше жыл спорттан шеттетілген Шығыстың шымыр жігіті боз кілемді әбден сағынып қалған екен. Алатау баурайында ол тамаша өнер көрсетті. Жарысты басынан аяғына дейін бір деммен өткізген Нұрсұлтан финалда елордалық Азамат Кұстыбаевтың тас-талқанын шығарды. Есеп – 9:1. Элмар Укали (Шымкент) мен Абдулазиз Кочерадзе (Алматы) үшінші орындарды иемденді.
97 кило салмақта Ерұлан Ысқақовтың тегеурініне ешкім шыдамады. Азия ойындарының екі дүркін қола жүлдегері, Азия чемпионы деген атағы бар Қарағандының қыраны финалда Сыр бойының сайыпқыраны Олжас Сырлыбайға сан соқтырса, Мейірбек Қордабай (Жамбыл) мен Салауат Ахметқали (ШҚО) жүлдегерлер санатына қосылды.
130 кило салмақтың финалында шымкенттік Әлімхан Сыздықов пен ақмолалық Талғат Жиентаев күш сынасты. Бұл бәсеке Оңтүстіктен келген алыптың асығы алшысынан түсті. Ақтөбелік Асылбек Жәнібекұлы мен қостанайлық Мансұр Шадукаев үшінші сатыларға жайғасты. Бір айта кетерлігі, еліміздің ең үздік балуандары Нұрмахан Тыналиев пен Дамир Күзембаев айтулы додаға қатыспады.
