Күрделі кезеңде қарқын бәсеңдеген жоқ

Бұл мәселеде Қарағанды облыс­тық дене шынықтыру және спорт басқармасының басшылығы батыл қадамдарға, тың шешімдерге бара білді. Мысалы, өңірде жарыс­тар, оқу-жаттығу жиындары және басқа да іс-шаралар жаңа пішімде  қашықтан, онлайн режімде жүр­гізіле бастады.

«Былтыр Тәуелсіздігіміздің 30 жылдығына арналған Saryarqa онлайн спартакиадасы алғаш рет ө­ткізілді, дейді облыстық дене шынықтыру және спорт бас­қар­масының басшысы Темір­хан Абылаев. – Спорттың тоғыз түрі­нен қалалар мен аудандар ара­сында өткен жарысқа бес мың­­­ға жуық адам қатысты. Бұл Қазақ­стан­да қашықтық режімінде ұйым­­дас­тырылған жарыстар ара­сын­дағы үздігі болды. Жалпы, ка­ран­тиндік шектеулер кезінде барлық санитарлық нормалар мен ере­желерді сақтай отырып, онлайн-форматта 371 спорттық тур­нир өтіп, оған 18 564 адам қа­тысты».

Сонымен қатар жергілікті Saryarqa телеарнасымен бірлесіп «Гим­настика» жобасы жүзеге асы­рылды. Бағдарлама аясында Жансай Смағұлов, Бейім­бет Канжанов, апа­лы-сің­лілі Немичтер, Милана Сафро­нова және басқа жетекші спортшылардың қатысуымен әлеуметтік желілерде тікелей эфирлер ұйымдастырылды. Сондай-ақ былтырғы қазан айында цифрлы технологиялардың көмегімен «QARAGANDY MARATHON 2020» халықаралық онлайн марафоны да ұйымдастырылды.

Жалпы, қазіргі таңда Қарағанды облысында балалар-жасөспірімдер 109 клубы, жасөспірімдердің 22 дене шынықтыру клубы, жалпы білім беретін мектептерде 2 337 спорт үйірмесі, колледждерде 431 секция, жоғары оқу орында­рында 126 спорт үйірмесі жұмыс іс­тейді. Ал өңірдегі 45 спорт мек­тебінде 32 896 бала мен жасөспірім тегін жаттығады.

Айта кететін бір жайт, би­ыл­­дан бастап қалалар мен аудан­­­дарда орналасқан 17 маман­дан­­­дырылмаған балалар-жас­өс­пі­рімдер спорт мектебі об­лыс­тық дең­гейге берілді. Жал­пы ал­­ған­да, өңірдегі спорт үйір­ме­ле­ріне қа­тысатын балалар мен жас­өс­пірім­дер саны 146 015 адам­ға жетті.

Бүгінде Қарағанды облысының жетекші спортшыларының алдында зор мақсат бар. Көздеген басты нысана – Токио Олимпиадасы. Қазірдің өзінде бұл додаға қатысу жолдамасына боксшы Абылайхан Жүсіпов, әйелдер күресінен Эль­мира Сыздықова, сонымен бірге мәнерлеп жүзуші апалы-сіңлілі Алек­сандра мен Екатерина Не­мичтер ие болған.

Айта кету керек, Токиоға апаратын жолдама саны бұдан да көп болуы мүмкін деген үміт бар. Қазіргі таңда облыстың 11 үз­дік спортшысының спорттың жеті түрі бойынша лицензия алуға мүмкіндігі бар. Олардың қата­рында дзюдошылар Ислам Боз­баев, Жансай Смағұлов, грек-рим күресінің шебері Ерұлан Ысқақов, батутта секіруші Данил Мұсабаев, академиялық ескек есушілер Светлана Германович, Виталий Васильев, Михаил Таскин, байдарка мен каноэда ескек есушілер Дарья Разумович, жеңіл атлетшілер Рима Кашафутдинова, Давид Ефремов және үстел теннисшісі Зау­реш Ақашева бар.

Паралимпия ойындарына бе­рілетін квота үшін күресте өңір­дің мүмкіндігі шектеулі спорт­шыларының да көрсеткіші жаман емес. Мысалы, бүгінде жү­зуден Наталья Звягинцева, Ан­дрей Афанасьев, Әлия Рахым­бекова, мылтық атудан Айдос Жылқы­шинов және жеңіл атлетші Дастан Мұқашбеков жолдамаға ие болып, төрт жылда бір өтетін додаға алаңсыз дайындалып жүр.

Облыста жетекші спорт­шы­ларға, яғни Ұлттық құрама командалар сапында жүрген атлеттерге бұрын болмаған жағдайлар жасала бастағанын айта кеткен жөн. Бұл турасында өңір спортының басшысы Темірхан Абылаев былай дейді: «Облыс басшылығы жетекші спортшыларды қолдап, олардың жаңа жеңістері үшін барлық жағ­дай жасауда. Мысалы, 2020 жылы чемпиондарға шәкіртақыны екі-үш есе көбейту туралы шешім қабылданды. Шәкіртақы алушы спортшылар саны 104-тен 165 адамға дейін көбейді».

Пандемия салдарынан туын­даған күрделі кезеңге қарамастан, облыста спорт нысандарын салу жұ­мыстары саябырламады. Бү­гінгі күнде олардың құры­лысы бюджеттік және бюджеттен тыс қаражат есебінен жүргізілуде. Мы­салы, былтыр мемлекет есе­бінен Қарқаралы қаласында 320 орындық дене шынықтыру-сауықтыру кешені (ДШСК) пай­далануға берілді. Сондай-ақ демеушілер есебінен Теміртауда дәл сондай кешен салынып, па­да­­лануға берілді. Жалпы, облыс бо­йынша спорт ны­сандарын салу және жөндеу жұмыстарына 11 млрд теңгеден астам қаржы бөлін­ген.

Облыс орталығының өз ба­сында республикалық федера­циялардың қаражатына халық­аралық талаптарға толық жауап беретін Saryarqa үстел теннисі орталығы мен «Теннис» орталығы салынды. Былтыр Қарағанды облысына жұмыс сапарымен келген Мемлекет басшысы Қасым-Жомарт Тоқаевтың өзі бұл теннис ны­сан­дарына өте жоғары баға берді.

Жалпы, мемлекеттік бағдар­ламалардың өңірдегі спорт ин­фрақұрылымын дамытуға оң әсерін тигізіп жатқанын айта кет­кен ләзім. Қазірдің өзінде «Жұ­мыспен қамтудың жол картасы» бойынша өңірдегі 6 бірдей спорт нысанының құрылысына қара­жат жеткілікті мөлшерде бөлінген. Олардың қатарында Шах­тинск қаласындағы 160 адам­дық бассейні бар ДШСК, Жезқазғандағы 320 адамдық бас­сейні бар ДШСК, Ұлытау ауданына қа­расты Қарсақбай ауылындағы 100 адамдық ДШСК, Жезді кен­тіндегі 160 адамдық ДШСК, Жаңа­арқа ауданының Атасу кентіндегі бассейн және Нұра ауданының Нұра ауылындағы бассейн бар.

Облыс спортының басшысы Темірхан Абылаев халықты спортқа жұмылдыруға әсер ететін маңызды факторлардың бірі – спорттық инфрақұрылымның дамуы мен оның қолжетімділігі екенін баса атайды. «Бүгінде,  дейді ол, – Қарағанды облысында 3155 спорт нысаны жұмыс істейді, оның ішінде 1230-ы ауылдық жерлерде орналасқан. Қалалар мен аудандарда жыл сайын хоккей және спорт алаңдары ашылады. Бүгінде облыста жасанды жабындысы бар 333 спорт алаңы, 262 көп салалы хоккей корты және 34 стрит-воркаут алаңы бар».

Бұл бағыттағы жұмыстардың жемісті болуына «Жұмыспен қам­тудың жол картасы» бағ­дар­ламасының игі ықпал еткенін атпай кетуге болмайды. Мысалы, өткен жылы аталған мемлекеттік бағдарламаны жүзеге асыру аясында 14 жобаға 1 миллиард теңгеге жуық қаражат бөлінген.

Бұдан бөлек бүгінде «Ауыл – ел бесігі» мемлекеттік бағдар­ла­масы аясында Бұқар жырау ауда­нының Ботақара кентінде 320 орындық спорт кешенінің құрылысы жүргізілуде. Бюджеттен тыс қаражат есебінен Қарағанды қала­сында спорттық-сауықтыру ке­шені мен триатлон паркі салынуда.

Облыс спортының басшысы Темірхан Абылаев әрбір қала мен ауылдық жерлерде тұратын балалардың, жастар мен ересек адамдардың спортпен шұ­ғыл­дануына жағдай жасауды басты мақсат санайды. «Мемлекет басшысы былтырғы Жолдауында өскелең ұрпақтың спорттық, шығармашылық әлеуетіне ерекше назар аудару қажеттігін атап өтті. Біздің басқарма жаңа жағдайда осы бағытта белсенді жұмыс істеп келеді. Қазіргі уақытта спорт­шы­лардың жаттығуына рұқсат етілді, барлық қажетті санитарлық нормаларды сақтай отырып, спорт кешендері мен бассейндер жұмыс істей бастады. Облыстық және аудандық жарыстарды өткізуге әлі де болса рұқсат берілген жоқ, бірақ олар міндетті түрде онлайн режімде жалғасады. 2021 жылға елуге жуық ауқымды спорттық іс-шаралар жоспарланған, оған әртүрлі жастағы облыс тұрғындары қашықтан қатыса алады», дейді өңірдің спорт басшысы.

ҚАРАҒАНДЫ