Елордамызда қарашаның 25-28 күндері аралығында Оңтүстік Қазақстан облысының «Ән-шашуым өзіңе, мерейлі Астанам» атты мәдени күндері аясында «Оңтүстік-Цирк» мекемесінің «Алақай, Балақай» қойылымы өтті.
«Оңтүстік-Цирк» мемлекеттік коммуналдық қазыналық кәсіпорны тәуелсіздігіміздің 20 жылдық мерейтойы қарсаңында 2011 жылдың 17 желтоқсан күні ашылды. Осы мерекелік оқиғаға орай Шымкент қаласына Ресейдің аты аңызға айналған Ю. Никулин атындағы цирктің жұлдыздары арнайы шақырумен өнер көрсеткен екен. Мекеменің алғашқы басшысы Сұлтан Срайылов болатын. Ашылған күннен жұмысын жүйелі түрде жүргізіп келе жатқан цирк осы уақыт аралығында үш маусымын ашып, үш бағдарлама қойылымын көрсетіп үлгерген. Әрбір жаңа маусымды облыс бойынша мүмкіндігі шектеулі мектеп-интернаттарының, балалар үйінің тәрбиеленушілері мен әлеуметтік аз қамтылған отбасылардан шыққан бүлдіршіндерге арналған тегін қайырымдылық қойылыммен ашуды дәстүрге айналдырған.
Ешбір цирк қойылымы иллюзиясыз өтпейтіні белгілі. Нақ осы жанр бойынша Сергей және Гузаль Мұстафиндер өнер көрсетті. Екінші бөлімде балалар асыға күткен өнерпаздармен қатар, жан-жануарлар да ортаға шықты. Қойылым соңында Олег Касаткин жетекшілігімен әуеде ұшқан өнерпаздар көрерменнің қошеметіне бөленді. Барлық қойылым бойы бүлдіршіндердің жүрегіне бірден жол тапқан Ержик және Маха атты сайқымазақтар өздерінің күлкілі іс-әрекеттерімен баурап алды.
Ерлан Шыңғысбеков, «Оңтүстік-Цирк» мемлекеттік коммуналдық қазыналық кәсіпорнының бас директоры міндетін атқарушы: «Бүгінгі Астана қаласына сыйлап отырған бағдарлама балалардың жазғы демалысына орай «Алақай, Балақай!» деп аталған еді. Бұдан бөлек, бүгінде 2 бағдарлама тағы бар. Жалпы, циркке маман дайындау мақсатында Ж. Елебеков атындағы эстрада-цирк колледжінің директоры Б. Нүсіпжановамен келіссөздер жүргізіп, оңтүстік өңіріндегі циркке қызығушылық танытқан 5 талантты талапкерді грантқа оқуға түсіруге мұрындық болдық. Келісім бойынша бұл студенттер оқу бітірген соң біздің циркте жұмыспен қамтылатын болады. Бұл іс-шара 2014 жылы да жалғасын табады», – деді.
Бұл ұжымның өнерпаздары 2012 жылы «Азия жаңғырығы», «Шабыт» халықаралық фестивальдеріне, ал 2013 жылы ұлттық арна ұйымдастырған «Жұлдызды сәт», «Хабар» арнасы ұйымдастырған «Аймақтар аламаны» тележобаларына қатысып, жүлделі орындарға ие болған. Тәй-тәй басып келе жатқанына қарамастан цирк ұжымы едәуір істерді тындырып жатыр. Болашақта талай-талай көрерменді қуанышқа кенелтетініне күмән жоқ.
Нұрзада КҮМІСБЕК,
Л.Н.Гумилев атындағы Еуразия ұлттық университетінің студенті.
Суретті түсірген
Ерлан ОМАРОВ.
