ЖЕҢІС ЭСТАФЕТАСЫ ӨСКЕМЕНГЕ КЕЛІП ЖЕТТІ

Ұлы Жеңістің 65 жылдығына санаулы күндер қалды. Отан үшін от кешіп, қасық қаны қалғанша арпалысқан, болашақ ұрпақтың бейбітшілігі мен ынтымағы жолында жанын аямаған боздақтарды қалай ұмытайық. ТМД Мемлекет басшылары Кеңесінің және ТМД Шекара әскерлері басшы­лары кеңесінің шешіміне сәйкес Ұлы Отан соғысындағы Жеңістің 65 жылдығына орай екінші ақпанда екі бағытта Эстафета алауының шеруі басталған. Біріншісі – Беларусь Респуб­ликасының Гродно қаласы, одан әрі Украина, Молдова, Армения арқылы Мәс­кеуге, ал екіншісі – Ресейдің Мур­манск қаласы, Қазақстан, Қырғызстан, Тәжікстан, Өзбекстан, Түркіменстан, Әзірбайжан арқылы Мәскеуге келіп, түйісулері тиіс. Міне, кеше Жеңіс эстафетасы Өскеменге келді. Ұлы Отан соғысы боздақтарына арналған Даңқ мемориалында әскери құрамалар мен шекара қызметі сарбаз­дары салтанатты шеруге әзір тұр. Бұл жерде соғыс ардагерлері мен қаладағы орта мектептердің оқушылары жауын­герлік киімдерімен сапта. Диктордың қуатты дауысынан кейін ортаға Ресей Федерациясы Шекара қызметінің бір топ жауынгерлері ҚР ҰҚК Шекара қызметінің үш сарбазына Жеңіс эстафетасы символын салтанатты жағдайда тапсырды. Бұдан кейін Шығыс Қазақстан облысы әкімінің орынбасары Түсіпхан Түсіпбеков сөз алып, Ұлы Жеңістің 65 жылдығына арналған Жеңіс эстафета­сының Кенді Алтайға келуінде үлкен мән жатқанын, кешегі сұрапыл соғыста Шығыс Қазақстаннан шақырылған 170 мың жауынгердің 95 мыңы келешек ұрпақ үшін жандарын пида еткенін тілге тиек етті. Сұрапыл соғыстан қайғы-қасірет шекпеген бірде-бір отбасы жоқ шығар. Ресей мен Қазақстан, басқа да ТМД елдерінің соғыс апатынан қанша зардап шеккендерін, алайда бірлігі мен тірлігі жарасқан қаншама ұлт өкілдерінің ынтымағы жемісін бергенін тілге тиек ете кетті. Бұдан кейін Алтай өлкесі әкімшілігі департаментінің бастығы Игорь Гниденко сөз алып, эстафетаны берік қолға тапсыр­ғандарын айтып өтті. Ал ҚР Ше­кара қызметі дирек­то­ры­­­ның орын­басары Амангелді Әбіл­ханов Жеңіс эстафета­сының 22 сәуір және 2-ші мамырда Қытай Халық Республи­касы­мен ара­дағы мемлекет­тік шек­ара бойымен Шығыс Қа­зақстан, Ал­маты жә­не Жамбыл об­лыс­тары арқылы өте­тінін хабар­лады. Екі елдің Ән­ұран­­­дары ой­на­лып бол­ған соң об­лыс әкім­дігі мен көрші Ресей өлке бас­шылары­ның соғыс құр­бандарына арналған гүл шоқтары қойыл­ды. Мәңгілік алауға соғыс ардагері, Со­циа­листік Еңбек Ері Қай­ролла Бақты­баев, Фрунзе Жақсы­лықов, басқа да арда­герлер гүл шоқтарын қойды. Бұдан кейін ән мен күйге кезек беріліп, жауын­герлер сап түзеп, жиналғандарға құрмет көрсетті. Оңдасын ЕЛУБАЙ. ӨСКЕМЕН.