Аймақтар • 25 Ақпан, 2021

Павлодар облысында білім беру саласындағы біраз былықтың беті ашылды

61 рет көрсетілді

Бұл туралы Павлодар облысының білім саласында сапаны қамтамасыз ету департаментінің басшысы Еркімбек Аязбаев мәлім етті, деп хабарлайды Egemen.kz Pavlodarnews.kz сайтына сілтеме жасап.

Жанболат Кенжеғұл

- Департаментіміз 2020 жылы 62 мемлекеттік тексеру жүргізді. 2020 жылы департаментке заңды және жеке тұлғалардан 19 өтініш келіп түсті. Оның жетеуі құзыреті бойынша басқа мемлекеттік органдарға жолданды, 12-сі бойынша өтініш берушілерге жауап берілді, - деді Еркімбек Аязбаев.

Спикердің айтуынша, түскен шағымдар бойынша өткен жылы баласының сабаққа қатысуын қамтамасыз етпеген бір ата-анаға шара қолданылған. Сондай-ақ Ақсуда «Педагог мәртебесі туралы» заңды бұзған директорға шара қолданылған. Ол бірнеше педагогты міндеттеріне жатпайтын мектеп ауласын абаттандыру жұмысына тартқан. Мектеп директорына әкімшілік кодекс бойынша ескерту берілген.

Сонымен қатар, департамент басшысы Екібастұздағы қызметкерлеріне қырындаған мектеп директорына қатысты іс туралы айтты.

- Екібастұздағы директорға қатысты әкімшілк іс қозғалды. Әкімшілік кодекстің 409-бабы бойынша барлық жауап алынды. Біздің тарапымыздан директорға 30 айлық есептік көрсеткіш мөлшерінде айыппұл салынды, - деді Еркімбек Аязбаев.

Сондай-ақ өткен жылы облыстыа ұлттық біліктілік тестілеуіне білім беру ұйымдарының 6621 педагог қызметкері қатысқан. Оның ішінде 95-і тыйым салынған заттарды пайдаланғаны үшін шығарылды.

Департамент басшысы 2020 жылдың маусым айындағы Ұлттық бірыңғай тестілеуге 2020 жылдың 4855 түлегі, өткен жылдар мен ТжКБ түлектері өтініш беріп, тестілеуге 4395 адам келгенін атап өтті.

- Қатысу деңгейі 90,5 пайызды құрады. ҰБТ кезінде кіреберісте тыйым салынған заттармен ұсталған 43 адамға кіруге рұқсат берілген жоқ. Тестілеу кезінде талапкерлер тыйым салынған заттарды қолданды, министрлік өкілдері тыйым салынған 55 затты тәркіледі, - деді Еркімбек Аязбаев.

Департамент мектептер мен техникалық және кәсіптік білім беру ұйымдарынан лицензиялар мен оларға қосымшалар алуға 549 өтінішті қарады. Оның ішінде 300 (54,6%) – лицензиялар мен лицензияларға қосымшалар берілді, 162 (29,5%) – қайтарып алынды, 87 (15,8%) – бас тартылды. Бас тартудың негізгі себебі – өтініш берушілердің біліктілік талаптарына сәйкес келмеуі.

Фото: ашық дереккөздерден

Күннің маңызды және өзекті жаңалықтарын «Егемен Қазақстан» телеграм каналынан оқыңыз