«Теміртау қаласында қалыптасқан экологиялық жағдай жедел шаралар қабылдауды талап етеді. Биыл жаңа Экологиялық кодекс қабылданды, сондай-ақ былтыр өңірдегі ахуалды жақсарту жөніндегі Жол картасы бекітілді. Бұл іс-шаралардың барлығы осы бағытта тиімді көрсеткіштерге қол жеткізуге мүмкіндік береді. Теміртау айналасында жасыл белдеу құру пәрменді шара болатынына сенімдімін», деді Е.Нысанбаев.
Вице-министрдің айтуынша, жауапты ведомствоның жасыл белдеуді құруда тәжірибесі бар. Айталық, 1997 жылы елорданың айналасында жасыл белдеуді қалыптастыру жұмысы қолға алынып, қазір отырғызылған ағаштың жалпы көлемі 87 мың гектар жерді алып жатыр.
«Нұр-Сұлтан қаласының жасыл аймағын құру кезінде жинақталған тәжірибе Теміртаудың төңірегін жасыл желекпен көмкеру барысында да қолданылады», деді вице-министр.
Қазақ орман шаруашылығы ғылыми-зерттеу институты мен «Қазгипролесхоз-KZ» жобалау институтының басшылары жасыл алқапты қалыптастырудағы тәжірибелерімен бөлісіп, оны құру ұзақ уақытты, сондай-ақ үлкен қаражатты талап ететінін түсіндірді.
«Ағаш отырғызып, оның жерсінуіне топырақ талдауын жүргізу қажет. Осыдан кейін жер жыртуды бастауға болады. Бұл жұмыстар екі жылдан астам уақытты алады. Содан кейін ғана ағаш отырғызуға кірісуге болады», деді сарапшылар.
«АрселорМиттал Теміртау» компаниясының басшылығы өз кезегінде жобаны қолдауға және 500 мың ағаш отырғызуға дайын екендерін жеткізді.
