Техногендік апат болған Мақтаарал ауданында 21 әлеуметтік нысанның құрылысы жүріп жатыр. Оның ішінде орталық стадион биыл пайдалануға тапсырылды және 20 нысан 2021 жылы аяқталады.
«Төтенше жағдай салдарын жою бойынша 8 әлеуметтік нысанның құрылысы жүргізілуде. Бір мектеп, бір балабақша, бір полиция пункті, 3 дәрігерлік амбулатория және 2 фельдшерлік-дәрігерлік амбулатория салынып жатыр. Салыстырмалы түрде алсақ, Мақтаарал ауданында 2019 жылы құрылыс саласына 7 917 миллиард теңге қаралса, 2020 жылға 29 миллиард теңге бөлінді», деді аймақ басшысы Өмірзақ Шөкеев.
Сондай-ақ, Фирдоуси ауылында 600 орындық мектеп ағымдағы жөндеуден өтсе, бір дәрігерлік амбулатория мен бір полициялық тірек пункті салынып жатыр.
Мақтаарал ауданында 2018 жылы 69 елді мекеннің 67-і, яғни 99,9% тұрғындар ауыз сумен қамтылды деген көрсеткіш бар. Алайда кейбір ауылдарда су жүйелерінің тозығы жеткен. 2018-2019 жылдары 5 елді мекендегі (Қоңырат, Дихан, Алғабас, Мақтажан, Жеңіс) ауыз су жүйелері жаңартылды. 2020 жылы тағы 5 нысанның (Наурыз, Алаш, Өргебас, Атакент, Береке) құрылысына бюджеттен 274 миллионға жуық теңге бөлініп, 3 нысанның (Наурыз, Алаш, Өргебас) құрылысы аяқталды.
2021 жылы 3 нысанның (Атакент, Береке, Иіржар) құрылысына бюджеттен 516 миллион теңге бөлінді.
2018 жылы 69 елді мекенің 27-і, яғни 57,8% тұрғындары табиғи газбен қамтылған болатын. 2018-2019 жылдары жүргізілген жұмыс нәтижесінде тағы 9 елді мекенге газ жеткізіліп, газбен қамтылған тұрғындар үлесі 63%-дан асты.
Мақтаарал ауданында шалғайдағы шағын 8 үй, 55 адам тұратын Достық елді мекенінен басқа барлық ауыл орталықтандырылған электр желісіне қосылған. Алғабас, Пернебаев, Қоңырат ауылдарындағы тозығы жеткен электр желісін жаңартуға 2021 жылға бюджеттен 130 миллион теңге бөлінді.
