АҚПАРАТ ҚОЛЖЕТІМДІГІ АРТАТЫН БОЛАДЫ

Мәжіліс Төрағасы Орал Мұхамеджановтың жетекшілігімен өткен палатаның сәрсенбі күнгі пленарлық отырысында депутаттар Төраға орынбасарын сайлады. Оған  Экономикалық реформа және өңірлік даму комитетінің төрағасы  Владимир Бобров лайық деп табылды. Бұрынғы Төраға орынбасары Сергей Дьяченконың Ақмола облысына әкім болып кетуінен кейін бұл орын бос тұрған-ды. Отырыс барысында “Мәдениет туралы” Қазақстан Республикасы Заңына өзгерістер мен толық­ты­ру­лар енгізу туралы” және “Сыртқы барлау туралы” заң жобалары бой­ын­ша екі палата  арасындағы келіс­пеу­шіліктерді еңсеру жөніндегі ке­лісім комиссиясының ұсыныстары қаралды. Ол бойынша депутаттар Динар Нөкетаева мен Сәт Тоқ­пақ­баев­тың баяндамалары тыңдалды. Сондай-ақ, депутаттар назарына “Қа­зақстан Республикасының кей­бір заңнамалық актілеріне Қазақ­стан Республикасының “Элек­трон­ды үкіметін” дамыту мәселелері бойынша өзгерістер мен толық­ты­рулар енгізу туралы” заң жобасы бірінші оқылымда ұсынылды. Заң жобасын Байланыс және ақпарат министрі Асқар Жұмағалиев та­ныстырды. Үкімет қаулысымен “Қазақстан Республикасының “Электронды үкіметін” дамытудың 2008-2010 жыл­дарға арналған бағдарламасы қабылданғаны белгілі.  Заң жобасы қоғамның ақпараттық кажеттілігін қамтамасыз ету, электронды мем­ле­кеттік қызметтерді тұтынушы­лар­дың құқықтарын іске асыру үшін жағдай жасау, олардың қолжетім­ді­лі­гі мен сапасын арттыру, мем­ле­кет­тік органдардың құзыретін бел­гілеу, сондай-ақ “Электронды үкі­меттің” жұмыс істеуі жағдайында олардың қызметін үйлестіру бө­лі­гінде ақпараттандыру саласындағы қатынастарды реттеу мақсатында әзірленген. Заң жобасы бірінші оқылымда мақұлданды. Келесі кезекте “Таңбаларды ха­лық­аралық тіркеу туралы Мадрид ке­лісіміне хаттаманы ратифи­ка­ция­лау туралы” заң жобасы  қаралды. Ма­дрид келісімі тауар таңбасын қор­ғауды алу кезінде оның иесіне бірқатар артықшылықтар береді. Тауар таңбасын шетелде тіркеуге өті­німді беру рәсімі айтарлықтай оңай­латылады. Сонымен қатар, таңба­лар­ды халықаралық тіркеу жүйе­сін одан әрі жетілдіру мақса­тын­да 1989 жыл­ғы 27 маусымда Таңбаларды халық­аралық тіркеу туралы Мадрид келі­сіміне 26 бап­тан тұратын хаттама қабылданды. Аталған хаттама Мад­рид келісімі ел­деріне тауар таңба­ларын халық­ара­лық тіркеуді қамтамасыз ету мақсатында өздеріне тиімді шарт­тарды таңдауға мүмкіндік беретін ережелерді енгізу арқылы елдердің шектеусіз аясы жүйесіне қосылу үшін бар құқықтық кедергілерді жою міндетін шешеді. Қазіргі уақытта Мадрид жүйе­сіне 84 мемлекет қатысушы болып табылады. Оның ішінде 28 ел Ма­дрид хаттамасына, 6 мемлекет Мадрид келісіміне және әлемнің 50 мемлекеті Мадрид келісіміне де, Мадрид хаттамасына да қосылған. Осы жүйе көптеген кәсіпорындар, әсі­ресе, шағын және орта кәсіп­орын­дар үшін өздерінің тауар таң­баларын көптеген елдерде қорғау­ларына мүмкіндік беретін болады. Өзге жағдайда олар ешқашан өзде­рінің тауар таңбаларын халықара­лық қорғауды қамтамасыз ете алмас еді. Жалпы отырыста “Тұрғын үй қатынастары туралы” Қазақстан Рес­публикасының Заңына өз­герістер мен толықтырулар енгізу ту­ралы” заң жобасы талқыға са­лын­ды. Парламентшілер бастама­шы болған заң жобасының маңызы туралы Мәжіліс депутаттары Вла­димир Бобров пен Аманғос Өте­генов түсінік берді. Бастамашы­лар­дың мәлімдеуінше, аталған заң жо­ба­сы Ұлы Отан соғысының мүге­дек­тері мен қатысушыларына мем­ле­кеттік тұрғын үй қорынан тұрғын үй немесе жеке тұрғын үй қорынан жергілікті атқарушы орган жалда­ма­лы тұрғын үй алу құқығын бірін­ші кезекте берген кезде олардың табысынан шектеулерді алып тастау арқылы аталған санаттағы адам­дар­ға мемлекеттік қолдау көрсетуді күшейту мақсатында әзірленген. Бұл заң жобасы да мақұлданды. Асқар ТҰРАПБАЙҰЛЫ.