Кеше Астанада «Геология – 360 градус» атты ашық әңгіме алаңы өткізілді. Мұнда Қазақстан Республикасы Индустрия және жаңа технологиялар вице-министрі Нұрлан Сауранбаев пен еліміздің техникалық жоғары оқу орындары басшылары арасында геология және жер қойнауын пайдалану саласындағы кадр әлеуетін қалыптастыру бойынша түсіністік және серіктестік туралы меморандумға қол қойылды.
Кеше Астанада «Геология – 360 градус» атты ашық әңгіме алаңы өткізілді. Мұнда Қазақстан Республикасы Индустрия және жаңа технологиялар вице-министрі Нұрлан Сауранбаев пен еліміздің техникалық жоғары оқу орындары басшылары арасында геология және жер қойнауын пайдалану саласындағы кадр әлеуетін қалыптастыру бойынша түсіністік және серіктестік туралы меморандумға қол қойылды.
Аталған меморандумның мақсаты – Қазақстан Республикасындағы минералды-шикізат кешені қорларын дамыту бойынша салалық бағдарламаны орындау және геология саласына кәсіби кадрларды даярлау. Осы мәселелерді талқылаған ашық әңгіме алаңына мемлекеттік органдардың, ЖОО-лардың, жер қойнауын пайдаланушы компаниялардың және БАҚ өкілдері қатысты.
Қазақстан өз тәуелсіздігіне ие болғаннан кейінгі экономикада қалыптасқан құрылымдық өзгерістерге сәйкес көп жылдардан бері елімізде геология саласының мамандарына сұраныстың болмай келгендігі белгілі. Сондықтан салаға мамандарды даярлау мен өндірістегі кадр арасындағы сабақтастықтың бұрынғы тіні үзіліп кеткен болатын.
Алайда, қазір жағдай өзгерді. Геология саласының, оның мамандарының қажеттілігі жыл өткен сайын арта түсуде. Осыған байланысты геология мамандарын әзірлеу мен олардың біліктілігін арттыру мәселесі ҚИИДБ аясында қабылданған салалық даму бағдарламасының негізгі бөлімдерінің біріне айналды. Қазіргі таңда Үкіметте геология мамандықтарын Қазақстанның мемлекеттік сыныптауышына енгізу мәселесі қарастырылуда. Себебі, қазіргі кезде геологтар, гирогеологтар мен геофизиктер «Геология және пайдалы қазбалы кен орындарын барлау» мамандығы бойынша оқытылады.
2013 жылы «Геология және пайдалы қазбалы кен орындарын барлау» саласы бойынша 3324 түлек оқу орындарын бітіріп шықты. Оның 1456-сы мемлекеттік тапсырыс бойынша оқытылды.
Осы ретте Индустрия және жаңа технологиялар министрлігінің еліміздің кадр әлеуетін арттыру үшін қосымша шараларды қабылдауды ұсынғандығын айта кету керек. Бұл шараларда бірқатар мәселелер қарастырылған. Оның ішінде жылма-жыл өтіп жататын олимпиадаларға қатысу үшін «Жас геолог» үйірмелерін дамыту, «Болашақ» бағдарламасы бойынша ЖОО-дағы грант санын көбейту, геология мамандығы бойынша білім алатын үздік студенттерге атаулы шәкіртақыларды тағайындау, студенттерді жер қойнауын пайдаланушылардың келісімшарттық міндеттемелерінде қарастырылған 1 пайыздық көлеміндегі аударымдарын пайдалана отырып, еліміздегі және шетелдік кәсіпорындардың қолданыстағы базаларына өндірістік тәжірибеден өтуге жіберуді ұйымдастыру және тағы басқа мәселелер қарастырылған.
Сұңғат ӘЛІПБАЙ,
«Егемен Қазақстан».
