ЖЫЛЖЫМАЛЫ ҚОҒАМДЫҚ ҚАБЫЛДАУ САПАРЛАРЫ

Елбасы Нұрсұлтан Назарбаевтың “Жаңа онжылдық – жаңа экономикалық өрлеу – Қазақстанның жаңа мүмкіндіктері” атты ел халқына биылғы Жолдауында “Елді жаңғырту стратегиясының табыстылығы, ең алдымен, қазақстандықтардың біліміне, әлеуметтік және дене болмысына, көңіл-күйлеріне байланысты” деп атап көрсетілді. Осы мәселелерді шешуде “Нұр Отан” ХДП біріктіруші күш болуы қа­жет­тігін айта келіп, құқық қорғау органдарына жұмыс әдістерін жетілдіруді, құқықтық рефор­маға атсалысуды міндеттеген-ді. Осы талап үдесінен көрінудің сәтті қадамдары ретінде “Нұр Отан” ХДП Ақтөбе облыстық филиалы­ның қолдауымен Батыс аймақтық көлік про­куратурасының, Батыс көліктегі ішкі істер депар­таменті мен “Қазақстан темір жолы” ҰК” АҚ Ақтөбе жол бөлімшесінің ұйытқы болуы­мен Батыс көлік аймағына қарасты елді мекен­дерде “Жылжымалы қоғамдық қабылдау” атты әлеуметтік акция басталды. Оның мақсаты – аталмыш органдардың бірінші басшыларына өтініш білдіру үшін мүмкіншілігі жоқ халықтың аз қамтылған тобының өкілдерін жергілікті жерде қабылдап, арыз-шағымдарына құлақ асу, олардың құқықтары мен бостандықтарын қор­ғау, заңнамалық көмек беру, құқық бұзушы­лық­тың алдын алу, өзекті мәселелерді қолма-қол шешу, күрделілерін тиісті орындарға жет­кізіп, шешімін табуға ықпал ету болып табылады. Құрамында “Нұр Отан” ХДП Ақтөбе облыс­тық филиалының төрағасы, облыстық мәс­ли­хат­тың хатшысы Балғали Одабаев, Батыс аймақтық көлік прокуроры Сейфолла Кемалов, Батыс көліктегі ішкі істер департаменті бас­ты­ғының орынбасары Серік Алдашев және “Қазақ­стан те­мір жолы” ҰК” АҚ Ақтөбе бөлім­шесі директоры­ның бірінші орынбасары Владимир Петров бар жылжымалы қоғамдық қабылдау жасаушылар мінген шағын пойыз алдымен Алға стансасына аял­дады. Мұнда қоғамдық қабылдау жасаушы­лар­ды Алға ауда­ны әкімінің орынбасары Нұрхан Ағниязов қар­сы алды. Қабылдауға алғашқы болып кір­ген жас маман Ақтолқын Нұрмағамбетова бір жылдан бері жұмысқа орналаса алмай жүргенін жеткізді. Ақтөбе темір жол бөлімшесі дирек­торы­ның орынбасары Владимир Петров бұл маманды кадрлық резервке қойып, жұмысқа тұруына қолдау жасайтынын айтты. Сондай-ақ, осы стансаның қызметкері Жадыра Селеуова­ның “Астана-Ақтау” пойызының аялдайтын уақытын 2 минөттен 5 минөтке ұзарту, аудан­дық мәс­ли­хат депутаты Мерлан Жалғасбаевтың Тоқмансай стансасындағы осындай жағдай жәйлі өтініші де шешімін табатын болды. Жер, үй, банктерден несие ала алмай жүрген станса кезекшісі Самат Мұратаев, Клара Аймурзина, кассир Эльмира Ахметованың өтініш­терін шешудің заңды жолдарын қарастыруды Алға ауданы әкімінің орынбасары Нұрхан Ағниязов қаперге алды. Жылжымалы қоғамдық қабылдаушылардың қатары Қандыағаш стансасында Мұғалжар ауданының әкімі Серік Шаңғұтов пен оның орынбасары Жангелді Құрмашев және аудан­дық мекемелердің басшыларымен толықты. Қоғамдық қабылдауға келген Нұрлан Есенама­нов “Жастық” шағын ауданында судың уақыт­пен берілетініне қынжылыс білдірді, Раушан Мұратова стансада медпункт ашу мәселесін алға тартты. Сонымен бірге, жұмысқа орна­ласу­дың қиындығын көлденең тартқан аза­маттар да болды. Аудан әкімі Серік Шаңғұтов Қандыағаш қаласының су жүйесіне қыруар қаржы жұмсалып, күрделі жөнделгенін, судың тұрғын үйлерге дейін үзіліссіз барып тұрғаны­н, қалғанын кооперативтер мен кондо­ми­ниумдер арқылы шешу қажеттігін мәлімдеді. Және бұл мәселенің қалалық әкімдіктің ба­қы­лауы­на алынатынын да жеткізді. Медпункт ашуға кадрды дайындап қойғандарын, тек мәселе оған қажетті орынға тірелетінін айтты. Ал жұмысқа орналаса алмай жүргендерді өзінің қабылдауына келуге шақырды. Ауданда үш-төрт зауыт ашылып жатыр,оған адам таба алмай отырмыз, деді ол. Темір жолға орналас­қысы келетіндердің өтінішін қанағаттандыруға осындағы темір жол мекемелері басшылары­ның ықылас білдірмей­тінін, әркімдерден осы­ның астарында өздерінің жеке бас мүдделілігі бар дегенді естіп жүргенін де жасырмады. Сондықтан білетіндердің тиісті орындарға хабарласуын сұрады. Медбикелік мамандығы бар Қазына Төлегеноваға қабылдауына келуін сұрады. Мүмкіндігінше жұмысқа орналасуға көмектесемін, деді әкім. Осындағы вагон депосының нұсқаушысы Болатбек Байниязов баласын балабақшаға ор­на­ластыра алмай жүргеніне, ал зейнеткер Қаш­қынбай Ыбрашев еңселі Мәдениет үйі жоқтығына шағымданған-ды. Аудан әкімінің орынбасары Жангелді Құрмашев балабақшаға кезектің көптігін айта келіп, бірер адамның мәселесін шешуге болатынын, ал 180 орындық Мәдениет үйінің сметалық-жобалау құжаттары дайын екендігін, қаржылық дағдарысқа бай­ланысты оның құрылысы 2012 жылға шегеріліп отырғанын жеткізді. Ақтөбе темір жол бөлім­шесі директорының бірінші орынбасары Вла­димир Петров қоғамдық қабылдауда көтерілген мәселелер жұмыс тәртібі жағдайында шеші­ле­тінін жеткізді. Халықтың мұң-мұқтажын қа­шанда назарда ұстайтын Мұғалжар ауданы­ның әкімі Серік Шаңғұтов қоғамдық қабыл­дауға келген азаматтардың қай-қайсысының да мәселелері заңдылыққа сәйкес оң шешілетініне сендірді. Осы сапарда қоғамдық қабылдауда 36 адам болып, өз өтініш-тілектерін жеткізді. Бұдан басқа, осындағы темір жол ұйымдарының 100-ден астам жұмысшысы арасында еңбек заңдылықтарының сақталуы және әлеуметтік-тұрмыстық мәселелер жәйлі сауалдама жүргізілді. Оларда көтерілген проблемелар бойынша шаралар алынатын болды. Батыс аймақтық көлік прокуратурасы мұрындық болған осы игі бастама алда он екі бағыт бойынша жалғаспақ. “Нұр Отан” ХДП Ақтөбе облыстық филиалы қоғамдық қабылдау бөлімінің меңгерушісі Амангелді Мектепбаев енді Ақтөбе-Мәртөк бағытындағы темір жол бойымен осындай жылжымалы қоғамдық қабылдау жүргізілетінінен хабардар етті. Сондай-ақ осындай жылжымалы қоғамдық қабылдаулар МАИ қызметкерлерімен бірлесіп автомобиль көлігімен де жүзеге асырылатын болып шешілді. Сатыбалды СӘУІРБАЙ. Ақтөбе облысы.