Спорт • 01 Наурыз, 2021

Жас балуандар белдесуі

35 рет көрсетілді

Ақтөбеде Тәуелсіздіктің 30 жылдығына және даңқты балуан Қажымұқан Мұңайтпасовтың 150 жылдығына орай дзюдодан жасөспірімдер және 23 жасқа дейінгі балуандар арасында грек-рим күресінен кезекті Қазақстан чемпионаты өтті.

Алдымен Ақтөбедегі «Жек­пе-жек» спорт сарайындағы ел біріншілігінде еліміздің 13 облысы мен Нұр-Сұлтан, Алматы, Шымкент қалаларынан келген 2004, 2005, 2006 жылдары туған 680 жас дзюдошы бел­десті. Әр аймақ 16 салмақ дәре­жесі (ұлдар, қыздар) бойынша құрама жасақтаған. Аталмыш ел біріншілігінде жеңімпаз және жүлдегер атанған татами ше­берлері ұлттық құрама сапы­на іріктеліп, Азия және әлем бі­ріншіліктеріне қатысуға мүм­кіндік алады.

Бес күнге жоспарланған жыл­дың маңызды додасын спорт сүйер қауым тікелей эфир­­­ден ғана тамашалады. Өйт­кені санитарлық талаптар бойынша спорт сарайына әзір­ше жанкүйерлердің кіруіне рұқсат жоқ. Сонымен қатар спортшыларға ПТР тесттің болуы да міндеттелді. Жарыс уа­қытында спорт кешеніне тек белдесетін балуандар мен жат­тықтырушысы және төре­шілер ғана кіргізілді.

Пандемия салдарынан татами шеберлері жыл бойы жарыстарға қатыспағандықтан болар, біріншілік ә дегеннен-ақ тартысты, әрі эмоцияға толы болды. Қыздар арасындағы 40 кило салмақта жауырыны жер­ге тимеген шымкенттік Са­бина Юлдашева топ жарса, 44 килода Түркістан облысының өкілі Айман Ибрагимова бас жүлдені олжалады. Сонымен қатар жамбылдық Ардақ Нұрсақ (48 кг), Алматы облысының өкілі Аружан Ережепова (52 кг), атыраулық Дана Әбідрова (57 кг), қостанайлық Дина Балун (63 кг), қарағандылық Диана Телбаева (70 кг) және 70 килодан жоғары салмақтағы Дильназ Рустамқызы (Алматы облысы) өз салмақтарында үздік шықты.

Ұлдар арасындағы белдесу де тосын оқиғаларға толы болды. Атап айтар болсақ, қос­танайлық Баймурзин Архат (50 кг), Атырау облысының ба­луаны Олжас Құмар (55 кг), шым­кенттік Аян Байкенжеев (60 кг), маңғыстаулық Қанат Әбитұлы (66 кг), ақтөбелік Нұр­­жан Бисенов (73 кг), қара­ғандылық Ұлан Алтаев (80 кг), шымкенттік Мейіржан Беріков (90 кг) және 90 килодан жоғары салмақта Алматы облысының балуаны Дамир Ахет ел чемпионы атанды.

Ел біріншілігінің қоры­тын­дысы бойынша, Алматы облы­сының құрамасы 3 алтын, 2 кү­­міс, 3 қола жүлдемен көш бас­тады. Ал Шымкент қаласының дзюдошылары 2 алтын, 2 күміс және 4 қола жүлдемен екінші орынға жайғасты. 2 алтын, 3 қола жүлде иеленген Қарағанды облысының жасөспірімдер құ­ра­масы үздік үштікті қоры­тындылады.

Дзюдодан ел біріншілігі аяқ­талған бетте «Жекпе-жек» спорт сарайының боз кілеміне еліміздің 23 жасқа дейінгі ерлер арасындағы грек-рим балуандары шықты. Үш күнге жос­парланған чемпионатқа Нұр-Сұлтан, Алматы, Шымкент қалалары мен 14 облыстан 200-ден астам балуан қатысты. Ба­луандардың бәсекесі де UWW (Ха­лықаралық күрес фе­де­ра­циясы) ережесі бойын­ша кө­рер­­мендерсіз және сани­тар­лық нор­маларды сақтай отырып өткізілді.

Байрақты бәсекенің алғаш­қы күнінде балуандар 55, 63 жә­не 87 килоға дейінгі салмақ дәрежелерінде өзара мық­ты­ны анықтады. 55 килода қы­зылордалық Алпамыс Дас­тан­бек барлық қарсыласын еш күмәнсіз жеңсе, 63 килода сынға түскен елордалық Асау­хат Мухамадиев финалдық кез­десуде Алматы облысынан кел­ген Ғалым Қабдунасаровтан басым түсті. Ал 87 килода белдескен тағы бір елордалық балуан Мақсат Сайлау бас жүлде үшін өткен бәсекеде Жартас Нұрғалиды (Алматы облысы) ұтып, алтын медаль тақты.

Екінші жарыс күнінде 60, 67 және 77 кило салмақтағы ба­луандар белдесті. 60 кило­дағы финалдық сайыста шы­ғыс­қа­зақстандық Нұрсұлтан Базар­баев боз кілем иесі Нұр­болат Темірбаевтан айласын асырып, Қазақстан чемпионы атанды. 67 килода Жамбыл облысының балуаны Дін-Мұхамед Қош­қардың бағы жанды. Ол финалда шығысқазақстандық Мадияр Малтекбаевты жеңді. 77 кило салмақта ақтөбелік Дәу­­лет Жал­ғасов үздік шықты. Фи­нал­да маңғыстаулық Рахат Са­ғым­баймен белдескен ол ел чем­пио­ны деген атаққа ие болды.

Жарыстың соңғы күнінде 72, 82, 97 және 130 кило салмақтағы балуандар шеберлік байқасты. Ресей, Түркия және тағы басқа да шетелде өткен бірқатар ха­лық­аралық жарыста атой сал­ған Алматы облысының өкілі Әлихан Көкенов (72 кг) ел чем­­пионатында да қарсылас шы­­датпады. Финалда ол Ер­асыл Нұрбосыновты алып жық­ты. Өткен жылғы ел бірін­ші­лігінде 77 килода топ жарған жамбылдық Диас Кален биыл да тұғырдың биік сатысынан көрінді. Ақтөбедегі додада 82 килода белдескен ол финал­да қарағандылық Асылбек Әбдіхалықтан айласын асырды. Ал аса ауыр салмақта ха­лық­­аралық турнирлерде ел қор­жынына жүлде салып жүрген павлодарлық Антон Савенко (130 кг) чемпион атанды.

Соңғы жаңалықтар

Дамудың сенімді іргетасы

Қазақстан • Кеше

Іні-досқа ілтипат хат

Руханият • Кеше

Ақтөбеде карантин жеңілдеді

Коронавирус • Кеше

Ертең ауа райы қандай болады?

Қазақстан • 23 Қазан, 2021

9 су қоймасы салынады

Экология • 23 Қазан, 2021

Ұқсас жаңалықтар