Мемлекет басшысының Жарлығымен үстіміздегі жылы «Бәйтерек» Ұлттық басқарушы холдингі» АҚ құрылған болатын. Холдингке экономиканы әртараптандыруға ықпал ету, инвестиция тарту, кластерлерді дамыту, еншілес компанияларда корпоративтік басқару жүйесін жетілдіру міндеттері жүктелген.
Мемлекет басшысының Жарлығымен үстіміздегі жылы «Бәйтерек» Ұлттық басқарушы холдингі» АҚ құрылған болатын. Холдингке экономиканы әртараптандыруға ықпал ету, инвестиция тарту, кластерлерді дамыту, еншілес компанияларда корпоративтік басқару жүйесін жетілдіру міндеттері жүктелген.
Жақында «Бәйтерек» ұлттық басқарушы холдингінің делегациясы Германия Федеративтік Республикасына жұмыс сапарымен барып қайтты. Сапар осы елдің инновациялық технологияларды дамыту саласындағы тәжірибесін зерттеп, осы бағытта әріптестік қарым-қатынастар орнатуға арналды.
Сапар аясында инновациялық технологияларды дамытумен айналысатын мемлекеттік органдар, іскерлік және ғылыми орта өкілдерімен кездесулер өтті. «Бәйтерек» холдингінің басқарушы директоры- басқарма мүшесі Қаныш Тілеушин бастаған делегация Германияның федералдық экономика және технологиялар министрлігі, неміс орта кәсіпкерлерінің федералдық одағы, «Мемлекеттік-жеке кәсіпкерлік» АҚ, Төменгі Саксонияның «Innovatives Niedersachsen GmbH» инновациялық-технологиялық орталығы, Ганновер университетінің «Unitransfer» технологиялар трансферттеу орталығы, Бонндағы High-Tech Gründerfonds (HTGF) венчурлық-инвестициялық компаниясының өкілдерімен келіссөздер жүргізді.
Кездесулер барысында екі елдің инновациялық жүйесіне жауапты мекемелер негізінде Қазақстан-Германия технологиялық әріптестік орталығын құру мәселесі талқыланды. Қазақстан жағы мұндай орталық жұмысын келесі жылы ұйымдастыруға дайындық білдіріп отыр. «Бәйтерек» холдингінің құрамындағы «Технологиялық даму жөніндегі ұлттық агенттік» АҚ жанында қазіргі таңда Қазақстан-Корея, Қазақстан-Франция, Қазақстан-Норвегия, Қазақстан-АҚШ елдерімен бірлескен технологиялық әріптестік орталықтары жұмыс істейді. Оларда қазақстандық өкілдер трансферттеу жөніндегі агенттер ретінде жұмыс істеп, технологиялар мен қазақстандық мамандар үшін қажетті тренингтік бағдарламалар іздестірумен айналысады, бірлескен инновациялық, ғылыми-зерттеу жобаларына ұйытқы болады.
Қазақстан мен Германия арасындағы сан тарапты қарым-қатынастар ғылым, инновация, технологиялар саласындағы әріптестікті дамытуға негіз қалап отыр. Екі елдің минералды ресурстар, индустрия және технологиялар саласындағы әріптестігі Қазақстан мен Германия федеративтік республикасы үкіметтері арасында 2012 жылдың 8 ақпанында Берлин қаласында жасалған келісіммен бекітілген. Аталмыш Келісімнің негізгі қағидаты – Қазақстан шикізатын неміс технологияларына айырбастау. Қазақстанда бірлескен кәсіпорындар, неміс компаниялары мен банктерінің өкілдіктерін қосқанда герман капиталының қатысуымен 1250 экономикалық құрылым тіркелген. Негізінен олар өңдеу өнеркәсібі, құрылыс, көлік және байланыс, ауыл шаруашылығы, басқа да коммуналдық, әлеуметтік және жеке қызмет көрсету, экономиканың басқа да салаларын қамтып отыр. Қазақстанда «Сименс», «Даймлер», «Фольксваген», «Метро», «ТиссенКруп», «Ман», «РВЕ», «Кнауф», «ЕАДС», «Байер», «БАСФ», «Бош» сынды компаниялар мен концерндердің өкілдіктері бар.
Сапар барысында High-Tech Gründerfonds компаниясының өкілдерімен бірлесіп венчурлық қор құру, «Бәйтерек» холдингі жасақтағалы отырған жаңа технологиялар қорын инвестициялау мүмкіндіктері талқыланды. Қазіргі таңда «Технологиялық даму жөніндегі ұлттық агенттік» АҚ 7 жыл мерзімдік үлес көлемі 49 пайыздан аспайтын (1 венчурлық қор үшін 15,5 млн. АҚШ долларынан аспайды) венчурлық қорларға қатысуда. Аталмыш агенттіктің шетелдік венчурлық қорлармен жұмыс істеу тәжірибесі де бар. Мысалы, Технологиялық даму жөніндегі ұлттық агенттіктің жарғылық қоры 150 млн. еуро болатын Wellington Partners III Technology Fund L.P. венчурлық қорындағы үлесі 7,7 млн. еуроны құрайды. Қазіргі таңда IT және жаңа технологиялар бағытында жұмыс істейтін 11 компания қаржыландыруда.
Жылқыбай ЖАҒЫПАРҰЛЫ,
«Егемен Қазақстан».
