АКАДЕМИЯДАҒЫ НАУРЫЗ ТОЙЫ

Қосшы ауылында орналасқан Қаржы полициясы академиясында Наурыз мейрамы ерекше бір күйде мерекеленіп өтті. Олай дейтініміз, аталған оқу орны еліміздегі сыбай­лас жемқорлармен ымырасыз күрес жүргізетін нағыз қайсар, қайтпас, алынбас қаржы полициясы ма­мандарын дайындап шығарады. Ал Наурыз мейрамы қашанда білік­тілік пен бірлікке, сабырлылық пен тө­зімділікке және өнерлі бола бі­луге шақырады. Міне, осы орайда қа­уіпті кеселмен күрес жүргізетін бо­­лашақ мамандар тек заңды біліп, қу­далауды игеруі ғана емес, олар­дың жан-жақты қалыптасып, бар өнерді бойларына жиюы әділ­діктің ақ жолынан таймауына әсерін тигізеді. Сыбайлас жемқорлықпен күрес тереңнен бастау алуы керек. Бұл орайда Мемлекет басшысының тікелей бастамасымен елімізде жем­қорлыққа  кең көлемді соққы беріліп келеді. Соның арқасында сы­байластық сырқаты біраз бә­сендеп қалды. Бірақ, басталған бе­рекелі іс орта жолда тоқтап қалмас үшін оның қуаты күннен күнге арта түскені жөн. Ол үшін қауіпті кеселге қарсы тұра білетін және онымен ымырасыз күрес жүргізе алатын мамандар қажет. Елімізде сыбайлас жемқорлықпен тікелей күрес жүргізетін өзге де құқық қорғау органдарымен қатар Эко­но­ми­калық қылмысқа және сыбайлас жемқорлыққа қарсы күрес агенттігі екені белгілі. Ал оның қуатына қуат қосып, күш беріп отыратын Қаржы полициясы академиясы. Міне, жыл сайын осы аталған оқу орнына жүзден аса тыңдаушы қабылданады. Мәселен, былтыр 1-курсқа 120 тыңдаушы алынды. Олардың бәрі жалпы білім беру мектептеріндегі бірыңғай ұлттық сынақтарды жақсыға тапсырып, академияның медициналық, пси­хо­логиялық тексеруінен және дене шынықтыру дайындығынан өтіп, соңғы үш деңгейлі кешенді  кон­курс­тық іріктеуде алдына жан салмаған өрімдей жастар. Олар осы бірнеше сатыдан мүдірмей өткен соң академияға қабылданып, “Жас жауынгерлер курсы” мен ма­ман­дық пәндерін оқып, әскери саптық дайындықты игерді. Қазір төрт курс тыңдаушыларының арасында біліктілік, тапқырлық және жан-жақты тәлім-тәрбиелік тұрғысынан өзара бәсекелестік жарысы бас­та­лып кеткендей. Соның бір көрінісі, әр курс тыңдаушыларының Нау­рыз мейрамын ата-баба салт-дәстүріне сәйкестендіріп, лайықты дайын­далуынан-ақ байқалып тұрды. Оқу алаңында ақ шаңқай бірнеше киіз үй тігіліпті. Жоғарыда айтқанымыздай, аталған оқу орнында төрт курс бар. Соған сәйкес  курс тыңдаушылары төрт киіз үйді Наурыз мейрамына да­йын­дауды өз жауапкер­шілік­теріне алған. Жиналған жұрт әр киіз үйге бас сұғып тыңдаушылардың өнер­лері мен ерекше бір тап­қыр­лық­тарына баға беретіндігі сөзсіз. Міне, осы орайда бір-бірімен бә­секеге түскен төрт курстың тың­дау­шылары өнерлерін ортаға сал­ды. Әр киіз үйдің сыртқы бе­зен­дірілуінің өзі бірден көз тартып, оның алдында ұлттық киімді төгілдіре киген бірнеше жас жігіттер мен мың бұрала билеп жүрген арулардың қимылы тәнті етеді. Қыз ұзату мен келін түсіру көріністері әдемі шықты. Әсіресе, адалдық пен әділдік жолында бәсекеге түскен тыңдаушылар өнері көрерменді разы қылды. Александр ТАСБОЛАТОВ.