Елдегі эпидемиялық жағдайға байланысты санаулы адам ғана қатысқан музыка мерекесінде Манарбек Ержановтың халық жүрегінен айрықша орын алған іргелі шығармалары орындалды. Есесіне аққу сазды аялаған тыңдарман қауым фестивальды әлеуметтік желі арқылы тікелей эфирде тамашалады. Әйгілі Әміре Қашаубаевтан тәлім алған талант иесі тіршілігінде 150-ден астам ән мен күйді дүниеге әкелген. Оның «Жетісу», «Астанада», «Батыр жорығы», «Күсенбай», «Өрнек», «Шалқар көл», «Аққу көлі» секілді күйлері, хорға арнап жазылған «Партизан жорығы», «28 гвардияшы-панфиловшылар», «Жастар тойы», «Жастар әні», «Бейбітшілік маршы» атты шығармалары, сондай-ақ «Паровоз», «Амангелді», «Бақыт жыры», «Қуанамын», «Қойшының әні», «Әнші Біржанға», «Сайра, бұлбұл», «Шегенің термесі» сынды әндері тыңдарманға етене таныс.
– Манарбек Ержановты өнер әлеміне қанаттандырып, көкірегіне әсем саз ұялатқан ұстазы – әнші әрі күйші Күсенбай. Ал әншілік шеберлігін ұштауда Шашубай Қошқарбайұлы мен Әміре Қашаубаевтың орны ерек. Ол бозбала шағында-ақ Біржан сал, Ақан сері, Естай, Шашубай әндерін айтып, түрлі айтыстарға қатысып, ел аузына ілікті. 1928 жылы Қазақ драма театрына қабылданып, алғашқы актерлерінің бірі болды, осы театрда қойылған спектакльдерде ойнап, сан қырлы бейнелерді сомдады. Әсіресе, «Қыз Жібек», «Ер Тарғын», «Абай», «Біржан-Сара» операларында шеберлігімен дүйім жұртты тәнті етті. Мәскеу төрінде ән шырқап, қазақ өнерін талайға мойындатты. Өнерден жол іздеген жастарымыз оның шығармашылық әлемінен қуат алып келеді. Бүгінгі фестивальдың мақсаты – Манарбек шығармаларын өскелең ұрпаққа кеңінен насихаттау, – дейді Мультимедиалық дәстүрлі музыка орталығының жетекшісі Роза Қаженова.
АЛМАТЫ
