Байрақты бәсекенің ашылу салтанатына Мәдениет және спорт министрі Ақтоты Райымқұлова, Нұр-Сұлтан қаласы Жеңіл атлетика федерациясының басшысы, елорда әкімі Алтай Көлгінов, Олимпиада чемпионы Серік Сәпиев және жазғы Олимпиада ойындарының жүлдегері, жеңіл атлет Дмитрий Карпов сөз сөйлеп, жарысқа қатысушыларға сәттілік тіледі.
Министр өз сөзінде елімізде жастардың жеңіл атлетикаға деген қызығушылығы жоғары екендігін атап өтті. «Президент Қасым-Жомарт Тоқаев Қазақстан халқына Жолдауында өскелең ұрпақтың спорттық және шығармашылық әлеуетіне аса назар аудару қажет екендігін айтқан болатын. Осы орайда бұқаралық, балалар-жасөспірімдер спортын дамытып, әр облыста, ірі аудан орталықтарында спорт үйірмелерін ашу қажет. Спорттық инфрақұрылымға да аса ден қою керек. Министрлік осы бағытта жұмыс жасап жатыр. Бүгінгі таңда, Қазақстанның жеңіл атлеттері Олимпия ойындарында, дүниежүзілік чемпионаттар мен халықаралық жарыстарда жоғары нәтижелерді көрсетіп, жеңімпаздар мен жүлдегерлер атанды. Тәуелсіз елімізге тұңғыш алтын медальды 2000 жылы Сиднейде (Аустралия) өткен Олимпия ойындарда кедергі арқылы жүгіруші Ольга Шишигина әкелді. Жеңіл атлетика спортында Дмитрий Карпов, Ольга Рыпакова секілді әлем мойындаған спортшыларымыз бар. Алдағы уақытта да рухы мықты, Қазақстан спортын әлемге танытатын жас спортшылар шығады деген үміттеміз. Жарысқа қатысушыларға сәттілік тілеймін», деді Ақтоты Райымқұлова.
Елорда әкімі Алтай Көлгінов Нұр-Сұлтан қаласы еліміздегі спорттық қалалардың бірі деген атқа лайық екенін айтып, Qazaqstan жеңіл атлетика кешені бізге халықаралық деңгейдегі жарыстар өткізіп қана қоймай, заманауи спорт жұлдыздары мен жаттықтырушыларды тәрбиелеп, жастарымызды бала күнінен спортпен шұғылдануына мүмкіндік беретінін жеткізді.
– Мемлекет басшысының тапсырмасы бойынша спорт нысандарының қолжетімділігін арттыру және қала тұрғындарын бұқаралық спортқа қызықтыру бойынша тиісті жұмыстар жүргізіліп жатыр. Балалар мен жасөспірімдер спортына, федерацияларға қолдау көрсетеміз», деді Нұр-Сұлтан қаласы Жеңіл атлетика федерациясының басшысы, елорда әкімі А.Көлгінов.
Нұр-Сұлтан қаласының ашық чемпионатына елорда спортшыларынан бөлек, еліміздің СҚО, Қарағанды, Ақмола, Қостанай облысы және Шымкент қаласынан келген 150-ден астам спортшысы жарыс көрігін қыздырып, бас жүлде үшін бақ сынады. Олар жеңіл атлетиканың 5 түрі, яғни ядро лақтыру, 4х200м аралас эстафета, ұзындыққа секіру, жүгіру және жеңіл атлетикалық жүріс бойынша жүлделерді сарапқа салды.
Естеріңізге сала кетейік, Qazaqstan жеңіл атлетика кешені өткен жылдың күзінде спортшылар үшін есігін айқара ашқан болатын. Бұл орын IAAF-тің барлық талабына сәйкес келеді. Мұнда республикалық және халықаралық жарыстар, соның ішінде әлем чемпионаттары мен Олимпия ойындарын өткізуге мүмкіндік бар. Спорт кешенінде жүгіру жолдары орнатылған атлетикалық алаң, тренажер залы және ядро лақтыруға, биіктікке, ұзындыққа секіруге арналған секторлары, балалар алаңы, бассейндер секілді артықшылықтары бар. Манеж 7000 көрерменге есептелген. Аталған чемпионат жеңіл атлетикалық кешенінде өткізіліп отырған алғашқы турнир. Жуық арада бұл жерде IX Азия чемпионаты өтеді деп жоспарлануда.
